Read Sumi Naga SAMUEL AKINIU 14 Bible Online

SAMUEL AKINIU 14 - Sumi Naga bible

SAMUEL AKINIU 14

¹Akukau David ye Absalom puhavekeu lono ighono amlo ime akeu Joab no ithive,

²tighenguno pano Tekoa lo totimi ighono lotsuloghui kemi lakhi puwutsu. Kughou lino wo tolukeno pano li vilo pi, “Noye amlo sa akeu muqu shilo; amlo imekelo uchekeu phikuzu uluvelo, eno osaxekevilo. Noye topumi lakhino ado kushuwo qani mlokeu ghusho ghili shipesu piyelo.

³Tishi puzu akukau lau wuno pa vilo ino ovilo kiu pilepini keno tipau tho pesu pilo.” Tishino Joab no li pelono kiu pipeni keno kishekulu pivetsu.

⁴Atopuu no akukau lau ighino sukumsa michi shi pishiqhotsu no pi, “Ikuphu tsulo, Akijeu!”

⁵Akukau no iniju, “Noye kiu lunishi anikya?” Lino chochile, “Niye chimemi lakhike, akijeu, ikimiye thivae.

⁶Akijeu, niye anu kini ache, ike ghulo lakhi pamaye alu lono kiyi mutolu, tipa ghulokilo khuumu pama hakhotsukemi kuhaveno lakhiuno lakhi heqhipithive.

⁷Ikehu, akijeu nisholokumi kumtsuno imithi ani eno ivilo inu pesu panongu ulo phesuve tsulopi khu ani, tishianguno pano pa thikuzuu heqhi pithivekeu mukhu panonguno pa heqhi pithiveniye shi ani. Tsala panonguno hi shive aye niye lakhi mu igholo kuhaveniae. Panonguye iwu ashekhau lajupu ghi shipuhave tsuniye shi ani eno ikimi je kumsulu chepe moveniye anu lakhi mu ghupe qhitsumove niye shi anie.”

⁸Akukauno khochile, “Akilo idewovelo, ino kiu shikepu keno kishekulu shitsuni.”

⁹Lino pi, “Akukau akijeu, Nono kiukiu shimu isholokumi eno ino akipimi puveni; no eno kukami bolomiye amikuchoe.”

¹⁰Akukauno khochile, “Tsalatsa khualano oshikumsa aye, pa sasu ilau ighilo, paye khilemu akiniu akupuna tsumae.”

¹¹Lino pi, “Akukau akijeu, kimiye puzu AMPEU oLhou vilo inikhutsulo, tishianguno isholokumino inu lakhiu pithivekeu makho likhi kumono itaghi inu kutau pithiveniye akeu xine alau shikithe pemoniyeke.” David no khochile pi, “Ino xukuau AMPEU jelono tushoqhi ani, onuye kiwala kitila lono mu ghime pemo nani.”

¹²Atopuuno pi, “Akukau akijeu, kimiyeno ipelono itaghi thime lakhi pilupelo,” Pano khochile, “Alo, tishilo”

¹³Lino pa vilo pi, “Noye kushiye hikithipu achipi kumou kumla Alhou wu timiqo lau mlavekya? Noye olikhi onu hapupovekeu lono ide ighikeu ghi pulovetsumoe, tighenguno olikhi nono kiu piqhivekeno tipau tsano okile qhivae.

¹⁴Ningu kumtsu thive nani; ninguye azu ayeghilo peleqhivekelo akiniu kichekumqo luchemo keu toike. Alhou ghi kithimi pesu akuxulo sughi chemoe, ikemu akukau ye timi lakhi hakughutsuve keu lono sachile sughinikeu laghiye phuphelu nani.

¹⁵Itehi Akukau Akijeu, ino oputsaniye ighikeuye timiqono ishikumsake ghenguno, ike ino ilikhi iputsano ovilo qhuinijukeu nono shitsulu nanipi akupulo ake ghenguno ighie.

¹⁶Ino kumsukeuye noye itsa initsuno khuuno inu ikujo pithiveniye pukaputsa akeu eno Alhou no pawu timiqo tsukeu yeghi lono ikhipheve niye shi akeu lono xalu nanipi kumsu anie.

