Read Sumi Naga SAMUEL AKINIU 7 Bible Online

SAMUEL AKINIU 7 - Sumi Naga bible

SAMUEL AKINIU 7

¹Akukau David ye pa kuka kilo ngoluve eno AMPEU no pa ghumi kumtsu launo pa susho pesu ache.

²Tileno akukauno tungkupu Nathan vilo pi, “Niye kedar taktano shikeu kilo ngo ani, ikemu Alhou wu Puloshoqhi Bohu ye aphino shikeu kilo aphie!”

³Nathan no khochile, “Omlo lo kiu anikeno tipau kiqi lono kiu kiumu shilo, kughengu AMPEU no ogholo ani.”

⁴Ikemu tipaji AMPEU no Nathan vilo pi,

⁵“Wuno iqeu David vilo ino pa vilo piani pilo, ‘Ino ngokepu chineki ye pano shimo nanike pi pilo.

⁶Ino Ijipmi ulono Israilmi khaqhi phesughi keu lono ishi kutolo niye khilemu achineki lo ngo mphie; niye aphiki gholono iqho-iqi izuchephie.

⁷Niye Israilmi sasu izuche kedolo ino sakiphemi khuu vilomu kedar taktano shikeu chineki shitsulopi iniju mphie.’

⁸“Tighenguno iqeu David vilo ni AMPEU Akughushuu no pa vilo pi ani pilo, ‘Aluzalo bheri khechekeu lono ino pa ikhipheluno iwu timi Israilmi shou okughape ayekipeu shilue.

⁹Nono khile khile wumu niye ogholo chewue, nono khijehilo azuu hahu keno ti kumtsulo ino oghumi theqhi tsue. Ino okugha pesu ayeghiqhalo ighono ajekipimi sakiphetomi toi shitsu nani.

¹⁰Ino iwu timi Israilmi ghenguno a-a lakhi kisheluveno panongu pelo tipaulo ngolupe. Khipa alo khuunomu panongu ghimemono ngokulupu keno tipa alo. Panonguno hipa yeghilo iloghi kelo angukami axekusumino panongu le ache, ikemu itehiye hikithipu shimae. Nongu ghumi launo ino nongu susho luvenike tushoqhi ani eno alagha kughuko tsuni.

¹²Kughou nonguno thiveni keno eno nongu puasu gholo shiqhoveni keno, ino nongu nuli gholo lakhi pesu akukau shitsu nani eno pa pesu mtotoi qhitsu nani.

¹³Tipau huno ighenguno achineki shitsu nani eno pa lagha ye alhokuthulo ishokibe wopenike mutsumishei shitsu nani.

¹⁴Ino papu shinani eno pano inu shi nani. Kughou pano mlapimiveni keno apu lakhino panu aghime tsuke toi ino aghime pa tsu nani.

¹⁵Ikemu ino opelono akukau shiluve peniye Saul launo akuka ikhipe wuvetsuke toi niye ikukuphu pa launo ikhisuwuve tsumo nani.

¹⁶Noye alhokuthu alagha kughuko keu shilu anani eno ino okukaphu pesu alhokuthulo alupe nani. Olagha ye khilemu kishekhave keu shimo nani.’ ”

¹⁷Alhou no Nathan lau kiu piyesukeno kumtsu pesu David vilo pithitsu.

¹⁸Tishino akukau David no AMPEU kua Phikilo ilo iqano inikhu, “Akughushu AMPEU, nono ighenguno eno isholokumi ghenguno kiu mlatsu keno akuzupu kumoe.

¹⁹Ikeghi nono alaushi mlatsu ani, Akughushu MPEU; ighinikeu mpeqolo ilagha kughuko ghenguno ghi ashoqhi shipuave tsu ae. Nono timi lakhi pelo ti ithukulupu shi kutope qhivetsuae. Akughushu MPEU!

²⁰Tinguno alau niye ovilo kiu pikulupu kya? Ni oqeu, nono ni ithi ani.

²¹Hiye opulou eno hi shikeuye okimiji lonoke; nono thime kije hipaqo shi akeuye ikiche piyetsu akeuke.

²²Noye kiutoi kije kya? Akughushu MPEU otoi keu khuumu kuhae; ninguno alhokupuju lono olikhino Alhou kepi ithi acheni.

²³Ayeghiqhalo khuno shiayehmu Israilmi toike kuha. Owu timi shiniye nono aquaxe lono panongu khaqhipheluve. Nono panongu ghenguno kije eno akumzapu mlatsu keu huno ayeghiqha kumtsulo ojekipi kughakuchho wove. Nono shiyeh kutami eno panongu lhouqo owu timiqono ighikithishi halevetsu, Ijipmi kughu lono owu shiniye panongu khaqhiphevetsu.

²⁴Nono Israil pesu alhokupuju owu timi shiluve eno no AMPEU no panongu Lhou shiluve.

²⁵“Itehi, AMPEU Alhou, nono khikhi ighengu eno ilagha ghenguno ashoqhi shipuakeno ado kumtsulo shikuputsulo eno nono kiu shini pipuakeno ti shitsulo.

²⁶Ojekipiye kije shinani eno timiqono alhokupuju lo ishi piche nani, ‘AMPEU Akiqheuno Israil shou Alhou ke.’ Nono ilagha ado kumtsu ghenguno pukhalu tsu nani.

²⁷AMPEU Akiqheu, Israil Lhou! niye imlo kuloghi shi-ghi hipau olau inikhu anike, kughengu hipaqo kumtsu ni oqeu lau piyesutsue, nono ipolo kughuko pelono akukau shitsu nani pi ivilo pie.

²⁸“Itehi Akughushu AMPEU, noye Alhou ke; noye alhokuthu oshoqhi qhipu acheni, nono akumzapu shoqhi hipau ilau shie.

²⁹Ino ovilo ilaghaqo kumghatsulepi iniju ani, tishikeu lono panongu pelono ozuvuu shilu penike. No, Akughushu AMPEU, hipaqo shoqhi eno owu kukumgha alhokupuju lo ilagha shou ikughilupelo.”