Read Sumi Naga SAMUEL AKINIU 21 Bible Online

SAMUEL AKINIU 21 - Sumi Naga bible

SAMUEL AKINIU 21

¹David no kaluve kethiu ampe kuthu ishokibe ighono puqumiyeve. Tighenguno David no tipau vehu AMPEU vilo iniju eno AMPEU no pi. “Saul ngo pa laghaqoye hekiqhi kumla shipe pu ani; pano Gibeon lo kuami pithikhave.”

²(Gibeonmiye Israilmi kumoe; panonguye Amarimike Israilmi no susho tsunipi piqhi puakemike, ikemu Saul no Israil eno Juda lo timiqo kukupu ghenguno tipaqo shipuhave niye pukaputsae.)

³Tighenguno David no Gibeon lo kuami kuno panongu vilo pi. “Ipelo nongu ghenguno kiu shitsu penishi anikya? Nongu lau akukuqu kumla shipuakeu ghenguno tipau vishoshiveno nongu pelono AMPEU wu timiqo ghenguno inibetsu penishi ani.”

⁴Panonguno khochile, “Nino Saul ngo pa lagha sasu kiyimto keuye tsandiyi momu shunano xakutha shiluni chemoe, momu ninguye Israilmi lakhi mu heqhiveni shi amoe.” David no iniju, “Tishiaye, nonguye ipelo nongu ghenguno kiu shitsu penishi anikya?”

⁵Panonguno khochile, “Saul ye ningu shipuhave tsunishi ae eno ningu Israil yeghilo lakhimu puxumonikeu shie.

⁶Tighenguno pa tikughuko kiptimi tsuni niulo phesu tsulo, tishi aye AMPEU nhekithe lono, Gibea, khikhi AMPEU no kishephetsukeu Akukau phughi keno tipa alono nino panoqo tshuqhi pithiveni.” Akukauno khochile, “Ino tipaqo nongu ulo phesutsu nani,”

⁷Ikemu Jonathan pama dolo akimthe shoqhi shipe puakeu ghenguno David no Jonathan nu Mefiboshet, khuu Saul tilinu keno tipauye puxuluvetsu.

⁸Ikemu tinguno alauye pano Armoni ngo Mefiboshet, anu hipama Aia nga Rizpa no Saul lau punusutsu keu kughaluve eno Saul nga Merab nuli pano pungu khikhi lino Barzillai Meholaimi nu Adriel vechewono punusutsu keno hipaqo kumtsu kughaluve.

⁹David no hipaqo kughapesuno Gibeon lo timiqo ulo phesuvetsu eno panonguno AMPEU zulono panongu kumtsu tshuqhive ikehu pano tsuni kumtsa thikuqhae. Ghixu tusho ashekhalau eno ashothi ghile hukuthu shi akelono hipaqo kumtsu pithikhaveke.

¹⁰Tishive kethiu Saul nipu amshiu Rizpa, khuu Aia ngakeno, lino yeqhiyephi no atu shou apusho shino khile akithi kumo saghi qhipuakeno tipa alo ngolu eno tipa alo liye ghile tusho lono wo tuqu tsutsughu ighimoke kutolo tile ngoche. Puchou aghauno akumo mighi niye ighi aye haveche eno putho lono aghalo tughashino akumo luvenosa kehu tishi khecheke.

¹¹Kughou David no Rizpa no tishi asaghi khe akeu chilukeno,

¹²pano wupuzuno Saul ngo panu Jonathan saghi ishi Jabesh-Gilead lo kuamiqo launo khuluve. (Panonguno Bath Shan ipikeu alo khile timiqo kuhokumqo chekeno tileno pukasuwo pua, tiye Filistiyamino Gilboa tolono Saul heqhike tsalani lono tishi akumo pufuqhi puake.)

¹³David no Saul ngo Jonathan eno Saul laghalo pano tsuni thsuqhi pithivekeqo saghi kumtsu kiche kumqo luve.

¹⁴Tishino Saul ngo Jonathan pama saghiye suwo Saul papu Kish kumokilo qhove, tiye Benjamin lughi phivilo Zela aloke; eno panonguno akukau zah kutsu kiqi lono kumtsu tishi mlavetsuke. Tishive kethiuno Alhou no panongu no aghakhu ghenguno inikhu akeu khochiletsu.

¹⁵Filistiyami ngo Israilmi dolo aghukishi ipeghive, ikehu David ngo pawu timiqoye Filistiyami sasu aghushiniye wu. Eno ghuthu lakhi ghushi loye David ye akulho shive.

¹⁶Ighono subosughimi lakhi paje Ishbibenob ache, pangupaye ahushikelo akimshi kilogram kuthu tuxa eno paye azutakihi akithe puche, pano kumsukeuno David heqhinikeu shiae.

¹⁷Ikemu Zeruia nu Abishai no ighino David kuphuluve, pano ighino subosughiu Ishbibenob sasu kichighino pa heqhi pithivetsu. Tileno David wu timiqono David vilo hinguno athiuye paye khilemu panongu sasu aghushi alo wukevi lopi ishi tushoqhivepe: “Kughengu noye Israilmi lajupuuke eno ninguye opuhavenishi amoe,” ipi panonguno pi.

¹⁸Tipathiu itaghi Filistiyami sasu Gob lono aghushi, tipau ghushi lono Husha lono ighikeu Sibekai no Filistiyami kuloghi Sap ipikeu heqhi pithilu.

¹⁹Itaghi Filistiyami sasu Gob lono aghushi, ikelo Bethlehem lono ighikeu Jair nu Elhanan no Gat ghami Goliat heqhi pithilu, pa ngupaye akishi lau aghuqasu pahike.

²⁰Tipathiu itaghi Gat lono aghukishi lakhi shilu, hipau ghushi lono timi kuloghi lakhi ighono aghu shinishi kemi lakhi ae. Paye apukhuloti ghi auloti ghi putoputo tsugho-gho pukemike.

²¹Pano kumzapushi Israilmi thaigha ae, ikelauye David thikuzuu Shama nu Jonathan no pa heqhi pithive.

²²Ike timi subosughi kuloghi hipano bidiye Gat lono iko ighikeqoke, panongu kumtsu David ngo pawu timiqono heqhi pithikhave.