¹⁷Ino ilikhi iputsakeu lono, akijeu nono tushoqhikeu lono isusholu anipi kumsuvae, kughengu akukauye Alhou wu kungumi toike ike alhoksa lono akivi michi kututa shilu nani. Ampeu oLhou pelono ogholo apeniu!”

¹⁸Akukauno khochile, “Ino ovilo thime lakhi inijunike, noye amikucho lono ivilo pitsulo.” Lino khochile, “Kiu kiumu ivilo inijulo, akukau akijeu”

¹⁹Pano livilo iniju, “Hiye Joab no okipe keu lono keshea?” Lino khochile, “Kiu akimthe keno tipau je lono ino tushoqhi ani, Akukau Akijeu, nono iniju akeu kiu lonomu potsughuve kulupu shighi okhochile mono amlavae. Iyei, owu kijemi Joab no ivilo hipaqo kumtsu kishi kepu eno kiu pimasakeno kishekulu mijetsue.

²⁰Ikemu pano hishi akeuye thwokha kumtsu shikumzu kileveno xathathai shiveni keu kimiji lonoke. Akukau Akijeuye Alhouw kungumi toi kiu shive anikela kumtsu alokutsu shi ithi akhanie.”

²¹Tipathiu akukauno Joab vilo pi, “Nono shinishi akeu opulou shitsunike nighi kughakutha shiluvae. Wupuzu anu lhotheu Absalom sasu hile ide ighilo.”

²²Joab no tileno sumsakeu michipu shi-ghi ayeghilo itsaqi tsuno pi, “Akukau Akijeu; itehi noye ipulou shive tsuae. kughengu nono ino qhuinijukeu achipika tsuke.”

²³Tishino pano ithughiveno Geshur lo wupuzu Absalom sasu Jerusalem lo ideghi.

²⁴Ikemu Akukauno kiukiu shi aghinamu Absalom ye akukakilo ngope monikeu shi ahza shivetsu. Akukauno pi, “Niye pa ithulunishi movae,” Tighenguno Absalom ye pa kilo ngoche eno khilemu akukau zulo ipeghi piyemoe.

²⁵Israil lo timi khuumu Absalom toi ighono juvikeu kuhae; paye akutsu lono iqi apukhu mutsu kutolo kumu tukutiye kuhae.

²⁶Pa saye ighono shishoi eno kughono asa kushuwo eno mishisheyiveni keno tipa ghuloki lono paye ampelo ghuthu lakhi akutsusa tsaveche. Akukakilo peitha chekeu ahhu lo suno mighi jukelo kilogram kini nguno alau mighilucheke.

²⁷Absalom ye anu kuthu ache eno anga lakhi Tamar ipikeuye ighono ajukivimi lakhi.

²⁸Absalom ye Jerusalem lo ampe kini kutolo akukau ju pithimono acheke.

²⁹Tileno pano Joab vilo pa zuqhushi akukau putsa tsupenike iniju; ikemu Joab no ighimove. Akiniu ghi Absalom no pa iniju kemu Joab no miliveno ighitsumove.

³⁰Tighenguno Absalom no pa qemi vilo pi, “Julo, Joab luye ilu phivilo ani ike tile asho thi ipeghi akhani. Wuno tipaulo ami su pitive tsulo.” Kuchono panonguno wuno alu tipau pitivetsu.

³¹Joab no Absalom kilo wuno iniju, “Kushiye oqemiqoye ilulo ami suvetsu kya?”

³²Absalom no khochile, “Kughengu ino okupuwu kelo nono ighimoke. Ino opelono akukau lau wuno ighenguno ishi pitsu penishi ake: ‘Niye kushiye Geshur qhiveno hilehi ighivekela ighenguye tilau ngo akeu pavini cheke.’ ” Absalom no highi pi, “Ino akukau sasu kujuthi lukepushi opelono kishekulu shi pitsu penishi a-e, eno tsala ikipimi shi aghiaye pa pelono ipithive pelo.”

³³Tighenguno Joab no Akukau David lau wupuzu Absalom no kiu pikeno pa vilo kishekulu pivetsu. Akukau no Absalom saghi penikeu pulovetsu kehu Absalom no pa zulo wuno ayeghilo itsaqi tsu. Tileno akukauno pa muma ghi salu.