Read Sumi Naga SAMUEL AKINIU 4 Bible Online

SAMUEL AKINIU 4 - Sumi Naga bible

SAMUEL AKINIU 4

¹Kughou Saul nu Ishboshet no Abner ye Hebron lono heqhi pithivae pikeu chilu keno paye ighono msave eno Israilmi kumtsu amlo susu shive.

²Ishboshet ye kijemi kini aghuleu nikelo atou Bana ngo Rekhab pama ache eno pamaye Rimon nuke eno Benjamin lagha Berot lono ighikemike. (Berot ye Benjamin lagha ipi kihiluvi.

³Inahuu tile kughuna kuamiye Gitaim lo poveno tilau acheuvekemi shiveke.)

⁴Saul lagha lono ikowokemi Jonathan nu Mefiboshet ache, Saul ngo Jonathan pama heqhiveke ghulokilo paye apunu mpe pungu shi ae. Pama kithi ghili Jezril phughi lono asutsa ighikeu chiluke mtsa pa tuchomujo chekeu no khapesu poluke; ikemu ighono mighimghai posu cheke lauye pa pheqhiveno paye aphiau kighichemi shive.

⁵Ishboshet no puchou kulho kiqhi do lu akelo Rekhab ngo Bana pamano pa kilo puchouno ighilu.

⁶Totimi ahukikha lo ashothi ijoghi ngo akeuye inguano zuhuve kelono Rekhab ngo Bana pamano mkhano sholokuu ilove.

⁷Paikhavi lono pamano Ishboshet zuabolo ilove, khile paye chei zuakeno eno pa zua lono pa heqhi pithive. Tishino pamano pa kutsu michetha pesu wuve eno tipaji kupuju Jordan khila basu cheve.

⁸Pamano akutsu pesu Hebron lo ighino akukau David agho tsu eno pa vilo hitoi pi, “Hiye Ishboshet kutsuke, paye oghumi shichekeu Saul nuke, khuu oheqhiveniye pukaputsa chekeno. Ishino AMPEU no ni kijeu pelono Saul eno pa lagha shou amkhu lupeniye ado kophetsuke.”

⁹David no pama khochile, “Ino xukuau AMPEU je lono tushoqhi ani, khuuno akumsapu lono ixaphelu tsu kya?

¹⁰Ziklag lono aghini kishimi lakhi ilau ighino Saul kithi ghili ivilo pie, paye sutsa kivi sughi ani ghashi kumsu ae. Ikemu ino pa tsuquluno pa pithive penikeu shive. Ike ti huno pa sutsa kithe sughi keu jume ino pa tsuke.

¹¹Tishi aye kumu mthakeu amikuchomi lakhino pa kilo azualo zu ake lono yive keuye tiye timi lhoksami kuchoue! Tighenguno ino nokujo shou amkhu luniae, nokujono Ishboshet yiveke ghenguno ayeghi shou nokujo pelo xu apemlae!”

¹²David no tishi no ahza tsuve eno paw ghushimi no Rekhab ngo Bana pama u eno apukhu michepeve tsuno Hebron lo azukhe phivilo pufuqhi vetsu. Ikemu panonguno Ishboshet kutsuye suwo Hebron lo Abner kumo phivilo shiqhovetsu.