Read Sumi Naga KUKAMI ATUGHIU 3 Bible Online

KUKAMI ATUGHIU 3 - Sumi Naga bible

KUKAMI ATUGHIU 3

¹Solomon no Ijip lo akukau Farao nga sasu kulano pa sasu kutshu kimeluve. Pano li sasu ighino akighiki, Akumllaki eno Jerusalem homxa atupi yelumoke kuto David phughilo ache.

²Akumllaki AMPEU ghenguno shimono achekehu timiqoye apanaghano akumllagho pesu a-a kututa lono tsuche.

³Solomon ye AMPEU kimiyeche eno papu David no mije tsukeu papeche, ikemu pa ghi tughashi kutomo heqhino a-a kini kuthu lono akumllagho tsuche.

⁴Ghulo lakhi paye Gibeon lo akumllagho tsunike wu, kughengu tipa alono ighono ajekipi kumlla kiptia acheke; Solomon no tipa a lono ghuthu 1000 shoumu akipti kumllagho tsucheke.

⁵Tipaji Gibeon lo akelono AMPEU no asamouno pa zulo ipeghino pa vilo iniju, “Ipelo kiu otsupenishi ani kya?”

⁶Solomon no khochile, “Nono ipu David oqeu lau kimiyekeu kije piye, paye osasu akivishi aghokulu shi eno amikucho qholono xuche. Nono tamo mitheno pa kimiye keu michipu kije kiqi lono anu lakhi pa tsue, tiye ishi pa zuqhushi ayehpe akeuke.

⁷O, AMPEU Alhou, nono ipelono ipu zuqhushi akukau shilupe, niye ighono lhothemi eno kiutoi ayehpekepu keno mthae.

⁸Kihikha kumla timi hijejehi gholono owu shinike nono ikishelue.

⁹Tighenguno timiqo shou achipiu eno kivikusa kimchiluno ayeh pelu penike alokutsu itsulo. Tishimokeloye owu timi hijejehi shou kishi puzu ayeh peluni kya?”

¹⁰AMPEU no Solomon no khuakeu pulove,

¹¹ike pano pa vilo ishipi, “Nono oxupushu penikeu, moaye akuakini, momu oghumi pithivetsu penikeu zuqhulo kiutoi achipiu lono ayeh penike ghenguno alokutsu khuke,

¹²nono khu akeu shitsuni. Ino alokutsu eno kimchi kulupu kighithi otsuni, khunomu ozuu eno othiu otoikeu lokutsu ipeghimo nani.

¹³Nono khumokeu ghi ino otsuni: okuxu kupujulo kukami kutami nguno alaushi kinimi eno akishe agigihu ithulupeni.

¹⁴Nono igholu iyezahqo eno ahza kutsu opu David no shiketoi pelu aye ino opelo axupushulupe nani.”

¹⁵Solomon no idaithughive eno Alhou no asamouno pa putsakeu ithiluve. Paye Jerusalem lo wuno AMPEU wu Puloshoqhi Bohu zulo puthughono akipti eno kuposhukulu kumllagho shipe AMPEU tsu. Tishiveno pa qholo kijemi kushumiqo kumtsu aghulhu tsulu.

¹⁶Ghulo lakhi kusalhalimi kini ighino akukau Solomon zulo puthugho.

¹⁷Pama gholo lakhino ishipi, “Akijeu, atopuu hipau ikujo kumtsa aki lakhilo acheni eno li kua lono ino anu lakhi punulu.

¹⁸Ino punuwo atsala akuthuni li ghi kiptimi lakhi punu. Aki tipaulo ikujo likhi acheni—kutami ye khumu kuhae.

¹⁹Ike atopuu hipau nuye putho lono lino qhadape thive aghi.

²⁰Ike liye zubumta lono ithuveno ino zu akelono inu ikhisuwuvetsu no li nga akithiu pesu iphivilo puzuvetsu aghie.

²¹Ino thanau ithughino inga lojiniye kelaye akithi shive aghie, ike ino tsaqutsalei ju kelauye tiye ino punukeu nga kumove aghie.”

²²Ikemu atopuu lakhiuno ishipi, “Moe, xuakeuno inue eno thivekeu huno onue!” Atopuu atughiuno khochile pikithe, “Moe, thivekeuno onu eno xuakeuno inue.” Hitoi pama akukau zulono kighekile ae.

²³Tileno akukau Solomon no pi, “Nokujo kinikujono xuakeu nga pukha ani eno thivekeuno lakhiu nga ipi auve.

²⁴Azuta hilau sughilo,” ike azuta akukau lau pe ighitsu.

²⁵Pano pi, “Xuakeu nga ghitha kini shino tuxaxano atopuu pama kijevetsulo.”

²⁶Tileno aza kuchouye li mulolo ighono li nu kimiyekeu ave eno lino pi, “Akijeu, kimiyeno ghiqhi tsukevilo! li tsuvelo!” Ikemu atopuu lakhiuye ishi pi, “Ikujo khuu khuumu tsukevino anu xuakeu xapho kini shive tsulo.”

²⁷Tileno Solomon no ithiveno pi, “Anga heqhi kevilo! eno atopuu atughiu tsuvelo, kughengu lino anga paza kuchoue.”

²⁸Kughou Israilmi no Solomon xakutha hipau chilukeno kumtsuno Solomon akiqheu lono asukumsa pa tsulu, kughengu Alhou lokutsu pa lolo akeu vechewo ighono shikusa kukupuna akeu achipi lono xathavetsuke.