Read Sumi Naga KUKAMI ATUGHIU 10 Bible Online

KUKAMI ATUGHIU 10 - Sumi Naga bible

KUKAMI ATUGHIU 10

¹Kughou Sheba lo kukaliu no Solomon jekipi eno pano AMPEU sasu kuposhu akeu chilu keno lino ighono kushokutsu inijukeu pesu pa pejuniye ighi.

²Li gholo aqemi kemel lono axo vekutsungu keu ngo shuna kutomo eno akughuputu ishi xapu Jerusalem lo ighi, lino Solomon sholukelo lino amlolo puchekeu kumtsu pesu inijuthuve.

³Pano tipaqo kumtsu kumu kushokutsu shimono mlalei khochile khavetsu.

⁴Sheba lo Kukaliu no Solomon lokutsu chilu eno pano akukaki shikeu ghi ithulu.

⁵Liye aghulhu lupalo achuqupu qhitsukeu jeli, pa qholo kijemiki, akukau kilo kuamiqo kithikiyi pesu akeu, panongu phimini pepusu akeu, aqemino aghulhulo pa loji ngokhe akeu eno Akumllaki lo aghakishi kumlla tsukeu kumtsu ithulu. Ikeloye liye akichiqhi kelauno atuthu thotsu kuhave ketoive.

⁶Lino akukau Solomon vilo pi, “Ino nighakhu lono oghili eno olokutsu ghili timino kugha cheghi keu chikulu kumtsu kuchou kepi ithivae!

⁷Ikemu ino ighino inhethino ithulumono ake kutolo niye pulumlano ae. Ikemu kuchouno pinikeloye timiye tuxatsamu pipuamoe, okinikulu ye ivilo pithi keu nguno alau anie.

⁸Owu timiqoye[1] kiutoi alovi aghi nani kya? Oqemi ogholo alhokuthu ngono olokutsu tsaqo chikulumiye kiutoi akumghapu kya?

⁹AMPEU oLhou shelo! Paye opesu Israilmi kukau shikulu ghenguno olau pa lokiqi akeu piye tsu ani. Kughengu pawu kikimiye Israilmi ghenguye tishikeu lono ayezah eno achipiu peithalu penike ghengunoke.”

¹⁰Tishieno lino sughikeu agho pesu akukau Solomon tsu: tiye shuna kilogram 4000 shou, axokutsungu kutomo eno achiku ishike. Lino axokutsungu pa tsukeuye puzuu ithulu chekeu nguno akiqheu ke.

¹¹(Hiram wu zukilu pesu Ofir lono sughikeu shuna gholo juniper suno shikeu kutomo eno achikula ishi sughilu.

¹²Solomon no tipaqo su pesuno akumllaki eno kukakilo akuputusu shisulu eno alekiphemi ghenguno akighi kipili lebo ishi mlaphetsu. Tiye juniper su ighono aghile kuchou inami yeghi lono Israil lo tsupuwu keuke; hitoi keu khilemu itehiye ithulumavae.)

¹³Akukau Solomon ghi Sheba lo kukaliu no khukeu kumtsu tsu, tinguno alaughi pano akhuayeh kiqi lono agho kutomo pesu li tsu. Tipathiu li eno li qemiqo Sheba yeghilo idewove.

¹⁴Ampe atsutsulo Solomon ye shuna kilogram 23,000 ithuluche,

¹⁵tipau gholo alhikishimiqono zahme alhi shikelono alla shilukeu ghi tsuche, Arabiami kukami eno Israil yeghilo state ahng qoghi zahme pa tsuche.

¹⁶Solomon no azuto kijeje kini mlae, azuto lakhi khilo shuna kilogram tsuni suno mla.

¹⁷Tipa kimihi lono azuto aghulolo 300 mla eno ti azuto lakhi khilo shuna kilogram kinini suno mlae. Azuto hipaqo kumtsu Libanon Ghasu Chebo ipi kuche keulo pufupe qhikhae.

¹⁸Pano akuka lakhu kije lakhi ghi mlape qhie. Tiye akuhahu ngo thakimtheve keu shunazu no ashou phuphushi ithulughi mlape qhie.

¹⁹Akuka lakhu tipauye kupka tsugho ae, eno ti alakhu zupouye amshitsu kutsu julho shisupe qhie. Alakhu putoputolo au bepe ngokepushi mla, eno abongushu julho shisukeuno hula hila ghope qhie.

²⁰Abongushu chighikini akupka tsugho lo qhi, ti akupka lakhi khilo abongushu ajeu piyiu ghope qhie. Hitoi keu khuuno kukaphu lomu mlape qhikeu kuhae.

²¹Solomon jukhuqo kumtsu shuna no mlae eno Libanon Ghasu Chebo lo qhikeu akhu ajukhu ye kumtsu shuna kuchouno mlakeu likhie. Tsandiyino shikeu nhemgha lakhimu qhimoe kughengu Solomon ghulokiloye tiye ame kuha ke.

²²Pano zukilu azughilo Hiram zukilu gholo chewu kuqhalu kepu ghi ae. Ampe akuthuku loye pa zukilu shuna, tsandiyi, akuhahu ammutu, eno ashuki ishi xapusu ighiche.

²³Akukau Solomon ye kukami kumtsu nguno kinikuluu eno alokutsuu,

²⁴ikehu ayeghiqha kumtsu lono ighino Alhou no pa tsukeu lokutsu ghili iniju anishiche.

²⁵Pa lau ighikemi kumtsuno agho pesu ighino pa tsuche-tiye tsandiyi, shuna, chijeboboi keu phi, aghunanu, vekutsungu keu, khurshiqo, akhokupu khurshi. Hitoi ampe ishokive pa tsucheke.

²⁶Solomon ye khurkulu kusami 1,400 ache, khurshi ghushimi 12,000 ishi ache. Tipaqo hamiye pano Jerusalem lo qhi eno tinguno alauye a-a kututa lo aphughilo qhikhae.

²⁷Pa kuka ghulokilo Jerusalem lo tsandiyi ye atu toi balha eno kedar suboye mububo toi kumzapushi ithuluche.

²⁸Solomon wu khurshiqoye Ijip eno Kilikia yeghi lono sughiche.

²⁹Khurkulu ye Ijip lono sughiche, tipaqoye tsandiyi kilogram tsuni kiqi lono kiliche eno khurshi no tsandiyi kilogram lakhi eno gram tsuni toi keu kiqi lono qhuluche. Hitoi Hatimi ngo Siriyami kukami laughi puwu cheke.