Read Sumi Naga KUKAMI ATUGHIU 22 Bible Online

KUKAMI ATUGHIU 22 - Sumi Naga bible

KUKAMI ATUGHIU 22

¹Ampe kini kutolo Israil ngo Siriya dolo kulakishi ache,

²ikemu akukau Jehosafat no Juda lo kakeu mpe akuthuu shi akelono paye Israil lo akukau Ahab putsa niye wu.

³Ahab no pa qholo kijemiqo iniju, “Kushiye ishi kutolo ninguye Siriya kukau launo Ramot Gilead luchilemono aphi kya? Hiye ningu wu ke!”

⁴Tileno Ahab no Jehoshafat iniju, “Noye isasu wuno Ramot lewumokesha?” “Nono kutolu kemtsa nighi wunike kuto ani iwu ghushimi eno khurshi ghushimi ghi wunike kuto ani.

⁵Ikemu atughushi ningu AMPEU launo kimchiju paghini,” ipi Jehosafat no khochile.

⁶Tighenguno Ahab no tungkupumi 400 kutolo kukutsuno panongu iniju, “Niye Ramot lewukepu keo mokya?” “Lelo, kughengu AMPEU no tokulu otsu nani,” ipi panonguno khochile.

⁷Ikemu Jehosafat no iniju,” AMPEU wu tungkupu kutamiye kuhave akesha, pa vechewo AMPEU pulou kemokeno ithinike.”

⁸Ahab no khochile, “Milakhi aphie, tiye Imla nu Mikaiya aphie. Ikemu niye paju ilochemoe, kughengu paye khilemu ighenguno akivi tungkuptsa pitsu moe; ikemu alhokuthu alhoksa likhi picheni.” “Noye khilemu tishi pikepu kumoe!” pi Jehosafat no pa khochile.

⁹Tileno Ahab no atsakukugha kudau ampi shi akeu kusuno mtazu Mikaiya sasu ighilopi.

¹⁰Akukau pamaye akuka nanu pepuveno Samaria khagholo akhache lo alakhulo iqa eno tungkupumi kumtsu pama zulo ighino tungputsa pi thuve.

¹¹Panongu gholo milakhi Kenaana nu Zedekiya ipikeuno ayino akibo shipe qhino ishi Ahab vilo pi, “Hiye AMPEU no ishi pi ani: Ayikibo hipau pesu Siriyami sasu aghushi nani eno panongu theqhilu nani.”

¹²Kutami tungkupumi kumtsuno tipatsa tho pitsu. “Ramot lenike alachelo eno noye tolu nani, AMPEU no tokulu pesu otsu nani.” ipi panonguno pi.

¹³Tishi akelono timi khuuno Mikaiya kuniye wuvekeno tipauno ishi pa vilo pi, “Tungkupu kutami kumtsu no akukau ye tolu nani ipi akhani, ikehu noghi tishi athoshi pitsulo.”

¹⁴Ikemu Mikaiya no khochile, “Akuxu MPEU je lono niye pano ivilo kiu pilo pinikeno ti pinani thono!”

¹⁵Kughou pano akukau Ahab zulo ipeghi keno akukauno pa vilo iniju, “Mikaiya, akukau Jehosafat ikujoye Ramot lewukepu keo mokya?” “Le wunithono! Noye tolu nanike, AMPEU no tokulu pesu otsu nanike.” ipi Mikaiya ghi khochiletsu.

¹⁶Ikemu Ahab no khochile “Nono kughouno AMPEU je lono pianikeno kuchou tsa pilo! Niye ghuthu khijehi ovilo pi anikya.”

¹⁷Mikaiya no khochile, “Israilmi ghushimiye bherikheu kuhano bheri apanagha cheketoi naghuto kumtsu apanagha itsu chekhani. AMPEU no pi ani. Timi hipaqoye saphetou kuhake panongu pelono iqunei akilo wovepelo!”

¹⁸Ahab no Jehosafat vilo pi, “Paye khilemu ighenguno akivi tsa piqhi mphie pi ino ovilo pikekumo shea? Alhokuthu alhoksa likhi pichenike!”

¹⁹Mikaiya no pikibe pithu: “AMPEU no kiu pi anikeno inijulo! Niye AMPEU no pawu kungumi kumtsu sasu kungughalo akuka lakhulo pa suhomxa pesu puthugho akeu ithulu ani.

²⁰AMPEU no iniju ani, ‘Khuuno Ahab pishiqhilu nani kya papelo wuno Ramot lono thive pe kepushi?’ Kungumi khamino kiuana piaye amqo lakhino pano kutashi pi ishi ae,

²¹aghahwu lakhino pukasu azuu ipeghino AMPEU lau qhuiniju ghi pi, ‘Ino pa pishiqhilu nani.’

²²‘Kishino shilu nani kya?’ pi AMPEU no inijuju. Aghahwuno khochilepi, ‘Ino wuno Ahab wu tungkupumi kumtsu pelono mikive penie.’ AMPEU no pi, ‘Wulo eno pa pishiqhilo, noye tolu nani.’ ”

²³Mikaiya no kishekha ghi pi: “Hi shipe puani. AMPEU no owu tungkupumi pelono opishiqhive anipeke. Ikemu pano pi akeuye noye avekusa sholuni cheni pi anie!”

²⁴Tileno tungkupuu Zedekiya no Mikaiya lau ighi puzu pa gilo ghatsu eno ishi iniju “AMPEU ghunguye kughouno ipheveno oputsa ighi kya?”

²⁵Mikaiya no khochile. “Nono kokuthabo alou itshuniye wuke tsalanino nono ti phulu nani.”

