Read Sumi Naga KUKAMI ATUGHIU 14 Bible Online

KUKAMI ATUGHIU 14 - Sumi Naga bible

KUKAMI ATUGHIU 14

¹Tipa ghulokilo akukau Jeroboam nu Abija ye su-ake

²Jeroboam no pa nipu vilo pi; “Khuunomu omtha kepushi onanu kiliveno tungkupu Ahija no akeu Shilo lo wulo. Pano ivilo pikeu ino Israilmi shou akukau shilu nani ipi puani.

³Ashopa chighi eno kholaqhi sumono shikeu sho gholo akhi ngozu abohu lakhi ishi pesu wulo. Pa vilo nikujo nuye kiutoi veni chenikeno iniju aye pano ovilo kishekulu pitsu nani.”

⁴Ike kuchono lino Shilo lo Ahija kilo wu. Paye kitemi shivekehu anhethi icheveno kumu ithumla.

⁵Ikemu AMPEU no Ahija vilo ishi pive, “Jeroboam nipuno li nu su ani kehu kiutoi veni cheni kela inijuniye olau cheni. Liye kutami kena pipeniye li ju kusuveno amqu shi ighi nani.”

⁶Kughou lino chesu ahukikhalo ighikeu Ahija no chilu keno, pano pi, “Iloghilo, noye Jeroboam nipu kepi ino ithiva. Noye kushiye kutami kena pipeniye amqu shi ananu kiliveno ighi ani kya? Niye oghenguno asutsa lhoksa anie.

⁷Wuno Jeroboam vilo AMPEU Israil Lhou no hi pa vilo pi ani pilo: ‘Ino timiqo gholono okishepheluno iwu timi Israilmi shou ayehkipeu shilupe.

⁸Ino David lagha lono ighikeu kukaphu ikhiluve tsupuzu tipau pesu otsu. Ikemu noye iqeu David toi shimoe, paye thwokha igholue eno izah kutsuqo pelue eno ino kiu shilo pikeno tipau likhi shie.

⁹Noye ozuu ayehkipemi nguno alau axine kije shiva. Noye imiliveno asu-atu julho eno ayino shisukeu julho shino mllauvekeu huno imlo shikighideve tsuae.

¹⁰Tipau ghenguno olagha lau shikupsa sughinia eno olagha lono ighikemi kiptimi kumtsu muchomi lono itimi kutolo heqhi pithivetsu niae. Okibolomi kumtsu shipuhave tsuni eno tipaqoye amishiba mukhu toi fupewu khavepe nani.

¹¹No laghalo khuu khumu aphughi lono thivekeuye atsuno chuvepe nani eno khunono aluzaqhauno thiveni keno tipaqono aluquno mighivepe nani. Ni AMPEU no hi piqhivae.’ ”

¹²Tinguno alaughi Ahija no Jeroboam nipu vilo ishi pi, “Noye akilo idewolo. Nono aki tokemtsa onuye thive nani.

¹³Israilmi kumtsuno pa ghenguno mloqa nani eno paye shiqhove nani. Jeroboam kibolo pa kumo likhino tsaqutsalei shiqho keu shinani, kughengu pa likhino Israilmi Lhou AMPEU mlokiqiu shiluke.

¹⁴AMPEU no Israilmi shou akukau lakhi tsu nani eno tino Jeroboam lagha kishekhave tsu nani.

¹⁵AMPEU no Israil ghime nani eno liye aghoki mukulo amtulibo sukini aketoi sukiniqhi nani. Pano ayeghi kivi khikhi pano puasuqo tsukeno tipau lono Israilmi nhuve nani eno pano panongu Eufrati hechesu apanagha puwukhave nani, kughengu panonguno asu-atu julho eno Ashera lhou liu mllauve keuno pa mlo shikighidevetsu.

¹⁶AMPEU no Israil qhive nani, Jeroboam no axine shiveno Israilmi axinelo sailovetsu ke.”

¹⁷Jeroboam nipuno Tirza lo ide ighi. Lino likilo iloghi kemtsa anu hu thive.

¹⁸Israilmino pa kumsuqa eno pa qhove, AMPEU no pa qeu tungkupu Ahija vilo pikeu shikupuve.

¹⁹Akukau Jeroboam no mlakeu kumtsu, pano aghushikeu, kiutoi ayehpe chekeno ti kumtsu Israil Kukami Xughili yekeulo yekutsupe qhipuani.

²⁰Jeroboam ye ampe muku kini kalu. Paye thive eno shiqhove, tithiu pa nu Nadab no pa zuqhulo kaluve.

²¹Solomon nu Rehoboam ye apunu mpe lhobidi lakhi shia, pano Juda lo akukau shiluno ampe chighi tsuni Jerusalem lo ayehpelu, tiye Israil yeghi bocho kumtsu dolono ighino akumlla-a shipenikeu AMPEU no kishelu keu phughi ke. Rehoboam paza ye Ammun lono ighikeu Naama ke.

²²Juda lo timiqono axine shikithe keu lono AMPEU mulo shikighide kithetsu, kughengu panongu puasu nguno alaushi axine shiveke.

²³Panonguno kichileu lhou ghenguno akumlla-a shisuno tile atu tsukucho shosuno Ashera julho shipukuno atoghi eno asukicheqho kumtsulo mllapeni keu shie.

²⁴Tinguno alhoksauno hi asu-atu kumlla-a kumtsulo kusalhalimi eno shupumino chhitoi ngowoto. Juda lo timiqoye kujokepu jeli kumtsu mla, AMPEU no tishi mlachekeqo pano yeghi lono Israilmino iloghinike zulono halevekeqo toi.

²⁵Rehoboam no kakeu ampe pungu shi akelono Ijip kukau Shishak no Jerusalem le.

²⁶Pano achinekilo eno akukaki lo akuakini kumtsu pewuvetsu, tipau gholo Solomon no shikeu shuna zutoqo kumtsu pewuvetsu.

²⁷Tipaqo thelilo mlasunike ghenguno akukau Rehoboam no alazayino azutoqo mlasulu eno khaghoqo khepenike ghenguno kijemiqo pichevetsu.

²⁸Akukauno achinekilo iloke kumtsulo aghukhemino azuto pesu pa khe sawo qhi eno tishive kethiu azutoqo pewo aghukhebolo qhiveche.

²⁹Akukau Rehoboam no mlakeu kumtsu Judami Kukami Xughili kakulo yekutsupe qhipuani.

³⁰Ado hi kumtsulo Rehoboam ngo Jeroboam pamaye tamo mitheno aghushiche.

³¹Rehoboam thive eno David phughi lo kijemi kumo kuqho alo qhove eno pa nu Abija no pa zuqhulo kaluve.