Read Sumi Naga SAMUEL AKINIU 6 Bible Online

SAMUEL AKINIU 6 - Sumi Naga bible

SAMUEL AKINIU 6

¹Itaghi David no Israil yeghilo ghushimi kivimi likhi 30,000 hekutsulu,

²eno panongu sasu Juda yeghi Baala lo sawu, Alhou wu Puloshoqhi Bohu tileno sughinike ghenguno, tipau shou AMPEU Akughushuu je yepua eno pa kuka lakhuye kerubim shou ake.

³Panonguno tipau atolo Abinadab ki lono ikhipheluno pesu mishikulu akithelo ikhisu.

⁴Abinadab nu Uza ngo Ahio pama no mishikulu lo kichetsughi sawu.

⁵David ngo Israilmi kumtsu panongu he-agho kumtsu AMPEU agigihu tsu ghi ilhe alephe. Panonguno aheo, akighi lebo, bombom, ququpu eno amquyi kugha hekeu hipaqo pesu peitha.

⁶Panonguno chesu wo Nakon lo athi fulechekeu a tolukelo amshitsu kuma apukhu pusulu eno Uza no ilhewo Puloshoqhi Bohu mutulu.

⁷Paikhavi lono AMPEU Alhou ye Uza lau amlo ideveno pa heqhi pithive kughengu pano jukutokughoi moke ghenguno Uza ye Puloshoqhi Bohu phivi lono thive,

⁸ikehu tipau a pesu athiuye Perez Uza ipi ku cheuve. David ghi ighono agha ideve kughengu AMPEU no amlo kighide lono Uza pithive kehu.

⁹Tishino David ye AMPEU msaveno pi, “Niye kishino Puloshoqhi Bohu igholo suwo lunikya?”

¹⁰Tileno paye Jerusalem lo pa gholo tipau pesu wonikeu shimoveno alaghi xakide susu Gat phughi lo Obed Edom kilo puwove nikeu shive.

¹¹A-a tipaulo aqhi kuthu ngove eno AMPEU no Obed Edom kibolomi kumghatsu.

¹²AMPEU no Obed Edom kibolomi Puloshoqhi Bohu ghenguno kumgha tsuakeu ghili akukau David no chiluve; ikehu pa ghi ighono ahukulu kije lono Puloshoqhi Bohu Obed kilono ikhipheluveno Jerusalem lo sughinikeu shi.

¹³Puloshoqhi Bohu kipemino apukhu kughuka tsugho cheve kethiuno David no panongu lakhano amshitsu lakhi athapubeyi keu amshiti lakhi ishi aghakishi kumlla shipesu AMPEU lau tsu.

¹⁴David no akuuphi no achita khapuveno AMPEU gihuniye pa kuka kumto kumtsu ikhiphe ilhe.

¹⁵Hitoi shino pa eno Israilmi kumtsuno Puloshoqhi Bohu pesu alokivishi asheshu eno afuko igha susu Jerusalem lo pe ighilu.

¹⁶Abohu pesu aphughilo iloghi kemtsa Saul nga Mikhal no alashe lono pishipipe jukeloye akukau David ghi ilhe kakai kungu ilhe-ikughi ti akimthe kighilhe shi aghikeu ithuluno liye paju aphimqhuve.

¹⁷Panonguno Abohu pesu ighino aphiki David no shipe puakeu lo pa-a lo qhive. Tishino pano aghakishi ngo kuposhukulu kumlla pesu AMPEU lau tsulu.

¹⁸Kughou pano aghakishi kumlla shitave keno pano AMPEU Akughushu je lono timiqo kumghatsu,

¹⁹eno achuqupu pesu timi kumtsu kije tsulu. Pano Israil lo kiptimi totimi kumtsu lau ashopa lakhi khi eno ashi kusave keu aleqhi lakhi khi pesu kijetsulu, eno atsayithi akipki ghi tipau gholo suno tsulu. Tishive kethiu kumtsuno pututa kilo wokhave.

²⁰Tipathiu David ye pa kibolomi kushoniye ighikelo Mikhal no ipeghino pa sasu kusholu. Li no pi,”Israil kukauye ishi pa likhi pa kugha pesu aje kije shivae! pa qholo akemi aqelimi zulono pa ghuzunikha pephe piyevae!”

²¹David no khochile, “Niye AMPEU akishe tsunike ghenguno ilhe ae, pano opu eno pa lagha zuqhulo ikisheluve, ipelono pawu timi Israilmi sakipheu shipenike ikishelue. Niye AMPEU agigihu tsu anike ghenguno ilhe ani aphie,

²²eno ilikhi ijukunatha keu alau shini aphie. Nono niye kumu kumoepi kumsu aghiluvie, ikemu ilimi hupaqoye akiqheu lono ikumsupivi ani!”

²³Saul nga Mikhal ye khilemu ati anuli kuhae.