Read Sumi Naga KUKAMI ATUGHIU 20 Bible Online

KUKAMI ATUGHIU 20 - Sumi Naga bible

KUKAMI ATUGHIU 20

¹Siriya lo akukau Benhadad no pawu ghushimi kumtsu hekutsuno tipau gholo ayehkipemi kutami pano shighi kinino panongu wu khurkulu sasu ighino Samaria lenike ghenguno alachethuve eno ti sumxa le thuve.

²Pano asutsa kipemi hapesu Israil lo akukau Ahab lau hitoi piwupe, “Akukau Benhadad no olau hipaqo khu ani,

³noye pa zulo owu tsandiyi, shuna, owu totimi eno onuli akumtomi kumtsu pesu tsuvelo ipi ani.”

⁴“Impeu, akukau Benhadad vilo tishi tsunike nighi pulo ani pilo; ino pighi akeu kumtsu eno ni ampi ghi lulu nani” ipi Ahab no khochilevetsu.

⁵Itaghi atikhau asutsa kipemino Ahab lau Benhadad no kutau khu akeu sutsa pe ighi: “Ino ovilo owu tsandiyi, shuna, owu totimi eno onuli akumtomi timiqo iulo phesuve tsulopi asutsa tsupuwuva.

⁶Itehiye, kiu kiu shi aghimu ino iwu kijemiqo puwuno owu akukaki eno oqholo kijemi nguno kiu amekuapu shi ithulukeno ti kumtsu ikhiluvetsu peni. Ike thoghiu hipa ghulokilo panonguye tilau ighi nani.”

⁷Akukau Ahab no aghakhulo saphetomi kumtsu kuno ishi pi, “Timi hipauye ningu puhavetsu niye shivae. Paye inipu-inuli kumtsu, iwu ghuka-shuna kumtsu khue eno nighi ti pulove tsuae.”

⁸Sakiphemi eno timiqono khochile pi, “Khilemu pa tsa initsu kevilo; khilemu pa tsukevilo.”

⁹Tighenguno Ahab no Benhadad ghinikishimi khochile pi, “Impeu akukau vilo hishi pilo pano khu akeu atughiuye nighi pulotsu anikemu akiniu khu akeuye tishimlae.” Aghinikishimino wuno asutsa kutau lakhi

¹⁰Benhadad launo sughikeu pi ighi: “Ino timi kumzapushi saghino ophughi hipau shipusave tsuno panongu u lo akughupu thime akeqo pewuvetsuni. Tsala ino tishimoaye alhouqo pelono iheqhi vepelo!”

¹¹Akuaku Ahab no khochile, “Akukau Benhadad vilo ishi pilo ghushimi kuchou lakhiye aghushive kethiuno qheza cheni kethono shimphi loye qhezachemoe pilo.”

¹²Benhadad no pa gholo suakemi eno kutami ayehkipemi kuqhano panongu phikilo ngono sho akelono Ahab wu khokichile sutsa ithulu. Pano pawu timiqo mtazu aghili kutono aphughi lelopi ahza tsu, ike panonguno kuto kughoi pesu cheve.

¹³Tishi akelono, tungkupumi lakhi akukau Ahab lau ighino pi. “AMPEU no pi ani, ‘Ghushimi kutomo akeu msakevilo! Ino ishino tipaqo shou tolupenike otsu nani, tishikeu lono nono niye AMPEU kepi ithi nani.’ ”

¹⁴“Khuuno le tughiu shinani kya?” pi Ahab no iniju, Tungkupuu no khochile, “AMPEU no pi ani alhothe ghushimino state ahng shi akeqo zahkutsu qholono le tughiu shi nani” ipi “Khuno atomi ghushimi shi akeqo zah kutsuu shi nani kya?” ipi akukauno iniju. “Nono ke” ipi tungkupuuno khochile.

¹⁵Tighenguno akukauno ghushimi lhothemi khunoqo state zahkutsumi qholo akeno panongu 232 kuphelu. Tishipuzu Israilmi ghushimi kumtsu kuqhakelo panongu 7,000 ghi kuphelu

¹⁶Benhadad no pa saphu akemi panongu shighi kini kuqhano sasu aphiki lono aji sho akelono puchouno ighino lethuve.

¹⁷Lhothemi ghushimi paghi zuiqesu puwuve. Benhadad no puwukemi aghukhemino Samaria lono ghushimi aloji lakhi cheniepi pa vilo pithi.

¹⁸Tileno pano ahza tsu, “Panonguno aghushiniye cheghina, kulakishi tsa piniye cheghi namu akuxuno panongu kugha saghilo!”

¹⁹Lhothemi ghushimi lethuve eno panongu shelo Israilmi ghushimino papesu wu

²⁰panongu lakhi khino pututa mishilo ighikeu sasu kumjono heqhi pithi thuve. Ikehu ghushimi ye Israilmino amchhi phobolesu hathu keu loye pokhave, ikemu Benhadad ye khurshi lo ikuno pokaluve eno pa gholo khurshi ghushimi khami ghi sasu cheve.

²¹Akukau Ahab no toluveno khurshi eno khurkulu kutomo suxaluvetsu eno Siriyami kutomo kughaluvetsu.

²²Tishive kethiu ti tungkupu ye akukau Ahab lau wuno pi, “Idewolo eno iwu ghushimi kutokithelo eno avehu tsaqutsalei shi kughulo, kughengu ighinikeu ghixu ghulokilo Siriya lo akukauye olenike ighi nani.”

²³Akukau Benhadad qholo kijemino pa vilo ishipi, “Israilmi lhou ye naghutoqo lhouqoe, tishikeu lono Israilmiye ningu shou toluveke. Ikemu ninguno panongu sasu aqa lono kichighi aye mutsuqhei ninguno panongu theqhiluve nani.

