Read Sumi Naga KUKAMI ATUGHIU 16 Bible Online

KUKAMI ATUGHIU 16 - Sumi Naga bible

KUKAMI ATUGHIU 16

¹AMPEU no tungkupu Hanani nu Jehu vilo pino asutsa hipau Baasha vilo pipe nikeu shi:

²“Noye khumu kumokemi lakhi ikemu ino okugha pesu iwu timi Israilmi shou saphetou shilupe. Ikemu noye Jeroboam toi axine shiveno iwu timiqo sasu axine lo ilove tsua. Panongu xineno imlo shikighideve tsua,

³tighenguno niye no eno okibolomi puhavetsuni ae, ino Jeroboam lau kiutoi shikeno titoi shinia.

⁴Olagha lo khu khumu aphughi lono thivekeuye atsuno pa shi chuvepe nani eno khuuno aluzauno thiveni keno aluquno pa shi mighivepe nani.”

⁵Baasha no mlakeu eno pa mlokuloghi kumla kumtsu Israilmi Kukami Xughili kupasu kakulo yepe puani.

⁶Baasha ye thive no Tirza lo qhove eno pa nu Ela no pa zuqhulo akukau shiluve.

⁷Asutsa tipauye AMPEU no Baasha eno pa laghaqo vilo Jehu tungkupuu vechewo Baasha no AMPEU mithi ghi axine shivekeu ghenguno pitsuke. Pano AMPEU loghu shikighide vetsukeuye Akukau Jeroboam no pa zuuno mlaveketoi akumla lhoksa shikeu likhi kumono pano Jeroboam kibolomi kumtsu heqhi pithikhavetsu.

⁸Juda lo Asa no kakeu ampe muku akutsughou shi akelono Baasha nu Ela no Israilmi kukau shiluve, eno paye Tirza lo ampe kini ayehpelu.

⁹Pa qholo kijemi lakhi shichekeu Zimri ye akukau khurkulu ghushimi shou ampi shichekemi lakhi no pa heqhiveni keu amuqu shive. Ghulo lakhi akukau Ela ye Tirza lo akukaki kheu Arza ki lono shomuzuve.

¹⁰Tishi akelono Zimri no akilo iloghino Ela yiveno pa zuqhulo kaluve. Ike tiye Asa no Juda lo kakeu ampe muku akutsuniu shi ake ghuloki lonoke.

¹¹Zimri no akukau shilu kemtsa pano Baasha kibolomi kumtsu ghiqhi pithivetsu. Kiptimi lagha eno akusami shi aghinamu kumtsu ghiqhi pithi khavetsu.

¹²Ike tiye AMPEU no Baasha mithivekeu kiqi lono tungkupuu Jehu vechewono pitsukeu, Zimri no Baasha kibolomi kumtsu ghiqhi pithive nani ipi puake.

¹³Kughengu panonguno asu-atu mllauveke eno Israilmi sasu axinelo ilovekeu ghenguno Baasha eno panu Ela pamano AMPEU, Israilmi Lhou mlo shikighideve tsuke.

¹⁴Ela no kiu mlakeno ti kumtsu Israilmi Kukami Xughili kakulo yekutsu pe qhipuani.

¹⁵Juda lo Asa no kakeu ampe muku akutsuniu shi ake lono Zimri no Tirza lo ngono atsala tsuni Israilmi shou ayehpelu. Israilmi ghushimiqoye Filistiya yeghilo aphughi Gibethon le ae,

¹⁶kughou panonguno Zimri no atheshino akukau yive pikeu chilukeno, tipau mtsa lono panongu kumtsu kuqhano panongu sakipheu shi akeu Omri pesu Israilmi kukau shiluve.

¹⁷Tileno Omri eno pawu ghushimiye Gebethon phughi qhiveno Tirza phughi lethuve.

¹⁸Kughou Zimri no aphughi ikiqi wochekeu ithuluve keno paye posu aphughi khile akuka ki bokutha shipuakeno tile ilono ami suvetsu eno pa ghi amilono pa pitiqhive.

¹⁹Hi shive keuye pano AMPEU mithi axine shivekeu ghengunoke. Pa zulo achekeu Jeroboam toi pa ghi pa xine ghenguno AMPEU pulou shimlave eno Israilmi sasu axinelo pulovetsue.

²⁰Zimri no mlakeu thime kumtsu eno pano thechu shi amuqu shikeu hi kumtsu Israilmi Kukami Xughili kakulo yekutsupe qhipuani.

²¹Israil timiye kije kututa shive: panongu khamino Ginat nu Tibni pelono akukau shipenishive eno aqo khamino Omri pelono shipenikeu pulove.

²²Ashekhaloye khunoqono Omri pulo akeno panonguno toluve; Tibni ye thive eno Omri no akukau shiluve.

²³Asa no Juda lo akukau shikeu mipe shighi aqhaqhiu shi ake ghuloki lono Omri no Israil lo akukau shiluve. Paye atughulo ampe tsughoye Tirza lo ngono ayehpelu,

²⁴eno tsandiyi 6,000 pesu timi lakhi paje Shemer ipikeu launo Samaria toghi qhulu. Omri no tipau toghi homxa aliwo shive eno taun tile mlasuluve, tipau taun pesu inahuu tipau to pighiu Shemer je lono Samaria ipi aje kuvetsu.

²⁵Omri ye pa zuumiqo nguno alaushi AMPEU zulo axine shive.

²⁶Pa zuu Jeroboam toi paye AMPEU, Israilmi Lhou mulo shikighidevetsu, tiye pa xine ghengu eno Israilmi sasu axinelo asu-atu julho mllauve pekeu lono ke.

²⁷Omri no mlakeu eno pawu tokulu kumla kumtsu Kukami Xughili kakulo yekutsupe qhipuani.

²⁸Omri ye thive eno pa kumoye Samaria lo qhove panu Ahab no pa zuqhulo akukau shiluve.

²⁹Asa no Juda lo kakeu mipe shighi akutacheu shi ake lono Omri nu Ahab no Israilmi shou akukau shiluveno paye Samaria lo ampe muku kini ayehpelu.

³⁰Pazuumi nguno alaushi paye AMPEU lau axine shive.

³¹Akukau Jeroboam toi axine shivekeu likhi kumono tinguno alaughi paye Sidon lo akukau Ethbaal nga Jezebel sasu kulakupu shiveno Baal mllauve.

³²Paye Samaria lo Baal mllape nike achineki lakhi shitsu eno akumlla kiptia pa ghenguno lakhi mlano tipau pesu achineki lo qhi.

³³Tipau gholo axuthi lhouliu Ashera julho shisuno tile qhi. Paye pazuu kukami kumtsu nguno alaushi AMPEU, Israilmi Lhou mlo shikighidevetsu.

³⁴Pano ka ake ghuloki lono Bethel lo kuau Hiyel no Jerikho phughi mlakitheluve. AMPEU no Nun nu Joshua vilo pipuaketoi Hiyel ye panu anoghiu Abiram puhave, tiye Jerikho homxa atupi yekithe akelono eno panu anupau Segub ghi pano khagho mla akelono thive.