Read Sumi Naga KUKAMI ATUGHIU 12 Bible Online

KUKAMI ATUGHIU 12 - Sumi Naga bible

KUKAMI ATUGHIU 12

¹Rehoboam ye Shekhem lo wuve, Israil shiyeh ahuu akeqo kumtsu kuhono pa pesu akukau shiluve.

²Kughou Nebat nu Jeroboam akukau Solomon msayeno Ijip lo povekeu no asutsa hipau chiluno Ijip lono ide ighive.

³Ahuu akeqo Israil laghano Jeroboam kusaghi eno panongu kumtsu kumtsa Rehoboam lau wuno pa vilo ishi pi:

⁴“Opu Solomon no ighono nikijipusae eno ni shou amakho kije betsue. Tsala nono amakho hipaqo kumthuvetsu eno akuxu laghi kumthu vetsu aye ninguye oghokulumi shinie.”

⁵Pano khochile, “Atsala kuthu thiuno ide ighilo, tileno ino nongu vilo pini” ipi. Ike panonguye cheve.

⁶Akukau Rehoboam no papu Solomon qholo mlachekemi alayemi sasu kighini kileju. “Timi hipaqono iniju akeu tsalo nonguye ipelono kiu khochile penike akukumsu itsu ani kya?” pi pano iniju.

⁷Panonguno khochile, “Nono timi hipaqo akivishi huthuniaye panonguno qhuiniju akeu achipika tsulo, tishiaye panonguye alhokuthu ogholughi xu nani.”

⁸Ikemu muchomiqono akukumsu pa tsukeu pano kukuthaveno lhothemi pa sasu kumtsa xuithughi keqo lau wuve eno tipaqhejono pa kukutsuu shive. Pano iniju,

⁹“Nonguye kiu kukutsu pesu itsunikya? Panongu makho kumthuve tsulopi ivilo iniju akemiqo vilo niye kishile pivenikya?”

¹⁰Lhothemiqono khochile, “Hitoi panongu vilo pivelo: ‘Iuloti anipau hipauye ipu chita nguno akishiu!’

¹¹Panongu vilo pilo, ‘Ipuno amakho kije pesu nongu shou betsukeu nguno akimishiu betsuni. Pano akighi kipilino nongu hepuaghi aye; niye khurshi kiheyisahu kusuno nongu heni!’ ”

¹²Kuchono atsala kuthu tove kethiu Jeroboam ngo timiqo kumtsu akukau Rehoboam lau pano mijetsu keu kiqi lono ide ighi.

¹³Akukauno muchomi layeqono akukutsu pa tsukeu thaighave eno atsa lhoksa pesu timiqo vilo pithuve,

¹⁴lhothemiqono pa vilo pikeu kiqi lono pano ishipi, “Ipuno amakho kije nongu shou betsu; niye tinguno akimshiu nongu shou betsuni. Paye akighi kipilino nongu hei; ikemu niye khurshi kiheyisahu kusupe nongu henani!” ipi.

¹⁵Ikehu akukauno timiqo tsa initsumove, tishikeu lono AMPEU no Nebat nu Jeroboam vilo tungkupu Ahija Shilomi vechewo pipuakeu tsa shikupuve.

¹⁶Kughou timiqono akukauno panongu tsa initsumove keu ithive keno panonguno ighamuku pi, “David eno pa laghaqo ikiqivelo! Panonguye ningu ghenguno kiu mlatsukya? Israilmiqo, ningu akilo idewoveni kholo! Rehoboam pelo pa likhi paju auvepelo!” Tishino Israilmiye hekibide huthuve,

¹⁷Juda bocholo akeqo likhino Rehoboam no panongu kukau shi qhivetsu.

¹⁸Tileno akukau Rehoboam no akumla kishimiqo shou ampi shi akeu Adoniram hapesu Israilmi lau puwu, ikemu panonguno atu pesu pa veqhi pithive. Tishike lono Rehoboam ye khurkulu lo ikuno itshusu Jerusalem lo pove.

¹⁹Tinguno tilauye ahuu akeqo shiyeh Israilye David lagha lono ikoighikeqo sasu kimithi thuve.

²⁰Kughou Israilmino Jeroboam ye Ijip lono ide ighivae pikeu chilukeno panonguno timiqo hoholo pa kusuno pa pesu panongu kukau shiluve. Juda lagha lono ighikeqo likhino David polo kughukomi sasu aghokulu shi ngove.

²¹Kughou Rehoboam no Jerusalem lo ighilu keno, pano Juda eno Benjamin lagha lono iko ighikemi ghushimi kishekiphe 180,000 kukutsu. Paye aghu shino ahuu akeqo Israil shiayeh pa qholo sachile sughiluve nike kumsue.

²²Ikemu Alhou no tungkupu Shemaya vilo

²³asutsa hipau pesu Rehoboam vilo eno Juda eno Benjamin laghami kumtsu vilo pilo:

²⁴“Othikuzumi Israilmi le kevilo, nongu kumtsu akilo idewovelo. Kiu shive akeno tiye ipulou lono shivae.” Ike panongu kumtsuno AMPEU zahkutsu gholuno akilo idewokhave.

²⁵Akukau Jeroboam ye Shekhem taun Efraim yeghi toghelo ake aliwo aloqhi putuveno tilehi ado kitila ache. Tipathiu a-a tipau qhiveno Penuel taun lo aliwo putuveno tile ngoluve.

²⁶Jeroboam no pa likhi pa putsaghi hitoi kumsuve, “Akukaphu ye David lagha kudau wuveni cheni.

²⁷Tsala timi hipaqono Jerusalem lo AMPEU kumllaki lono aghakishi jeli pesu tsuauve aye, panonguye Juda kukau Rehoboam pesu panongu mpeu shiluveni cheni. Tishino panonguno iheqhiveno akukau Rehoboam lau idewoveni cheni.”

²⁸Tishi kumsuve kethiu, pano shuna no amshiti julho kini mla eno pawu timiqo vilo ishi pi, “Nongu ghenguno Jerusalem lo wuno mlla nikeuye alaghi shuloe. Israilmiqo, hino nongu lhouke, hino Ijip lono nongu saipeghiluke!”

²⁹Tipighi shuna mishitsu lakhino Bethel lo qhi eno lakhino Dan lo qhitsu.

³⁰Ike timiqoye Bethel eno Dan lo wuno mllakeuno axine shive.

³¹Jeroboam no naghuto toghi kumtsulo mllakeu-a shitsu eno Levi laghalo kumomi pesu achinemi shitsu.

³²Jeroboam no aqhi akutacheu lo atsala chighi pungulo pinyi kepu tsala kughuphetsu, tiye Juda yeghilo apinye hutoi. Bethel lo akumlla kipti alo khile pano amshitsu julho shisukeno akumllagho pesu tipau tsupe nikeu shi, pano shikeu chinekiqolo achinemi pelo Bethel lo ngope.

³³Aqhi akutacheulo atsala chighi punguni lo pano kughuphetsu keu, pa ghi Bethel lo wuno amshitsu pano mlakeu akumllagho tsu, Israilmi pelo pinyi chepe niye pano huthu phetsukeuke.