Read Sumi Naga SAMUEL AKINIU 9 Bible Online

SAMUEL AKINIU 9 - Sumi Naga bible

SAMUEL AKINIU 9

¹Ghulo lakhilo David no ishi iniju “Saul kibolomi khuala anikeo kuha kya? Tsala aghi aye, Jonathan ghenguno ino pa lau kimiyekeu piyenishi ani.”

²Saul qemi bolomi lakhi paje Ziba ache, ike panonguno pa vilo David lau wulepi. Tileno akukauno iniju “Noye Ziba keshea?” Pano khochile, “Oghini shitsunike kutope ani, akijeu”

³Akukauno pa iniju, “Saul bolomi khuala anikeo kuha kya? Ino Alhou vilo tushoqhi puakeu kiqi lono pa lau kupu kimiye keu kumla pephe piyenike ghenguno.” Ziba no khochile pi, “Jonathan nu lakhi aphie. Paye apukhu kighichemi ke.”

⁴Akukauno iniju “Pa khilehi ani kya?” Ziba no khochile “Paye Lodebar lo Ammiyel nu Makhir kilo anie”

⁵Tighenguno akukau David no pa sasu ighilo pi hapuwu.

⁶Kuchono Mefiboshet khuu Jonathan nukeno eno Saul tilimi keno pano ighino sukumsa David tsukeu kiqi shi ghi pishiqho. David no pi “Nono Mefiboshet keshea?” Pano khochile, “Akijeu nike” ipi.

⁷David no pi, “Noye msa kevilo opu Jonathan ghenguno niye olau kikimiye piyenanike. Ino osu Saul yeghi thaqhuye otsu chileve nani eno noye alhokuthu igholo kumtsa aghulhu lupa lo ngolu nani.”

⁸Tileno Mefiboshet ye itaghi itsaqi kithe tsuno ishi pi, “Niye atsu kithi kumomu pavie, akijeu! Tighenguno noye kushiniye tishi ilau kimiyekeu shitsu anikya?”

⁹Akukauno Saul qeu Ziba kuno pi, “Saul eno pa kibolomi tinhemgha kumtsu ikhichile pesu ompiu tilimi Mefiboshet tsuve ani.

¹⁰No, onuli eno oqemino ompiu Saul kibolomi ghenguno alu chichulu nani, panongu ghenguno ghile huno achuqupu panongu tsukepushi nani. Ikemu Mefiboshet ye alhokuthu ighulhu lupa lo ngono chulu nani.” (Ziba ye anuli chighi pungu eno aqemi muku ishi acheke).

¹¹Ziba no khochile, “Akijeuno kiu shilepi anikeno ino tipaqo kumtsu shitsuni.” Tinguno tilauye Mefiboshet ye David ghulhu lupalo akukau nu lakhi kiqi lono ngono ilhu cheuve.

¹²Mefiboshet ye anu lhothe lakhi Mika ipikeu ache. Ziba kibolomi kumtsu kuqhano Mefiboshet qemi shiluve.

¹³Mefiboshet ye apukhu kinikujo ichevemu Jerusalem lo akukau gholo ngono kumtsa aghulhu lupa lakhi lono chucheuve.