²⁴Itehiye, ayehkipemi pano shighi kini panongu zahkutsu lono ikhiveno panongu thelilo aqalo zahtsumi suluvelo.

²⁵Tishino ghushimi puhavekeu jehi itaghi noye ghushimi aje sukithelo, khurshi ngo khurkulu ye puzuu athoshi kutope qhilo. Ninguno Israilmi sasu aqa lono aghushini, ishiuloye ninguno panongu theqhiluve nani.” Akukau Benhadad no panongu kukutsu tsa pulovetsu.

²⁶Kuchono ghixu tusho ighikelo pano pawu timiqo hekutsuno Israilmi lenike ghenguno Aphek phughilo ighilu.

²⁷Israilmi ghi kukumqoluveno kutoluve; panonguye amqo kinishi kijeno Siriyami sasu shinike chethu. Israilmi ye Siriyami kukuju loye ane loji amqo kititi kini cheketoi ithuluve kughengu Siriyami no aluza nhakha ighiveke.

²⁸Tungkupumi lakhino akukau Ahab lau wuno pi, “Hiye AMPEU no pi ani: Siriyamino niye atoqo lhou eno aqa lhouye kumoe ipi anike ghenguno, pano wu ghushimi kutomo shou opelo toluvepeni eno tishikeu lono noghi eno iwu timiqo ghi niye AMPEU ke ipi ithilu nani!”

²⁹Atsala tsuni kutolo Siriyami ghi Israilmi ghi pututa ghazulo ngono kughungu kile juae. Atsala akutsuniu loye panongu aghu shithuve eno Israilmino Siriyami 100,000 ghiqhi pithivetsu.

³⁰Tinguno alau pokakulumiye posu Aphek phughilo iloghi kelono aphughi tupikiye huno ilawo timi 27,000 pithivetsu. Benhadad ghi posu aphughilo iloghilu eno aki lakhi akusau achekulo itshulu.

³¹Pa qholo kijemino pa lau wuno pi, “Israil lhouye kimiye kiniu ipi chilue. Ninguno yeqhiye phino ningu po khapuve, akighi kipilino ningu kuolo kuhosuveno Israilmi kukau lau wunike ahza ningu tsulo eno tishikeu lono okuxu pukhakulupu shilunimala!”

³²Kuchono yeqhiye phino panongu chita khapuve, akighi kipilino panongu kuolo hosupuveno Ahab lau wuno ishi pi, “Oqeu Benhadad no pa kuxu pukhalutsulo ipi ani.” Ahab no khochile, “Paye xuaphikesha? Alova! paye ithikuzuu lakhi toike!”

³³Benhadad qholo kijemiye atuqhudo kivi miqejuae, ike kughou Ahab no “athikuzuu,” ipi pikeno panonguno paikhavi lono patsa ikhipesu ishi pi, “Nono piveketoi, Benhadad ye othikuzuuke!” “Pa ilau saghilo” pi Ahab no ahza tsu, kughou Benhadad no ighikeno, Ahab no pa kusu.

³⁴Benhadad no pa vilo pi, “Ipuno opu u lono suxaluvekeqo taun ino otsuchileveni eno Damaska phughipe lhidi phughi khaqhilu nani ipuno Samaria lo shiketoi.” Ahab no khochile, “Nono piqhikeu kiqi lono, tishiaye ino okhaqhipheveni.” Pa sasu kulakishi shoqhi shiveno pa phe puwove.

³⁵AMPEU zahkutsu lono tungkupumi gholo lakhino pa kusau vilo pa heqhilo pike. Ikemu pano tishimove,

³⁶tighenguno pano pa vilo pi, “Kughengu nono AMPEU zahkutsu hebideve ake ghenguno abongushu lakhino nono iqhiveno cheve kemtsa otsuchuve nani.” Kuchono pano wuve kemtsa abongushu lakhi ighino pa tsuve.

³⁷Tipathiu tungkupuu ye timi kutami lakhiu lau wuno pi, “Iheqhivelo!” Timi huno kuchono piketoi shitsu, pano kugha lakhi lono pa ghaqhipe pa ghuzavetsu.

³⁸Tungkupuuye aphi suwo pagi khapuve eno paju kusuveno wo alaghilo puthugho Israilmi kukau pelo pa vechesu wupenike ngokhea.

³⁹Kuchono pa vechesu wucheke lono, ti tungkupuu huno pa kuno pi, “Akiqheu akijeu, niye aghushiqalo aghushi akelono ghushimi lakhino leluvekeu aghumi ilau sasu ighino pi. ‘Timi hipau khe aghilo; tsalatsa pano pove aye nono pa zuqhu shi okuxu tsuni ae, momu tsandiyi 3000 olau asu chuni ipi.’

⁴⁰Ikemu ino kutaulo mighimghai ake lono timi huye pove.” Akukauno khochile, “Nono olikhi otsano ashoqhi shivae, ikehu noye tipau jume tsumasae.”

⁴¹Tungkupuu huno pagi khapu akeu phi suxuve, tileno akukauye paye tungkupumi gholo milakhi ipi paju kimchiluve.

⁴²Tileno ti tungkupuuno akukau vilo pi, “Hiye AMPEU tsake: ‘Kughengu ino opelo heqhive peniye timi lakhi otsukeuhu phepupove, tighenguno nono pa zuqhulo okuxu pesu tsumasavae eno owu ghushimiye puhakhavenia, panonguno pawu ghushimi pelono pokaluve pekeu ghenguno ke.’ ”

⁴³Ikehu akukauye Samaria lo akilo ideighino ighono amlo ime mlothuve.