²⁶Tileno akukau Ahab no pa qholo kijemi lakhi ahza tsu ghi pi, “Mikaiya kughaluvelo eno pa sasu aphughilo ahng shi akeu Amun ngo akukau nu Joas pama lau sawulo.

²⁷Pama vilo pa kughapesu akughukilo khatha puaghilo pilo eno asho ngo azu likhi pesu ino akivishi ideghimoke kutolo tsu aghipelo.”

²⁸“Tsala nono achipishi ide ighilu aye AMPEU ye iputsa puamoepi ithivelo!” Tilikhi kumono highi ishipi, “Nongu kumtsu ino itehi kiu piqhi keno iniju pualo!” ipi Mikaiya no pive.

²⁹Tithiu Israil lo kukau Ahab ngo Juda lo kukau Jehosafat pamaye Gilead yeghilo akeu Ramot phughi lenike ghenguno cheve.

³⁰Ahab no Jehosafat vilo ishipi, “Nikujono aghushiqalo ilokithishi, niye ananu kiliveno iju kusuveni, ikemu noye okuka nanu pepulo.” Ike Israil kukauye pa jukusuveno aghushiqalo ilo.

³¹Siriya kukau no pawu khurkulu kusami pano shighikini ahza tsu keuno kutami khumu lekevini Israil kukau likhi lelopi ahza tsue.

³²Tighenguno kughou panonguno akukau Jehosafat ithulukeno, panongu kumtsuno paye Israilmi kukau kughashi kumsulukhave eno pa lethunikeu shiuve. Ikemu pano kughouno ighamuku ithughikeno,

³³paye Israilmi kukau kumoe pi kimchilukhave eno pa hache keu lono ngokhave.

³⁴Akumgha kumoshi, mthano Siriyami ghushimi lakhino pa leghuthi kapuwu kelono akukau Ahab chishiqholo kasuvetsu. “Niye izavae!” ipi pawu khurkulu sakicheu vilo pi. “Aghushiqa lono tsughu kide susu ipeluveni kholo!”

³⁵Tipatsalani ighono tamomithe aghushi auve eno akukau Ahab ye khurkulu lo ilo ngono puthughono Siriyami lau jupuwo ae. Pa ghuzaku lono kumzapushi ahji chijikeuno khurkulubo chhive eno paye kijiliuye thive.

³⁶Tsukinhe ilokichelau asutsa hipau ghushimi gholo vekuphave, “Timi kumtsu pututa ghakhu eno pututa phughilo idewovelo!”

³⁷Hitoi shi puzu akukau Ahab ye thive. Pa sukumoye Samaria lo puwuno tile qhove.

³⁸Pawu khurkulu huye Samaria zukucho lono qhukimtheve khile kusakhamino azukuchhu chekeno eno pajiye atsuqono mineve, AMPEU no azuuno pipuake toi shive.

³⁹Akukau Ahab no shikeu eno akukaki lo akuha huno tunatunu shikeu hekukutsu eno pano aphughiqo shikeu hi kumtsu Israil Kukami Xughili kakulo yekutsupe qhipuani.

⁴⁰Pano thiveke lono panu Ahazia no pa shelo akukau shiluve.

⁴¹Akukau Ahab no Israil lo kakeu mpe abidiu shi ake lono Asa nu Jehosafat ye

⁴²apunu mpe shighi pungu shi akelono Juda lo akukau shiluve eno paye Jerusalem lo ampe muku pungu ayehpelu. Paza jeye Azuba, liye Shilhi nongake.

⁴³Pa zulo papu Asa toi paye AMPEU zulo kiuno achipi keno tipau mlatsu; ikemu Alhou phimokemi kumlla-a qoye shipusamono ache, ikehu timiqoye tamono aghakishi kumlla eno piti kumnakeu pesu tipaqo lono tsucheke.

⁴⁴Jehosafat no Israil kukau sasu kulashilue.

⁴⁵Jehosafat no mlakeu kumtsu pa mlo kuloghi ghili pa ghushiqo ghili hi kumtsu Juda lo Kukami Xughili kakulo yekutsupe qhipuani.

⁴⁶Papu Asa ghuloki lono acheghikeu shupu salha kemi hipaqono Alhou phimokemi kumllalo mla cheghikeu kumtsu shipuhavetsu.

⁴⁷Edom yeghiloye kukami kuha; ikehu Juda lo akukauno kishepuwukeuno ayekipeu shiche.

⁴⁸Akukau Jehosafat no azughilo iqhoiqi lukepu zukilu kije mlano Ofir yeghilo shuna puwu nikeu shie, ikemu khilemu wumlaveno Eziongeber lono zukilu tipau shipusave.

⁴⁹Tishive kelono Israil lo kukau Ahab nu Ahazia no pawu timiqo hapesu Jehosafat wu timi sasu wupenikeu shi akukumsu tsukemu Jehosafat no tipau pulo tsumove.

⁵⁰Jehosafat ye thive eno pa kumoye David phughilo kijemi kumo qhochekeu alo qhove eno pa nu Jehoram no pa shelo akukau shiluve.

⁵¹Jehosafat no Juda lo kakeu mpe chighi akutsuniu shi akelono Ahab nu Ahazia no Israil lo akukau shiluveno Samaria lo ampe kini ayeh pelu.

⁵²Paye AMPEU gizulo papu Ahab eno paza Jezebel eno akukau Jeroboam khuuno Israilmi sasu axine lo sailove keno tipaqo toi axine shive.

⁵³Paye Baal mlla eno huthuche eno pa zulo papu toi Israil Lhou AMPEU mlo shikighidevetsue.