Read Sumi Naga SAMUEL AKINIU 3 Bible Online

SAMUEL AKINIU 3 - Sumi Naga bible

SAMUEL AKINIU 3

¹Saul lagha kuphukemi loji ngo David sakuphumi ado kushuwa dolo kichighi kumjoche. David ye akumto shikithe wove ikemu pa hekibidemiye miqemileyi kithe wove.

²David no Hebron lo acheke lono anuli hipaqo kupasu ithulu: Ammun, pa zaye Jezril lono ighikeu Ahinoam ke;

³Khileab, paza jeno Abigail ke, liye Karmel lono ighikeu Nabal nipu huke; Absalom paza jeno Maaka, liye Geshur lo akeu Talmai akukau ngake;

⁴Adonija, paza jeno Haggit ke; Shefatiya, paza jeno Abital ke;

⁵Ithream, paza jeno Egla ke. Anuli hipaqo kumtsu Hebron lo acheke lono punukeuke.

⁶David wu ghushimi ngo Saul laghami sakuphumi dolo tamono aghu shikibe che, Abner no Saul papemi dolo akumtou alaushi kithe ipeghilu.

⁷Ghulo lakhi Saul nu Ishboshet no Abner no Saul nipu amshiu Aiah nonga Rizpa sazukeu nguku.

⁸Tipau ghenguno Abner ye ighono pa mlo ideve eno ishi pithuve: “Niye Saul jechuve ani ghashi noye ikumsu pusa ani kesha? Niye Juda qeuvea kughashi noye kuchouno kumsu anike sha? Niye inahuu no Saul ngo pa thikuzumi eno pa shounoqo ghenguno puthugho keu ishikutolo phemphie, David no otheqhive niye shikeu ino lakha pesu ngotsu ani; ikemu le noye ishiye totimi lakhi kugha pesu ikipimi shitsu anike sha?

⁹AMPEU no David lau piqhi puaketoi Saul kukaphu eno pa lagha kumtsu pesu David tsuveno pano Israil eno Juda yeghi kumtsulo, aghakhu cheku ashekha lono ashekha kutolo akukau shiluve peni. Hipau shikupumo aye Alhou no iheqhi pithive peni!”

¹¹Ishboshet ye Abner ju ighono msa sheveno paye atsa lothi lakhimu pimove.

¹²Tile Abner no asutsa lakhi Hebron lo David lau inijupuwu, “Khuuno hipa ghakhu shou ayehpeni cheni kya? Isasu kughakutha shi aye ino pa kuphu tsuno pa pelono Israilmi kumtsu shou toluveno pa kudau suluve penie.”

¹³David no khochile “Alo, tishi aye ino thime lakhi lono osasu kughakutha shini: nono kughouno iputsa ighini keno Saul nga Mikhal sasu ilau ighilo.”

¹⁴David no aghinimi hapesu Ishboshet lau ishi piwupe, “Inipu Mikhal itsuchilevelo. Kughengu ino li sa aniyeno aphighu yiko ghamo kemi Filistiyami 100 kuxu pukapuani.”

¹⁵Tighenguno Ishboshet no Mikhal kimi Paltiel khuu Lais nukeno pa launo li sasu wuve.

¹⁶Ikehu Paltiel ye li papesu Bahurim taun kutolo qa ghi wue. Ikemu kughou Abner no pa vilo “akilo idewovelo” pikeno paye idewove.

¹⁷Abner no Israil sakiphetomi lau wuno panongu vilo pi, “Nonguye ado kushuwa lono David pelono nongu kukau shipenishi ae.

¹⁸Tishiaye ishino ado kivi nongu tsu ani. AMPEU no kiu pikeno hi kumsululo, ‘Ino iqeu David peitha keu lono iwu timi Israilmi Filistiyami u lono eno aghumi kutami launo panongu xaphelu nani.’

¹⁹Abner no Benjamin laghami vilo ghi pive eno tishino paye David vilo Benjamin lagha ngo Israilmino kiu puloluno xakutha shilu keno tipau pithi nike ghenguno Hebron lo wuve.”

²⁰Kughou Abner no pa gholo timi muku sasu Hebron lo David lau ighikeno, David no panongu ghenguno aghulhu lakhi kutotsu.

