Read Sumi Naga KUKAMI ATUGHIU 11 Bible Online

KUKAMI ATUGHIU 11 - Sumi Naga bible

KUKAMI ATUGHIU 11

¹Solomon no inalimi kutomo kimiyeche. Ijip lo akukau nga nguno alaughi paye Hatilimi, Muablimi, Ammun, Edom eno Sidon hipaqo lono ighikemi sasu kulakupu shike.

²Israilmiye alhou kutauqo lau panongu mlo tsuuve nosake ghenguno AMPEU no Israilmi ye shiyeh kutami sasu khilemu kulakupu shikevilo pi ahza tsukeu ithi pulaghi shive.

³Solomon no kukalimi 700 sasu kulakupu shi eno alojilimino 300 ishi acheke. Panonguno pa pelo Alhou launo pokauvepeke

⁴pano muchomi shiwuve keuloye pa pelono inami lhou mlauvepeke. Paye pa Lhou AMPEU lau papu David toimoveno amikucho shimoveke.

⁵Paye Sidonmi lhou liu Astarti eno aphi kumqhupu Ammunmi lhou Milkom ishi mllauve.

⁶Papu David toimono paye AMPEU kimithi xine shiveno pa lau amikucho shimove.

⁷Jerusalem lono kipelau ato lakhilo Muabmino mllachekeu aphi kumqhupu lhou Khemos mllape nikeu a shitsu eno Ammunmino mlla chekeu lhou Milkom aghuthi kusupu mlla penikeu-a ghi kutotsu.

⁸Pa nipu inalimi pelo aghakishi eno piti kumna ghi pututa lhou mlla penike-a ghi kutotsu.

⁹Israilmi Lhou AMPEU khuuno ghuthu kini pa zulo ipeghi piyekeno pa launo tsughususu wuveke ghenguno AMPEU ye Solomon shou amlo ideve.

¹⁰Pano Solomon pelo kutami lhouqo pape wuvepemo nike lakha anamu Solomon no AMPEU zahkutsu lumove.

¹¹Tighenguno AMPEU no Solomon vilo ishi pi, “Kughengu nono puthaputsano owu puloshoqhi isasu shipuakeu kubove eno izahkutsuqo hebidevea. Ino akukaphu olauno ikhisuwuve tsunia eno hipau pesuno oqholo kijemi lakhi tsuveniae.

¹²Opu David ghenguno okuxuloye niye hipau shitsumoe ikemu onuno ka ake ghuloki lono shi nani.

¹³Niye okukaphu kumtsu pa launo suwuvemo nani; ikemu iqeu David eno Jerusalem phughi ino iwu shi kishelukeno tikuma ghenguno ashiayeh lakhiye pa lau qhitsu nani.”

¹⁴Ike AMPEU no Edom kije lagha lono ighikeu Hadad xukuthono pa pelono Solomon mithi thuvepe.

¹⁵Khaghi David no Edommi sasu aghushi chekelo ghushimi shou akijeu, Joab no Edom lo kiptimi thaqhu heqhive tsuno akumo qhovetsu.

¹⁶Joab ngo Israilmi kumtsu Edom lo kiptimi heqhi khamoke kutolo aqhi tsugho Edom lo ngoke.

¹⁷Ikemu tipa ghulokilo Hadad ye itimi shia eno paye Edommi khunoqo papu qholo mlachekeno tipaqo khami sasu Ijip lo pokalu.

¹⁸Panonguye Midia kudauno ipeghiluno posu Paran lo ighilue. Tishino Paran lono timi khami panongu gholo sukuqhalu no kumtsa Ijip lo poighilu, tile Ijip lo akukau Farao no Hadad aki-alu eno achuqupu ishi tsulu.

¹⁹Hadad no akukau mlo chuluno pa sasu ashou shilu ikehu akukauno pa nipu tsunipu kukaliu Tahpeni pesu pa kilo kulapuwo tsulu.

²⁰Ike lino anu lakhi punu eno paje Genubat kutsu, paye akukau nuliqo gholono sapheputhulu eno kumtsa xu ipeghikemi shilu.

²¹Kughou Hadad no Ijip lo akelono David eno pawu ghushimi shou akijeu shichekeu Joab pama thivae ipi chilukeno Hadad no akukau vilo pi, “Ipelo niyeghilo idechile wolupelo.”

²²“Kushiye kya?” ipi akukauno iniju. “Kiwala niye otsu kumsumavekeu ani kesha? Tipau ghenguno noye noyeghilo ide wovenipi ani kesha?” “Tishimoe, qeti ipelo wove pelo” ipi Hadad no akukau khochile. Tishino paye pano ghakhulo ide wove. Hadad ye Edom kukauke, paye Israilmi ghumi kuchou eno alhoksauke.

