Read Sumi Naga SAMUEL AKINIU 5 Bible Online

SAMUEL AKINIU 5 - Sumi Naga bible

SAMUEL AKINIU 5

¹Tipathiu Israil lo ashiayeh kumtsu no Hebron lo David lau wuno pa vilo pi, “Ninguye osholokumi olaghami ke.

²Wovekeu lo Saul no ningu kukau shi akelo ghi nono Israilmi ghushiqa lo saphe tsue eno AMPEU no nono pawu timiqo saphe eno panongu shou ayehkipeu shipeni keu olau tushoqhi tsue.”

³Tighenguno Israil lo kukami kumtsu Hebron lo akukau David lau ighi. Pano panoqo sasu tuqhou kutshukime anikeu shive, panonguno pa kishephelu, ikehu paye Israil lo akukau shiluve.

⁴David ye apunu mpe shighi shi akelono akukau shiluve eno paye ampe lhobidi ayeh pelu.

⁵Paye Hebron lo ngono Juda ghakhu shou ampe tsunino tuxa ayeh pelu eno Jerusalem lo ngono Israilmi kumtsu shou eno Juda ghakhu shou ampe shighi kuthu ayeh pelu.

⁶Akukau David eno pawu timiqono Jerusalem lekepu do ighive. Tipa ghulokilo Jebusimi khunoqo tile akeno panonguno kumsukeuno David ye khilemu aphughi tipau leluve nani pi kumsumono ae, ikehu panonguno pa vilo pi, “Noye khilemu hilehi iloghimlae; anhethi kighichemi aphiau kighichemi nomu ohaphe puwuluve nani.”

⁷(Ikemu David no ighino panongu Zion tupikiye levetsu ikehu tinguno tilauye “David Phughi” ipi aje kuluve.)

⁸Tipa tsalani David no pawu timiqo vilo pi, “Ino jukuchhube aketoi nongu gholo Jebusimi jupe kuchhube kemi ani keo kuha kya? Tishi aye azula zusu iqhono anhethi kighichemi eno aphiau kighichemiqo le thulo.” (Hi ghenguno ishi picheni, “Anhethi kighichemi eno aphi au kighichemi ye AMPEU kilo ilomlae.”)

⁹Atupikiye eno aqoboqo leve kethiu David no tile ngoluve eno tipau je pesu “David Phughi” ipi kuluve. Pano tipau homxa aphughi shisuluve, atoghi tsukinhe kipelau yeghi hokulaqano tipa alono huthu susu aki shisuwo aphughi shiluve.

¹⁰David ye kumtsu mtotoi kije shikithe woluve kughengu AMPEU Alhou Akughushuu no pa gholo ake.

¹¹Tileno Tur lo akukau Hiram no lhidi shini keu David lau pithi puwu; pano kedar takta gholono asu kiyiqimi eno atu kiyiqimi ishi puwutsuno akukaki shipeni keu shi.

¹²Ikehu David ye AMPEU no pa pelo Israilmi shou akukau shipenike eno paw timiqo ghenguno pa kukaphu ye nibonileyi shitsu nani pikeu vetha luve.

¹³Hebron lono Jerusalem lo ighiluve kethiu David ye anipu eno amishiu kutomo sa auve, ikehu paye anuli kiptimi totimi kutomo ithulu.

¹⁴Jerusalem lo ighive kethiu anuli hipaqo ithulu: Shamua, Shobab, Nathan, Solomon,

¹⁵Ibhar, Elishua, Nefeg, Jafia,

¹⁶Elishama, Eliada eno Elifelet.

¹⁷David no Israilmi shou akukau shivae pikeu Filistiyami vilo pithive, ike panonguno ghushimi puwuno pa kugha saghi peniye shi. Kughou tipau tsa chilukeno David ye puwutha puakeu bocholo iqino tile ngove.

¹⁸Filistiyamino Refayim khilalo ighino tipau pukhaluve.

¹⁹David no AMPEU vilo iniju. “Tsala ino Filistiyami le aye noye tokulu itsunima?” AMPEU no khochile, “Iyei, panongu lelo, ino tokulu otsu nani.”

²⁰Tighenguno David no Baal Perazim lo wuno tipa a lono Filistiyami shou toluve. Pano pi “Azukuqo ighikeshi AMPEU no ighumi kuboleve tsua.” Ikehu a-a tipau pesu Baal Perazim tipau kiqiye “kubolevetsu keu mpiu”

²¹Kughou Filistiyamino povekeno panonguye asu atu lhou panongu thiu qhiveno cheve ikehu David ngo pawu timiqono tipaqo pesu wuve.

²²Tishino Filistiyamino Refayim khilalo ide ighino tipaulo ngoluvetsu.

²³Itaghi David no AMPEU vilo iniju kelo hitoi khochiletsu, “Hilehiye panongu lekevilo, ikemu alaghi kutau, Balsam suboqo phivi lono panongu botha luveno lelo.

²⁴Kughou nonguno asubo tsuqauno ala che chekeu sutsa chiluni keno tithiuno panongu lelo kughengu tipau kiqiye ino nongu zuu shino Filistiyami theqhiluve penike checheae pi ithilo.”

²⁵AMPEU no kiu shilepu ahza tsukeno tipau kiqi lono David no mla eno tishi keu lono Filistiyami Geba lono hachile susu Gezer lo kuwula kutolo hale puwuve.