Read Sumi Naga KUKAMI ATUGHIU 13 Bible Online

KUKAMI ATUGHIU 13 - Sumi Naga bible

KUKAMI ATUGHIU 13

¹AMPEU zah kutsu lono Juda lono tungkupumi lakhi Bethel lo wuve eno Jeroboam no akumlla gho tsu niye puthugho ake lono ighilu.

²AMPEU zahkutsu vechewono ti tungkupu huno akumlla kiptia piputhave: “O akiptia, akiptia, ipi AMPEU no ishi pi: Anu lakhi, khuu je Josiya kupani keno David lagha lono punu nani. Pano nongu achinemiqo ghiqhive nani, khunoqo asuatu kumllami kiptia lono akumllagho tsu ani keno eno pano nongu timiqo saghi piti nani.”

³Tungkupuu huno highi ishipi, “Akumlla kiptia hipauye ipokututa shive nani eno tile akeu ayevuqo kutholeve tsu nani. Tishikeu lono AMPEU no ivechewo piqhi puakeu ithilu nani.”

⁴Kughou akukau Jeroboam no hi chilukeno, pawu chhopuwo, “Timi tipau kughaluvelo!” ipi ahza tsu. Ikemu akukau ye pawu chhopuwo keu hu pisheche mlano ngove.

⁵Tishino akumlla kiptia hu tungkupuuno AMPEU jelono piketoi ipo kututa shive eno tipaulo ayevu akeu ayeghilo ileiqi khave.

⁶Akukau Jeroboam no tungkupuu vilo pi “Ighenguno oMPEU Alhou vilo inikhutsulo eno iu hipau shipivive tsulo pilo!” Tungkupuu huno AMPEU vilo inikhu, eno kuchono akukau u viluve.

⁷Tileno akukauno tungkupuu vilo pi, “Isasu akilo wono chuqu kusho shilo. Nono ighenguno kiu mlatsukeno tipau ghenguno agho otsuni.”

⁸Tungkupuuno khochile, “Tsala nono okini tuxa papu itsunie pinamu niye ogholo wono kumu chu shomo nani.

⁹AMPEU no ahza itsukeu ye kumu chusho kevino vejoi alaghi kutauno akilo ide ighivelo ipi ani.”

¹⁰Ikehu paye thosu ighike laghiuno womono alaghi kutau lono wove.

¹¹Tipa ghulokilo Bethel lo tungkupu alayemi lakhi ache. Pa nuliqono ighino pa vilo Juda lo tungkupumi huno tipa tsalani Bethel lo kiu shivetsu eno pano akukau Jeroboam vilo kiu pikeno tipaqo kishekulu lhe piye.

¹²“Paye khipa laghi lono idewokya?” pi amchou tungkupu huno panongu iniju. Panonguno alaghi pa kichepiye

¹³tileno pano panongu vilo pa ghenguno gadaha lo pa kughuqa lopi. Panonguno tishi tsu eno pano pa hawu

¹⁴khile Juda lono ighikeu tungkupuuno wuvekeno tipa lalo eno kuchono paye aphisubo lakhi qholo iqa aghike lono pa halu. “Noye Juda lono ighikeu tungkupu hu kesha?” pi pano iniju. “Tihu nike” ipi timi huno khochile.

¹⁵“Isasu akilo wono alibe chulo,” ipi pi.

¹⁶Ikemu Juda lono ighikeu tungkupuuno khochile, “Niye osasu akilo idewo mla momu nono iku akeumu ikhilumlae. Eno hilehimu osasu kumu kuchukusho shini chemoe.

¹⁷Kughengu AMPEU no ahza itsukeuno kumu chusho kevilo eno ighikela zusu akilo idewokevilo ipie.”

¹⁸Tileno amchou tungkupu Bethel lono ighikeu huno pa vilo pi, “Nighi otoi tungkupumi lakhi ke, ikehu AMPEU zah kutsu lono kungumi lakhino ivilo pikeuno osasu akilo ide ighino osasulo pike.” Ikemu ti amchou tungkupu huye miki ake.

¹⁹Tighenguno tungkupu Juda lono ighikeu huye amchou tungkupu sasu akilo idewono pa sasu alibe chuve.

²⁰Pama kumtsa chuniye iqa akelono AMPEU tsa amchou tungkupu lau ighi,

²¹pano ighamuku Juda lono ighi akeu tungkupuu vilo pi, “AMPEU no pi noye pa hebideveno pano ahza tsukeu shimovae.

²²Noye xaidechilewo ovilo alibe chukevilo pikeu alo chushova. Tipau ghenguno oheqhi pithive nani eno okumoye nobolomi kumo kuqho alo qhomo nani.”

²³Pama chusho vekethiu amchou tungkupu huno Juda lono ighikeu tungkupuu gadaha lo kughuqano puwove.

²⁴Wocheke lono abongushu no pa lakhape aghino pa heqhive. Pa sukumoye alalo tishi qhive eno gadaha ngo abongshu kumano ti suho pesu ae.

²⁵Timi khamino tipa alo ighino alaghilo asukumo phivilo abongshuno ngo aghikeu ithulu. Panonguno chesusu Bethel lo wuno alalo kiu ithulu keno tipau pesu aphughilo akeu amchou tungkupu pithi.

²⁶Kughou amchou tungkupu huno tipau ghili chilukeno pano ishipi, “Tungkupuu tipauye AMPEU zah hebidevekeu ke! Tighenguno AMPEU no abongushu puwuno pa heqhiveke, tiye AMPEU no shi nani pi piqhipuakeu kiqi lono.”

²⁷Tishino pano pa nuliqo vilo pi, “Iwu gadaha lo ighenguno iqakepu kuto tsulo.” Panonguno tishitsu,,

²⁸pano chesu ighikelo kuchono tungkupu phimpi alaghilo gadaha ngo abongushu kumano vapesu aghikeu ithulu. Abongushu huye ti akumo mu chumo, momu gadaha mu tsuchumo no tishi ngo aghikhae.

²⁹Tileno amchou tungkupu huno akumo ikhipesu gadaha shou beno xapusu Bethel lo ighino mloqa apuzu shiqhovetsu.

³⁰Pano pa bolomi kumokilivelo qhove, pa eno panuliqo kumtsuno tipau ghenguno mloqatsu ghi pi, “O ithikuzuu, O Ithikuzuu!”

³¹Akumo qhovekethiu tungkupuu huno panuliqo vilo ishi pi, “Kughou ino thive nikeno ikumo ghi pa phi ije ghi qhotsulo

³²AMPEU zah kutsu lono piqhikeu Bethel lo akumlla kiptia eno Samaria phughilo akumlla-a kumtsu musuini puakeu ye achipika nani.”

³³Israilmi kukau Jeroboam ye tithiughi pa lhoksa laghiqo lono ide ighimoe, ikemu tamo mitheno inapughami lagha lono achinemi kisheluno pano mlape qhikeu kiptiaqolo mllape. Khuu khuumu pa ampino shinishi aghi aye angu-agha betsuno achinetou shipeke.

³⁴Pa xine hipaqo ghenguno pa lagha yehkipe huye ixapiniyive eno kumtsu hepinheveke.