Read Sumi Naga KUKAMI ATUGHIU 15 Bible Online

KUKAMI ATUGHIU 15 - Sumi Naga bible

KUKAMI ATUGHIU 15

¹Akukau Jeroboam no Israilmi shou kakeu ampe chighi akuta-cheu shi ake ghuloki lono Abija no Juda ghakhu shou akukau shiluno,

²paye ampe kuthu Jerusalem lo kalu. Pazaye Maaka, Absalom ngake.

³Pa pu toi pa ghi axine shive pasu David toi aghokulu shimono pa MPEU Alhou hekibidemi shive.

⁴Ikemu David ghenguno AMPEU Alhou no anu lakhi pesu Abija tsu papelo pa thiu Jerusalem lo kaluno Jerusalem susholu tsupeniyeke.

⁵AMPEU no hi shikeuye David no pa pulou shitsu khilemu pa zahkutsuqo hebidemoe Uriya Hatimi lau thono.

⁶Abija ngo Jeroboam pamaye alhokuthu aghushi che, tiye Abija no kacheke thaqhulo tishi cheke.

⁷Abija no kiu mlakeno ti kumtsu Juda Kukami Xughili kakulo yekutsupe qhipuani.

⁸Abija thive eno David phughilo shiqhove eno panu Asa no pa zuqhulo kaluve.

⁹Akukau Jeroboam no Israil lo kawo ampe muku lono Asa no Juda lo akukau shiluve,

¹⁰paye Jerusalem lo ampe lhobidi lakhi ayehpe. Pa puza ye Absalom nga Maaka ke.

¹¹Asa ye pazuu David no shicheke toi kiuno AMPEU lokiqipu keno ti mlatsue.

¹²Pano pa ghakhulo Alhou kumthami kumlla alo ngono salha chekemi kiptimi totimi kumtsu haleveno pa zuumiqono mlapesu qhikeu asu-atu kumtsu ikhipevetsu.

¹³Pano pa puza Maaka khuu kukaliu shi akeno tipau ghi hapheve, kughengu lino axuthi lhouliu Ashera kiqi lono li mllakeu shipe. Asa no asu-atu julho lhou kumtsu kubopiniyiveno Kidron khila lono pitivetsu.

¹⁴Asa ye alhou kumthami kumlla-a kumtsu shipusa khamlave namu paye pa kuxu thaqhulo AMPEU lau aghokulu shie.

¹⁵Pano papuno ikhiphepe Alhou tsukeu thime kumtsu eno tipau gholo shuna ngo tsandiyino shikeu nhemgha pano ikhiphepe tsukeu kumtsu pewo Akumllaki lo qhiluve.

¹⁶Juda lo kukau Asa eno Israil lo kukau Baasha pamaye akuka pe ake thaqhulo aghu shikile che.

¹⁷Baasha no Juda lethuve eno Rama homxa ahohove tishikeu lono Juda yeghi lo ikipe ikulo kumtsu lakhavetsu.

¹⁸Tighenguno akukau Asa no Akumllaki eno akighiki lo qhipuakeu tsandiyi eno shuna kumtsu pawu kijemi vechewo Siriya lo akukau Benhadad Tabrimmon nu, Hezeion nuke eno pano Damaska lo ayeh pe ake, pa lau tsupuwughi hipa sutsa pesu pithi:

¹⁹“Ikujo papuno kighithikile ighiketoi ikujo ghi kuphukileni. Hi tsandi eno shuna ye agho otsu ani. Noye Israil kukau Baasha launo kututa shivelo, tishikeu lono iyeghi lono pawu ghushimi ikhisuwuve penike.”

²⁰Akukau Benhadad no Asa kukumsu pulovetsuno pawu ghushimi shou akijeu hapuwuno Israil phughiqo lethuve. Panongu Ijon, Dan, Abel Beth Maaka, Galil yizukucho muku kuxalo akeqo, eno Naftali lughilo akeqo phu kumtsu levetsu.

²¹Tishivekeu akukau Baasha no chilukelo paye Rama homxa aliwo shimoveno Tirza lo wuve.

²²Tileno akukau Asa no Juda yeghiqha kumtsulo ahza tsupuwu khumu qhimono kumtsuno ahza hipau lupenikeu shitsu, kumtsuno Rama lo ighino Baasha no Rama homxa aliwo shikeu atu eno tokta pekisheluve. Akisuyezu tipaqo pewo Benjamin ghakhulo aphu Mizpa ngo Geba homxa atupi yepe qhiluve.

²³Akukau Asa no mlakeu kumtsu pa mlo kuloghi kumla eno aphughi homxa atupi yekeu hi kumtsu Juda lo Kukami Xughili yekeulo kupasu yekutsupe qhipuani. Ikemu paye kitemi shiveke lauye suve no apukhu kinitave.

²⁴Asa ye thive eno David phughilo kukami kumo kuqho alo qhoveno panu Jehosafat no pa zuqhulo akukau shiluve.

²⁵Asa no Juda lo kakeu mpe akiniu shi akelono akukau Jeroboam nu Nadab no Israil lo akukau shiluve, paye ampe kini ayehpe.

²⁶Pa zuu papu toi pa ghi axine shive eno AMPEU kimthimi shiveno Israilmi sasu axine lo ilove.

²⁷Isakhar lagha lono ighikeu Ahija nu Baasha no Nadab miqe kheano heqhivetsu. Nadab ye pawu ghushimi sasu Filistiya yeghilo aphughi Gebethon le ake ghuloki lonoke.

²⁸Tiye akukau Asa no Juda lo kakeu mpe akuthuu shi ake lonoke. Tileno Baasha no Nadab zuqhushi Israilmi kukau shiluve.

²⁹Paikhavi lono pano Jeroboam kibolomi kumtsu heqhi pithivetsu. Tiye AMPEU no pawu tungkupu Ahija vechewono Shilo lo ake ghuloki lono Jeroboam kibolomi lakhimu puxumono pithive nani pi piqhi puakeu kiqi lono shikupuve.

³⁰Hi shivekeuye Jeroboam no AMPEU, Israil Lhou mulo shikighideve tsukeu lonoke, pano axine shiveno Israilmi ghi axinelo pulovetsu.

³¹Nadab no kiu shikeno hi kumtsu Israilmi Kukami Xughili yekeulo yekutsupe qhipuani.

³²Juda lo kukau Asa eno Israil lo kukau Baasha pama no ka ake thaqhulo aghushikile che.

³³Juda lo Asa no kakeu ampe akuthuu shi akelono Ahija nu Baasha no Israilmi kumtsu shou akukau shiluveno Tirza lo ampe mukubidi ayehpelu.

³⁴Pazuu akukau Jeroboam toi pa ghi AMPEU mithino axine shive eno Israilmi sasu axine lo ilove.