Read Sumi Naga SAMUEL AKINIU 12 Bible Online

SAMUEL AKINIU 12 - Sumi Naga bible

SAMUEL AKINIU 12

¹AMPEU no tungkupu Nathan hapesu David lau puwu. Nathan no pa lau wuno pi, “Timi kini aphughi lakhilo kumtsa ache; lakhiye kinimi eno lakhiuye kumlhomi.

²Kinimi huye amshi eno bheri kutomo pighi chekemi,

³ikemu kumlhomi huye bheriti lakhi pano qhusughikeu likhi ae. Pano tipau akivishi tucho hejuche eno tipauye pa kilo pa nuli gholono kumtsa saputhulue. Pano pa chuqupu gholono ghi tipau loji che eno pa jukhu lono azu piyeche eno pa lukobo lono khape ishiche. Bheriti huye pa nga lakhi kiqi lono pighi cheke.

⁴Ghulo lakhi xukujumi lakhino kinimi kilo izu ighi. Ikelo kinimi huye pa kilo pa pighi lhoxuye heqhi pesu alibe shitsunike zuqhulo kumlhomi huno bheriti lakhi akighipi shi pighi akeu suwo heqhino alibe shipesu pa kilo inami izu ighi akeu tsuve.”

⁵David ye kinimi hu jupesu ighono pa gha ideveno pi, “Ino xukuau AMPEU jelono tushoqhi pi anike timi khuuno tishi puanikeno pa ye thive masae!

⁶Hitoikeu xesu xeni kumla shikeuye paye ghuthu bidino pano lukeu nguno alau lochileve masae.”

⁷Nathan no David vilo pi, “Timi tipau huye noke. AMPEU Israil Lhou no highi pi ani: ‘Ino opelo Israilmi shou akukau shilupe eno Saul launo oxaphelue.

⁸Ino pa kukaphu ghi eno pa nipuqo ghi otsue; ino opelono Israil eno Juda yeghiqha shou ghi akukau shilupeke. Tsala highi luzula aghiaye, niye ghuthu kini jehi nguno alaumu otsuni cheke.

⁹Tishi aye kushiye noye izahkutsuqo gholumove kya? Noye kushiye akumla lhoksa hipau mlave kya? Nono amqushino aghushiqa lono Uriya pithivepe nikeu shive, ikehu Amunmi pelono pa heqhi pithivepe no nono pa nipu luvetsue!

¹⁰Tighenguno hinguno tiqheli kumtsulo opolo kughuko khamiye akithi kijiksa shipeniae kughengu nono ihebideveno Uriya nipu suxaluveke.

¹¹Ino tushoqhi pi anike olikhi okibo dolono ino khami xukuthono oshou akupuna sughi tsupeni. Nono tileno ithi nani kughou ino onipuqo olauno ikhipesu timi kutami tsuve eno timi huno pucho mughu lono onipuqo sazuve penanike.

¹²Noye kusuuno axine shive, ikemu Israilmi kumtsu pelono ithukulupu shi puchouno ikhi kipheshi tipaqo tishi shive penike ino ikhipheve tsu nani.’ ”

¹³David no pi, “Ino AMPEU zulo axine mlavae,” Nathan no khochile pi, “AMPEU no oxine pevetsu ani; noye thimo nani.

¹⁴Ikemu nono AMPEU lau aphikumqhupu kumla piyeveke ghenguno onuye thive nani.” Tishino Nathan ye akilo wove.

¹⁵Uriya nipu vechewono David lau anu lakhi punu tsukeu AMPEU no anu tipau pelo sukutuuve pe.

¹⁶David no anu tipau pelo viluve penike Alhou lau akighini shi. Paye kumu chumo puzu kijili atsu-tsu pa chebo lo ilono aghuzalo ihozu ae.

¹⁷Pa qholo kijemiqono pa lau ighino pa haputhu, ikemu paye panoqo gholo kumu chu-sho mopi milive.

¹⁸Tishiwo apinedo lakhi thiuye anu ye thive eno Davidw kijemiqoye tipau sutsa pa vilo pimsave. Panonguno pi, “Anu xu akelo thotsu David ye ninguno pa putsa ighikelo ningu khochile chemoe. Tishiaye kishi puzu ninguye pa vilo panu thivae ipiluni kya? pa likhi pa ghimeve nosae!”

¹⁹Kughou panongu dolono hipatsa kuptsa akeu David no chilu keno, panu ye thivae pi pano vethaluve. Tighenguno pano panongu vilo iniju, “Anuye thive akeshea?” Panonguno khochile, “Iyei, paye thivae,”

²⁰David ye aghuza lono ithughiveno azu kuchuve, pasa xeve eno pa phimini kilive. Tishino paye AMPEU kilo wuno mllae. Pano akukakilo ide ighi kelo achuqupu khu eno pa lau sughi tsukemtsa chuve. Pawu kijemiqono pa vilo pi,

²¹“Ninguye hi vethalu amoe,” “Anu akuxu akeloye noye pa ghenguno mloqae eno kumu chumoe; ikemu pano thiveke mtsa noye ithughino achuque!”

²²David no khochile “Iyei, tishike, pano xuakelo niye kumvu qa ae. Ino kumsukeuye AMPEU no ilau kupukini a-tsuno anu thipemo nani ghashi ake.

²³Ikemu paye thivae tighenguno niye kushiye kumvu anikya? Niye anu akuxu sachile saghi kulupu keshea? Nighi ghulo lakhiye pano khile anikeno tipa alo cheve nani, ikemu paye khilemu ilau ide ighimae.”

²⁴Tipathiu David no pa nipu Bathsheba mlo vepiqitsu. Pano li sasu ashi aji kuqha eno lino anu lakhi punulu, David no pa je Solomon kutsu. AMPEU no anu kimiye

²⁵eno tungkupu Nathan vilo anu je Jedida ku-tsulopi ahza tsu, kughengu AMPEU no pa kimiye ke.

²⁶Tishiake ghulokilo Joab ye Amunmi phughi Rabba ishokibe le ae eno kitilano kumaye leluveni cheghi kutuve.

²⁷Pano aghinimi hapesu David lau hitoi pithi wupe: “Niye Rabba leluvae eno pano wu azu chu akeu zula khetha leluvae.

²⁸Tighenguno owu ghushimi achili akeqo hekutsuno aphughi leno owu shiluvelo. Niye tipau lelukeu ije shinishi amoe.”

²⁹Kuchono David no ghushimi achili akeqo hekutsuno Rabba lo wuno tipau lethu eno tipau shou tokulu shiluve.

³⁰Amunmi lhou Milkom khikhi asu atu keno tipau kutsulo shuna kutsukuqho ahu mighijukelo kilogram shighi pungu ae eno achikula ghi aghike David no tipaqo ikhiluveno tipaqo ikhisuwo pa kutsukuqholo supuluve. Aphughi lekeu lono anhemgha kutomo lhelukeu ghi pesuwuve.

³¹Aphughilo aghikeqo sawo khamino asu kukuxumi shivepe, eno ayikuphu ngo amughu peno ita-tu mlapenikeu shivetsu. Hitoi shi Amunmi taun kutau lono ighikemi ghi tishi mlape. Tishive kethiu David eno pawu timiqoye Jerusalem lo idewove.