Read Sumi Naga KUKAMI ATUGHIU 19 Bible Online

KUKAMI ATUGHIU 19 - Sumi Naga bible

KUKAMI ATUGHIU 19

¹Akukau Ahab no Elija no kiu mlakeno eno kishi Baal tungkupumi kumtsu pithikhave tsukeno tipau ghili pesu panipu Jezebel vilo pive.

²Lino asutsa lakhi Elija lau puwu: “Nono kiutoi tungkupumi lau mlakeno thoghi tsalalo hipa ghulokilo okuxu ghi panongu toi pithilumo aye alhouqo pelo niu heqhi pithive peniu!”

³Ike Elija ye msaveno pa kuxu pukhalu nike ghenguno pove; pa qeu sasu Juda yeghilo Beershiba lo wuve. Pa qeuye tilehi qhive.

⁴Elija ye atsala kupuju aghasaqhalo ala chesu wuve. Paye asubo lakhi kicheqholo iqa ngolu eno tilehinomu thiveni keghi pi kumsuuve. “AMPEU, hiye ihuloe, ikuxu luvetsulo; thivekeu pavi auvae!” ipi inikhue.

⁵Paye asubo tipau qholo ikiqi ihozuve. Paikhavi lono kungumi lakhino pa buno pi, “Ithughino chulo”

⁶Pano hula hila jupuwoju, ikeuloye asho apa lakhi amiyi kulu shou bepuaghi eno azu abohu lakhi ishi pa kutsu phivilo aghikeu ithulu. Pano ti chu eno yeluveno itaghi ihozuve.

⁷AMPEU wu kungumino ide ighino akiniu pa kuda puthuve eno ishi pi, “Ithughino chulo, kughengu aghuzulaye oghenguno kushuwa aphie!”

⁸Elija no ithughiveno chu-sho luve eno alibe pa tsukeu no pa ghenguno atsala lhobidi kutolo akumto shiluno chewo Sinai akimthe toghi tolu.

⁹Pano atuki lakhilo wuno tipaji tile zuve. Paikhavi lono AMPEU no pa putsa, “Elija, noye hile kiu shi anikya?”

¹⁰Pano khochile, “AMPEU Alhou akughushuu, niye olikhi oqe acheni. Ikemu Israilmi ye panongu puloshoqhi hu hephove, okumlla kiptia kubovea eno owu tungkupumi kumtsu pithi khave tsuae. Ilikhi vae eno panonguye nighi ipithiveniye kuto anie!”

¹¹AMPEU no pa vilo pi, “Ipe puzuno naghuto tsuqolono izulo puthugholo,” ipi. Tishino AMPEU no vechewuno ighono kumsa kimshipu mulhu pesu atoghi tipau fuphovetsu eno atuquqo ghi kughutha kubo piniyive, ikemu AMPEU ye amlhu lomu kuhae. Amlhuno mulhu tave, tipashelo ayeghi itha ighi ikemu AMPEU ye ayeghi kughutha lomu kuhae.

¹²Ayeghi kughutha thiu ami ipeghi ikemu AMPEU ye ti amilomu kuha. Eno ami thiu mukhanono asutsa lakhi ipeghi.

¹³Kughou Elija no ti chilukeno, pano pa phikuzu xapesu pagi nhaluveno khalacheu ipeghi eno ti atuki ikulola kulaghilo puthugho. Asutsa no pa vilo pi, “Elija, noye hile kiu shi anikya?”

¹⁴Pano khochile, “AMPEU Alhou akughushuu, niye olikhi ohuthu acheni ikemu Israilmiye panongu puloshoqhi hu hephove, okumlla kiptia kubove eno owu tungkupumi kumtsu pithikhavetsua. Ilikhivae, eno panonguye nighi ipithiveniye kuto anie.”

¹⁵AMPEU no pi, “Noye Damaska phivilo aghasaqhalo idewovelo, tishipuzuno aphughilo ilono Hazael pelo Siriyami kukau shipe nike ghenguno nukisheluvelo;

¹⁶Nimshi nu Jehu pelo Israilmi kukau shiluve penike nukisheluvelo eno Shafat nu Elisha, Abel Mehola lono ighikeu pelono oshelo tungkupu shilu penike nukisheluvelo.

¹⁷Hazael ulono pokaluve aghimu Jehu no pithivetsu nani eno Jehu u lono pokaluve aghimu Elisha no pithivetsu nani.

¹⁸Tishimu Israil yeghilo timi 7,000 ye xuaphie, tipaqoye ighokulumiqoke, panonguye Baal zulomu pishiqho mphie momu pawu asuatuqo mu mumakeu shimphie.”

¹⁹Tighenguno Elija ye tipa a lono cheve eno ighikelo Shafat nu Elisha ye amshitsu aloji lakhi sasu ngo aghikeu ithulu; pa zulo atuna chighikhaqhi ngoa eno paye atuna chighi akiniu sasu alu hokide aghi. Tileno Elija no pa phikuzu xapesu Elisha shou bevetsu.

²⁰Ike Elisha ye pa mishitsu qhiveno Elija hasu ighino pi; “Ipelo ipu ngo iza kiniveno tithiuno ino osasu wuni.” Elija no khochile, “Tishiniaye tishilo, niye olakhatsu amoe!”

²¹Tishino Elisha ye pa mishitsu atunahu heqhive, amshitsu kuokhasu pesu ami shipuzu ashi lhope qhive. Pano ashi pesu timiqo tsu eno panongu kumtsuno ti chuve. Tipathiu paye Elija kukuphuu shighi pa sasu cheve.