Read Sumi Naga KUKAMI ATUGHIU 18 Bible Online

KUKAMI ATUGHIU 18 - Sumi Naga bible

KUKAMI ATUGHIU 18

¹Ado hami thiu, tsughumovekeu mpe akuthuu shi akelono AMPEU no Elija vilo pi, “Wuno okutoshi Akukau Ahab zulo piyelo eno ino tsutsughu puwu tsuni.”

²Ike Elija no cheve. Samaria lo puqumiye keuno ighono avekusa shiae,

³tighenguno Ahab no akukaki jukukutsuu Obadia ku. (Obadia ye AMPEU mllachekemi kuchomi lakhike,

⁴kughou Jezebel no AMPEU wu tungkupumi heqhi akeno Obadia no pano 100 sasu amqo kini shino atuki lo kusuve eno achuqupu eno azu pesu ighino panongu loji ae).

⁵Ahab no Obadia vilo pi, “Ningu wuno azupuki eno aghokihu kumtsu juwuni, khilela nomu khurshi ngo gadahatsu lojikulupu asutsuni phulunimala. Tishiaye ningu tsuaqu ye thimove nani.”

⁶Panongu pulokuqhalu no pututa shelo apanagha wuno phuwuju.

⁷Ike kuchono Obadia no pa lalo wucheke lono, paikhavi lono Elija sasu kusholu. Paye Elija kepi michiluveno pa zulo khonhequ no iniju, “Noye mutsuqhei no Elija kema, akijeu?”

⁸“Iye, niye Elija ke,” ipi pano khochile. “Noye wuno ompeu akukau vilo niye hile ngo ani ipilo.”

⁹Obadia no khochile, “Niye olau kiu mlave keno ihapesu akukau Ahab lau iheqhive peniye puwu anikya?

¹⁰Akuxu MPEU, oLhou jelono ino tushoqhi pi anike akukauye aghakhu kumtsulo ophuju puhano ani. Aghakhulo ayehkipemi ighino noye pano luzalo kuhaepi pithi ighike ghulokilo Ahab no pa vilo mutsuqheyino pa phumlakesha pi ashoqhi tsuno inijue.

¹¹Ikelaye noye ipelo wuno noye hilehi ani ipilo pi anikesha?

¹²Tsala AMPEU ghunguno ino piwuveke dolono oxapusu a-a kumthalo wuve aghi aye, ino Ahab vilo noye hilehi ani ipi puzu pano ophuju puhave aye paye mutsuqheino iheqhi pithive nani. Niye itilono AMPEU mllasusu xu ithughivekemi ipi kumsulu masae.

¹³Jezebel no AMPEU wu tungkupumi heqhi ake ghulokilo ino pano 100 pesu lhopungu nguno amqo kini shino atuki lo kusuvetsuno achuqupu eno azu panongu tsukeu ghili noye chimla kesha?

¹⁴Tighenguno kishi puzu ivilo wuno akukau vilo noye hilehi anipi piwulopi ahza itsu anikya? Paye iheqhi pithive nani!”

¹⁵Elija no khochile, “Akughushu MPEU ino khuu qe-huthu chenikeno pa jeku pi anike ishino ikutoshino wuno akukau zulo piyeni.”

¹⁶Ike Obadia no akukau Ahab lau wuno pa vilo pi, Ahab ghi Elija sasu kusho nike wuve.

¹⁷Kughou Ahab no pa ithuluve keno pano ishipi, “Israil yeghilo akukupuna kutsuu noye hilehi anikena lae!”

¹⁸“Niye akukupuna kutsuu kumoe,” ipi Elija no khochile, “Nounoke—no eno opu okujono kethono. Noye AMPEU zah gholumoveno Baal mllauve.

¹⁹Itehi Israilmi kumtsu Karmel to lono isasu kusholu penike ahza shilo. Baal tungkupumi 450 khikhi kukaliu Jezebel no saphu acheni keno kumtsu sasu ighilo.”

²⁰Ike Ahab no Israilmi eno Baal tungkupumi kumtsu Karmel to lono kushope nike kusutsu.

²¹Elija no timiqo lau iqhoghino pi, “Nongu mlo xakutha shinike ghenguno ado khitohi luani kya? Tsala AMPEU no Alhou aye, pa mllalo; eno Baal no Alhou shi aghiaye, pa mllauvelo!” Ikemu timiqoye atsa lothi lakhimu piqhimove.

²²Tishino Elija no pi, “AMPEU wu tungkupumi ilikhivae, ikemu Baal tungkupumiye 450 kutolo aphie.

²³Amshitsu kini sughilo; Baal tungkupumi pelo lakhi luno heqhipe ghekucho tha piniyi shiveno asuqhe shou belo, ikemu amiye sukevilo. Nighi amshitsu lakhi luno nonguno shiketoi shini.

²⁴Tishino Baal tungkupumi pelono panongu lhou vilo inikhupelo eno nighi AMPEU vilo inikhuni, tishino khuuno ami puwutsu keno tino Alhoue.” Timiqono tishinie pi pulovetsu.

