Read Sumi Naga KUKAMI ATUGHIU 17 Bible Online

KUKAMI ATUGHIU 17 - Sumi Naga bible

KUKAMI ATUGHIU 17

¹Tungkupumi lakhi paje Elija, Gilead yeghilo Tishbe lono ighikeuno akukau Ahab vilo pi, “AMPEU je lono, xuakeu Israil Lhou, ino khuu huthu acheni keno, paje lono ino ovilo pi ani, hinguno athiu ampe kini kuthu dolo ino pitsumoke kutolo atsuzumu tsutsughumu ighimo nani.”

²Tileno AMPEU no Elija vilo pi,

³“Noye hipa-a qhiveno kipela kudau wuvelo eno Jordan lono kipelau Kherit ghoki phivilo olikhi itshuwuvelo.

⁴Tipau ghokino opelo yekulupushi azu otsu nani eno agha pelo ochuqupu pekishe susu ighipe nike ahza tsuvae.”

⁵Elija no AMPEU zahkutsu aghokulu shino wuve eno Kherit ghoki phivilo ngoluve.

⁶Pano aghoki zu yelu eno agha no pa sho eno ashi ishi ina kijili pa lau pe ighitsu che.

⁷Ado kitila thiu aghoki tipau loghi tsughuu moke ghenguno azu hauve.

⁸Tileno AMPEU no Elija vilo pi,

⁹“Sidon phivilo Zarefat taun lo wulo eno tile ngolo. Ino achimeu tile kuau vilo olojilopi ahza tsuvae.”

¹⁰Tighenguno Elija no Zarefat lo wuve eno pano ti taun khagholo ighi kithishi, chimemi topumi lakhi asu ghe cheghike pano ithulu. Pano li vilo pi, “Ikimiyeno azu ipiyelo, “ ipi.

¹¹Ike lino ti sughiniye wucheke lono, pano itaghi li vilo ishipi, “Kimiyeno asho hami sughilo.”

¹²Lino khochile, “AMPEU oLhou akuxu kuau je lono tushoqhi pi anike niye asho kitilamu kuhae. Ikilo asho mukhu a-u tuxa kichhi ajukhu lo supuakeu eno ayibohulo oliv teli kighiji lakhi likhi ani. Ino hile ighi akeuye asu ghepesu akilo wono ino kiu kitila anikeno inu ikujo ghengu likhi kuto anie. Tino ikujo ghenguno ashekhau ghulhu shinia, tithiuye ikujoye akhuno thini ae.”

¹³“Amlo sakivilo, “ pi Elija no li vilo pi. “Wono oghulhu kutolo. Ikemu atughushi nono kiu anikeno tipau pesu asho aghulo lakhi mlano pesu ilau sughilo eno tithiuno achili aghikeu pesu onu okujo sala kutolo.

¹⁴Kughengu hiye AMPEU, Israil Lhou no pi ani: ‘Ajukhu lo asho mukhu akeu kuhavekeu shimo nani, momu ayibohulo teli hu kuha mitheve keu shimo nani. Ni AMPEU no tsutsughu akiniu puwutsumoke tsala kutolo.’ ”

¹⁵Achimeu no Elija no li vilo piketoi wuno mlatsu eno panongu kumtsu ghenguno atsala kutomo kutolo kupukuno shi alue.

¹⁶AMPEU no Elija vilo piqhi puaketoi, ajukhu lo asho mukhu momu ayibohulo teli hu khilemu pepuhave keu shimoe.

¹⁷Ado hami thiu atopuu nuye su-uve; paye sukithethe veno ashekhaloye thive.

¹⁸Lino Elija vilo pi, “Alhou wu timi, noye kushiye ilau hi shivetsu kya? Noye hilehi ighino Alhou pelo ixine kumsuchile lukithe peno tipau ghenguno inu pithive tsukesha?”

¹⁹“Onu itsulo,” pi Elija no pi. Pano li ulono anu ikhiluno khapesu kunguu chebo khilehi pano ngo akeno tipa-alo azua lo puzuve.

²⁰Tishino pano ighono ighamuku inikhu, “O AMPEU iLhou, noye kushiye hi kumsa kimshipu achimeu hipau lau mlavetsu kya? Liye aloqhi ilamllu ae ikelauye nono li nu pithivetsuae!”

²¹Tileno Elija no pawu ghuthu kuthu anu lau chhopuwono inikhu, “O AMPEU iLhou, anu hipau puxuvetsulo!”

²²AMPEU no Elija kighini khochile tsu; anu hu atuthu she ithughi no xuithughiluve.

²³Elija no anu khapesu chhiliu iqighino paza vilo pi, “Julo, onu ye xuluvae!”

²⁴Lino khochile, “Noye Alhou wu timi ipi ino ithivae eno AMPEU no mutsuqheyi ovechewo pitsu chenie!”