²¹Abner no David vilo pi, “Ino itehi wuno Israilmi kumtsu zupesu okudau suvetsuni. Panonguno opelo akukau ipi oikhilu nani, tishi aye nono kiu lunishi anikeno tipau shilu nani eno nono aghakhu kuchopu shou ayehpeluve nani.” David no sukusho pesu Abner tsuno pa lalo phepuwove.

²²Tipathiu kushuwa kumolo Joab ngo David qholo kijemi kutami aghushi lono anhemgha kutomo panongu gholono hakho sughilu. Abner ye tipa ghulokilo Hebron lo David gholo ngomono cheve, kughengu David no sukusho pa tsukeu qholono pa phepuwove.

²³Kughou Joab ngo paw timiqo ighikeno Abner no akukau David lau ighino sukusho qholono phepuwovae pikeu Joab pithi.

²⁴Tighenguno Joab no akukau lau ighino pa vilo pi, “Noye kiu mlave akya? Abner ye olau ighie pie! Tishiaye noye kushiye pa phepupove kya?

²⁵Pano hile ighikeuye opishiqhi niye ighie eno nono kiu shi ani eno khilau iqho iqi anikeno tipaqo pujunike ighie. Mutsuqheyino noye ti ithikepu shiae!”

²⁶David pheve kethiu, Joab no aghinimi hapesu Abner phuwupe eno kuchono panonguno Sira zukikhe lono pa haluno sachile sughilu; ikemu David ye tipau ghili kumu mthano ae.

²⁷Kughou Abner no Hebron lo ighilu keno Joab no khagho lono pa vilo kiwana tuqhou tsa pinike toi pa kupunu susu ighino tipa alono apo lono pa jiqhi pithive. Hitoi shi no Abner heqhi pithive kughengu pano Joab thikuzuu Asahel heqhi pithi puakehu.

²⁸Kughou David no tipau sutsa chilu keno, pano pi, “AMPEU no ithi anike ni eno iwu timiqoye Abner kithi hipaulo kumu chhosu puamoe.

²⁹Tighenguno hipau ngusu ye Joab eno pa kibolomi shou ikughi peniu! Tiqheli kumtsulo pa laghami gholo timi khami aphighu lo akusu ipeghi peniu momu apugha piyi pupeniu momu totimi kumlapu likhi mlalupeniu momu aghushiqa lono yivepeniu momu chukepu lukumkha shipemoniu!”

³⁰Ikehu Joab ngo pa thikuzuu Abishai pamano pama thikuzuu Asahel khuu Gibeon ghushiqa lono Abner no ghiqhi pithive tsu keno Abner shou amkhu luvetsu.

³¹David no Joab ngo pawu timiqo vilo panongu phi suxu velopi ahza tsu, eno yeqhiye phi uno Abner ghenguno mloqa lo pi. Akumo qhowunikelo Akukau David no akumo thiu shino alache.

³²Abner ye Hebron lo qhove, akukauno akumoa lono ighamuku qa, ike timi kumtsu qau khave.

³³David no Abner ghenguno mloqa keu le ishi phe: “Kushiye Abner ye tumhotuzu toi thive kya?

³⁴Pa-uye tshupe puamoe, Pa pukhu qoye tsughape puamoe; Paye lhoksakughami kithi toi shi khualano pa pithivae Eno timiqono itaghi pa ghenguno mloqa.”

³⁵Atsala kupuju timi qono David pelo kiuala chupeni ke pukaputsae, ikemu pano ishi ashoqhi shi, “Atsala ilomphi lono ino kiuala chuve aye Alhou pelo iheqhi pithive peni!”

³⁶Panonguno hipau tsa qhiluve eno gihue. Kuchono akukauno kiu shikeno timiqono gihue.

³⁷David wu timiqo eno Israilmi kumtsuno akukauye Abner ghiqhive keulo chhosupe puamokeu ithive.

³⁸Akukauno pawu kijemi vilo pi, “Nonguye ishi tsala hipauye Israil lo sakiphetou thive keu tsala kepi kumsulu amokesha?

³⁹Niye akukau shipeni ke Alhou no nukisheke, ikemu ishitsalalo niye miqemileyi ketoivae. Zeruia nuliqono ighono igha shikighide vetsuae. AMPEU pelo khuno hikithipu kumla shive keno tipau ghime panongu shou puwutsu peniu!”