²³Alhou no Eliada nu Rezon ghi xukuthono Solomon mithi thuvepe. Rezon ye pa mpiu Zoba lo akeu akukau Hadadezer launo povekemike,

²⁴paye athiuye hekibidemiqo shou saphetou shiluve. (Hiye David no Hadadezer eno pa gholo su akemi Siriyami theqhi luve kethiunoke.) Rezon ngo pawu timiqoye Damaska lo wuno tile ache eno pawu timino pa pesu Siriya kukau shitsu.

²⁵Solomon kuxu tivilo paye Israilmi ghumi lakhi shi acheke.

²⁶Kutami lakhi akukau Solomon mithi ithughipe keuye pa qholo kijemi lakhi Nebat nu Jeroboam, Efraim lo akeu Jereda lono ighikemike. Pa zaye achimeu Zerua ke.

²⁷Hitoi shi hebide ipeghike. Solomon no Jerusalem kipela kudau ayeghi pusuae eno aphughi homxa atupi yekithea.

²⁸Jeroboam ye ighono shitsami apumi lakhi shiae eno Solomon no pa kumla kuka ithuluno, pa pelo Manase eno Efraim lagha lono ighikeqo akumla kishimi shou ampi shitsu apeke.

²⁹Ghulo lakhi Jeroboam no Jerusalem lo izuwu cheke lo tungkupuu Ahija ye Shilo lono wocheghino pa sasu alaghi lono kusholu.

³⁰Ahija no pa phikuzu akithe uchekeu ikhipheno suxula chighikini shiveno

³¹Jeroboam vilo ishi pi, “Hi suxula chighiye nono ikhiluvelo, kughengu AMPEU Israil Lhou no ovilo pi ani, ‘Niye Solomon launo akukaphu ikhi suwuve tsuniae eno alagha chighi ye ino otsuvenia.

³²Iqeu David eno Jerusalem iwu shino Israil yeghi kumtsu gholono kisheluke ghenguno Solomon sala alagha lakhi qhitsuni.

³³Ino hishi akeuye Solomon no imiliveno inami lhou hipaqo mllaveke ghenguno: Sidonmi lhouliu Astarti, Muab lhou Khemos, Ammunmi lhou Milkom. Solomon ye igholumovae; pano mla pimi auve, papu David toi mono paye iyezahqo eno ahza kutsu pemovea.

³⁴Ikemu niye Solomon launo akukaphu kumtsu ikhisuwu tsumoe, pano xuake kutolo pa pelo kalu peni. Hi shi akeuye iqeu David, ino kishephelu eno khuuno izahkutsu eno iyezahqo aghokulushi pelukeno pa ghengunoke.

³⁵Ino Solomon nu ulono akukaphu ikhiluvetsuno alagha chighiye otsuveni,

³⁶ipuzu Solomon nu pelono alagha lakhi shou kalupeni, tishikeu vechewono iqeu David lagha lono ikowokeu pelono Jerusalem lono imlla peniye ino kisheluve akeno tipau shou ayehkipeu shilupenike.

³⁷Jeroboam, no Israil lagha shou akukau shitsuni, opelo nono lunishike thaqhu alughi kumtsu shou ayeh pelu nani.

³⁸Tsala nono ighokulu shi aye, iyezah vechewo xu aye eno ino kiu zah tsukeno tipau qholono mla aye iqeu David no shiketoi niye alhokuthu osasu anani. Ino opelo Israil kukau shipe nani eno opolo kughuko vechewo oshelo ghi ayeh pelu wopeni ino David lau shitsuketoi.

³⁹Solomon xine ghenguno ino David lagha lono iko ighikeqo aghime tsu nani, ikemu alhokuthu ghenguno kumoe.’ ”

⁴⁰Ike tithiuye Solomon no Jeroboam pithive nike pukaputsa thuve, ikemu Jeroboam ye Ijip lo akukau Shishak lau poveno Solomon no thimoke kutolo tilau acheuve.

⁴¹Solomon no kiu mlakeno, pa kuxu ghili pa lokutsu, hi kumtsu Solomon Xughili kakulo yekutsupe qhipuani.

⁴²Paye Israilmi kumtsu shou akukau shi Jerusalem lo ampe lhobidi ayehpe.

⁴³Pa thive eno David phughi lo qhoveno pa nu Rehoboam no pa zuqhulo kaluve.