Read Sumi Naga KUKAMI ATUGHIU 21 Bible Online

KUKAMI ATUGHIU 21 - Sumi Naga bible

KUKAMI ATUGHIU 21

¹Jezril lo akukau Ahab kukaki phivilo timi lakhi pa je Nabot ipikeuno atsailu lakhi ache.

²Ghulo lakhi Ahab no Nabot vilo pi, “Otsailu itsuvelo; hiye ikiphivilo ani ike tipaulo ino tuxatini ghutu shinishi ani. Tipau thelilo ino atsailu kutau aloke lakhi otsuni, momu, nono pulo aghiaye, ino ame akivishi otsunie.”

³“Niye atsailu hipau isunoqo launo amheghi ighilue,” ipi Nabot no khochileve. “Hipau otsuve nikeuye AMPEU pulou kumoe!”

⁴Ahab ye Nabot no pa vilo pikeu tsa chiluno ighono pa mlo qimono agha idesu akilo wove. Pa zualo ihozuno chukeghi chumono pishipuku atozulo ju ae.

⁵Pa nipu Jezebel no pa lau ighino iniju, “Kiuno ighono omlo ime ani kya? Kushiye noye ilhumono ani kya?”

⁶Tileno pano khochile, “Nabot no ivilo pikeu tsa ghengunoke. Ino pa tsailu qhulu tsunipi, momu pano pulo aghiaye tipau thelilo atsailu kutau tsuni pikemu pano ivilo pikeuno niye khilemu tipau lumlae ipie!”

⁷“Tishiaye, noye akukau keo mokya?” Jezebel no khochile pi. “Mtazu azua lono ithuvelo, omlo shikumtoluveno chuluvelo. Ino Nabot tsailu otsuluve nani!”

⁸Tipathiu lino yesu lakhi yevetsuno Ahab jelono jemchi shiveno tipau yesu mekhaveno Jezril lo atomi shi akemi ampemiqo lau tsupuwuve.

⁹Yesulo hitoi yepua:” Atsala lakhi ikhipheno kumvu lo eno timiqo ku-kutsuno Nabot akishe agigihu tsupelo.

¹⁰Timi ghusho chekemi atuna lakhi pesu pa gizulo kughuqalo eno pama pelono paye Alhou eno akukau ghushovea ipive pelo. Tishino pa sasu aphughi khalacheu saipeno atuno veqhi pithivelo.”

¹¹Jezril lo atomi shi akemi ampemino Jezebel no ahza tsukeu kiqi lono shivetsu.

¹²Panonguno ghulo lakhi khaqhino kumvu timiqo hekutsu kumqo ngono Nabot sheqhe agigihu tsu.

¹³Timi ghusho chekeu atuna pamano Nabot ye Alhou eno akukau ghusho vea pi ngukuthuve eno pa sasu aphughi khalacheu saipeno kughupe puakeutoi atuno pa veqhi pithive.

¹⁴Tishino “Nabot heqhivae” ipikeu sutsa pesu Jezebel lau puwuve.

¹⁵Jezebel no asutsa chilu kemtsa, lino Ahab vilo pi, “Nabot ye thivae. Tighenguno noye itehi wuno pano atsailu khikhi ovilo jesumove keno tipau owu shiluvelo.”

¹⁶Paikhavi lono Ahab no atsailu tipaulo wuno pawu shiluve.

¹⁷Tileno AMPEU no Elija, Tishbe lono ighikeu tungkupu vilo pi,

¹⁸“Samaria lo akukau Ahab lau wulo. Nono ighikelo paye Nabot tsailu hu pawu shiluveniye kuto aghi nani.

¹⁹Pa vilo, ni AMPEU no ishi pi anipilo, ‘Timi ghiqhiveno noye pawu tinhemgha suxaluve anikesha?’ Pa vilo ino hi pi ani pilo: ‘Atsuqono Nabot ji mine ake alono panonguno oji ghi mine nani!’ ”

²⁰Kughou Ahab no Elija ithulukeno pano ishipi, “Ighumi, noye iphuluvea nala!” “Iyei, ino okughaluvae,” ipi Elija no khochileve. “AMPEU zulo kiuno achipi kumokeno noye tipaulo ighono amlo tsushe auvae.

²¹Tighenguno AMPEU no ovilo pi ani, ‘Oshou ghichheghime puwutsuni. Olaghalo kiptimi itimi lono iku amchou kutolo ghacheive peni.

²²Okibolomi ghi akukau Jeroboam Nebat nu toi, eno akukau Baasha Ahija nu toi khavepeni, kughengu nono Israilmi sasu axine lo ilovetsu keuno imlo shikighideve tsuae.’

²³Jezebel ghenguno AMPEU no pi ani, atsuqono Jezril phughi lono li shi chuvepe nani.

²⁴Olaghalo khuala aphughi lono thiveaye atsuqono chu nani eno khualano aluzaqha lono thive aye aluquno panongu shi mighi khavepeni.”

²⁵(Khuumu Ahab toi thwokha kumtsu axine shi AMPEU zulo achipi kumou shi-ghi pa nipu Jezebel no kipekeu lono paphi ampi kumtsu jesuvekeu toiye kuhae.

²⁶Pano ighono axine shive keuye Amarimino mlla chekeu asu-atu mllauve, AMPEU no Israilmi pelono ngolupe niye pano Amarimi yeghi lono haleveke.)

²⁷Kughou Elija no pa tsa pitavekeno, tipau mtsa lono Ahab ye pa phikuzu suxulave eno ikiqiveno yeqhiyephi uluve. Paye kumu chu shomove eno yeqhiyephi ususu zuve eno ighono pa mlo saqhiyi agi zumoi wove.

²⁸AMPEU no tungkupu Elija vilo pi,

²⁹“Ahab no kiutoi izulo mutsha ivunhei piyekeno ithulu anima? Pano tishi ilau shipiye ke ghenguno pano xuake loye pa lau ghichhe ghime puwutsumo nani ikemu Ahab laghaqo lau puwu nani.”