²⁵Tileno Elija no Baal tungkupumi vilo pi, “Nongu pachi anike ghenguno nongu paghino amshitsu lakhi ikhiluno kishekulu aghili kutoluvelo. Nonguye ami sukevilo, ikemu nongu lhou vilo inikhulo.”

²⁶Panonguno amshitsu panongu lau sughikeu ikhiluno kutothuve eno puchomughu kutolo Baal vilo inikhu. Panonguno ighamuku, “Baal ni khochile tsulo!” akiptia homxa ilhe ae. Ikemu kiumu khokichile ighimove.

²⁷Puchou shiveke lono Elija no panongu junuqhi ghi pi: “Ighono igha inikhulo! Paye Alhou lakhi ya! Paye asamo pumo aghimu mthae, momu amlhu chuwuve aghimu mthae, ala kushuwolo izuwuveamu mthae! Maye paye zu animu mthae ikemu nonguye pa kuda puthu masae!”

²⁸Tileno tungkupumiye ighamuku inikhuthu eno azuta ngo azutachi pesu panongu philo aji qoipeghimoke kutolo ghapuku ae, tiye panongu chine khuayeh kiqi lono tishi shi ae.

²⁹Panonguye alezuphoi avela kutolo ighamuku khuae; ikemu kiumu khokichile ighimove, asutsa kiumu chimlave.

³⁰Tileno Elija no timiqo vilo ishipi, “Ikupunu susu ighilo,” ike panongu kumtsu pa punu ighino pa homxaluve. Pano AMPEU kumlla kiptia ixapiniyi akeu shikitheve.

³¹Jakob khuu AMPEU no pa je Israil kuvetsu keno pa nuli chighi kini kiqi lono atu ikhilu.

³²Atu tipaqo pesu pano AMPEU mllapenike akhache mlakithevetsu. Tipau suhumxa azulaki, azu liter chighibidi qhemi khepucho lukepushi heve.

³³Tishino tipau kumlla kiptia shou asu beve, amshitsu ghithapinyi shiveno asu shou beve. Eno pano pi, “Azutughuko bidi lono azu pesu ighino asu shou letelo.” Panonguno pano piketoi shitsu,

³⁴itaghi pano pi, “Itaghi azu puwosulo” eno panonguno tishitsu. “Itaghi ghuthu lakhi puwo sulo” ipi pano pi—eno panonguno tishitsu.

³⁵Azu pewo suakeu huno qochile susu azulaki akumlla kiptia homxa chhupe puake chhitoive.

³⁶Avela ghakishi kumlla tuqhudo tovekethiu Elija no akumlla kiptia lo ighino inikhu, “O AMPEU, Abraham, Isak eno Jakob Lhou, Noye Israil Lhou eno niye oqeu eno ozah kutsu lono hipaqo shi akeu panongu pelo noye Alhou kepi ithi kulupu shi pephe piyetsulo.

³⁷Ikhochilelo, AMPEU, ikhochile tsulo, tishikeu lono timi hipaqo pelo noye AMPEU Alhou kepi ithikulupu shitsulo eno hipaqo sachilesu olau ighikulupu shitsulo.”

³⁸Kuchono AMPEU no ami piqi tsuno akumllagho qhipuakeu asuqhe, atu kumtsu ayeghi pitithapiniyi pitive eno azulakilo azu ghi kishi puhave.

³⁹Kughou timi qono ti ithulukeno, panongu kutoshi ayeghilo ihozuno akichiqhi pi, “AMPEU ye Alhou; AMPEU likhino Alhou!”

⁴⁰Elija no ahza tsu, “Baal tungkupumi kughalukhavelo; panongu lakhimu phepupo kevilo!” Timiqono panongu kughalukhave, eno Elija no panongu sasu Kishon ghokilo ilono kumtsu ghiqhi khave.

⁴¹Tipathiu Elija no akukau Ahab vilo pi,” Itehi wuno chualo, tsutsughu boboshi wochekeu sutsa niye chilu ani.”

⁴²Kughou Ahab no chuniye wove keno Elija ye Karmel tolo iqhove eno pa kutsu pesu pa khonhe kuma dolo suno pishiqho pesu ayeghilo itsaqi.

⁴³Pano paqeu vilo pi, “Wuno azughi kudau jupuwo julo.” Aqeuno wuno ideighi puzu ishi pi, “Niye kumu ithulu amoe.” Ghuthu tsuni kutolo wuno julopi Elija no pi.

⁴⁴Akutsuniu pano ide ighino pi, “Azughi kudauno timi u pahi khungkusu pho ipecheni.” Elija no pa qeu ahza tsu, “Akukau Ahab lau wulo eno pa vilo pawu khurkulu lo ilono mtazu akilo idewolo pilo, tsutsughuno pa vekhaluve nosake.”

⁴⁵Tipiwo kushuwo kumolo khungkusu kuzuno atsutsu nhapholuve, amlhuno mulhu thuve eno tsutsughu boboshi ghuthuve. Ahab no pawu khurkulu lo ilono idechile susu Jezreel lo wove.

⁴⁶AMPEU kuka Elija shou ighi; pano paphi pesu pa chita khathapuluveno Ahab zuuno posu Jezreel lo wuve.