Read Sumi Naga SAMUEL AKINIU 24 Bible Online

SAMUEL AKINIU 24 - Sumi Naga bible

SAMUEL AKINIU 24

¹Ghuthu lakhilo AMPEU ye Israilmi lau amlo ideve, ikehu pano David pelono panongu shou akupuna sughitsupe. AMPEU no pa vilo pi, “Wuno Israilmi eno Juda lo timiqo kihi julo” ipi.

²Tighenguno David no pawu ghushimi shou zatou Joab vilo ahza hitoi tsuve: “Noye owu kijemi sasu aghakhu cheku halauno halau ashekha kutolo wupuzu Israil shiyeh khijehi anikeno timiqo kihijulo. Panongu khijehi anikeno niye ithinishi ani.”

³Ikemu Joab no akukau khochile, “Akijeu, AMPEU oLhou pelono Israilmi ghuthu aqhe shou nomu itehi akeu nguno akichiu shi aghilupeniu, eno opelo axupushuluno onhethino akichiu tipaqo ithulu kuthuwo peniu. Ikemu akijeu noye kushiye hipau shiju nishi anikya?”

⁴Ikemu qeti akukauno Joab ngo pawu kijemi pelono pa zahkutsu lupenishi auve; ikehu panonguye pa nhekithe lono Israilmi kihijunike ghenguno wukhave.

⁵Panonguye Jordan katha susu akhila mtalo aphughi Gad lughi phivilo akeu Aroer apeu panongu ghazu shilu. Tileno panonguye Jazer ahuu iqho.

⁶ipuzu Hatimi lughi lono Gilead ngo Kades kutolo iqho. Tishino panonguye Dan loghi wu eno Dan lono chesusu Sidon au piyiu kudau wu.

⁷Tileno chhiliu putukha puakeu phughi Tur lo wu, ipuzu Havimi eno Kananmi phughi kumtsulo wu eno ashekha loye chesu wo Juda yeghi chhiliu Beersheba kutolo iqilu.

⁸Ike panonguye aqhi tokuno atsala muku kutolo izucheno aghakhu kumtsu homxa izuwo toluveno ashekha loye Jerusalem lo ideighilu.

⁹Panonguno akukau lau hitoi pithi tsulu aghushilo ilokulupu timi 800,000 Israil lo ani eno Juda yeghi lono timi 5,00,000 anie pike.

¹⁰Ikemu David ye timi lhoxu kihi tavekethiu, pa lolo alokughuno kuhave, tileno pano AMPEU vilo pi, “Ino hishi mlavekeu huno axine lhoksa kije mla kuquvae! Ikimiyeno ikipimi qhivetsulo. Niye aghuzu anikha kumla mlavae.”

¹¹AMPEU no David wu tungkupu Gad vilo pi, “Wuno David vilo pa pelo kishelupe nike kuthu tsu ani. Pano tipano kuthu dolo khikhiu kishelu ni keno ino tipau shitsuni pilo.” Thoghiu David no ithughive kethiu

¹³Gad no pa lau ighino pa vilo AMPEU no kiu pilopi pikeno tipau pesu pi, eno pa vilo khikhiu shinikya pi iniju?” Oyeghilo ampe kuthu puqumiye keu keo moaye noye aqhi kuthu oghumi launo povenikeo, ikeo atsala kuthu kutolo oghakhulo pusa kusu lhoksa ipeghi penikya? Tighenguno itehi hipano kuthu khikhiu lunishi anikeno tsaqui kumsujuno ivilo pilo AMPEU vilo pithinike ghenguno khochilelo.”

¹⁴David no khochile pi, “Niye ighono aveksa dolo ngovae! Ikemu niye timi pelono aghime itsu penishi amoe. Tighenguno AMPEU pelouno ningu ghimekeu shipelo, kughengu paye kupukiniuke.”

¹⁵Tileno AMPEU no pusa pesu Israilmi shou puwuvetsu, tiye inaqhe lono huthu susu pano kotha puakeu suchedo kutolo, aghakhu cheku halauno wo acheku halau kutolo Israilmi 70,000 kutolo thive.

¹⁶Kughou AMPEU wu kungumino Jerusalem ghi shipsave tsuniye kuto akelono AMPEU no timiqo ghimeqhi akeu lono pa mlo kiliveno kungumi panongu heqhi pithi akeu vilo ishi pive, “Tavelo! Ti kughomae!” Tile kungumi huye Arauna, Jebusimi niqalo ngoveke.

¹⁷David no kungumi khuno timiqo heqhi pithi akeno tipau ithulu puzu AMPEU vilo pi, “Kuquvekeu inoke, mla itha pimivekeu huye nike. Ikemu timi hipaqoye kiu shivetsu kya? Noye ni eno isholokumiqou ghime masake.”

¹⁸Tipa tsalanino Gad no David lau wupuzu pa vilo pi, “Wuno Arauna niqalo AMPEU kumlla kiptia lakhi shilo.”

¹⁹David no AMPEU zahkutsu aghokulu shi eno Gad no pa vilo shilo piketoi mlavetsu.

²⁰Arauna no pishipiqi Akukau ngo pa qholo kijemiqo pa kudau iqhocheghi keu ithulu. Tileno pano David zulo itsaqi no

²¹ishi iniju, “Akijeu, noye kushiye hilau cheni kya?” David no khochile, “Oniqa qhuluveno AMPEU lau akumlla kiptia lakhi hilehi mlanishi ani, tishikeu lono hi pusa ighi akeu lakhavenike.”

²²Arauna no pi, “Lulo, akijeu! Nono kumsu aketoi ikhiphe pesu AMPEU mllalo. Amshitsu ghi hile ani ike akumlla kiptialo beno piti kumllakeu shilulo, panongu kuokhasu ghi ani eno athi munuqhi chekeu takta ghi anike tipau pesuno ikhisughu kepu su shilo.”

²³Arauna no kumtsu ikhipesu akukau tsuveno pa vilo pi, “AMPEU oLhou pelono okumllagho hipau ikhilu tsu peniu.”

²⁴Ikemu akukauno khochile, “Tishimoe, thime hipaqo kumtsu me ino olochileni. Niye kumsa loye kiumu pesu AMPEU iLhou lau aghakishi kumlla ye tsukeu shimo nani.” Tileno pano aniqa hu qhuluve eno amshitsu atuna ghenguno tsandiyi lhopungu pesu tsu.

²⁵Tishivekethiu pano AMPEU kumlla kiptia lakhi ghepukulu eno piti mllakeu gho eno kuposhukeu kumllagho shipesu AMPEU tsulu. AMPEU no pa kighini khochiletsu ipuzu Israil lo pusa hu lakhavestu.