Read Sumi Naga KUKAMI ATUGHIU 9 Bible Online

KUKAMI ATUGHIU 9 - Sumi Naga bible

KUKAMI ATUGHIU 9

¹Akukau Solomon no akumllaki ngo akukaki thwokha pano kumsu pulo chekeu toi shiqhilu khavekethiu

²Gibeon lo toi AMPEU no akiniu pa zulo ipeghi.

³AMPEU no pa vilo pi, “Ino okighini chiluvae. Nono alhokuthu imllapeniye akumllaki shitsukeu-a ino shikimthe tsu ani. Ino ado kumtsu lo ti khe eno sushotsu anani.

⁴Tsala nono opu David no shike toi amikucho lono ihuthu eno kutupo kuqha aye eno nono iyezahqo gholu eno thwokha ino ahza tsukeu kumtsu pelu aye,

⁵ino opu David lau hitoi piqhi puakeu pa lagha lono ighikeuno Israilmi shou alhokuthu ayehpe nani ipi ino pikeutoi shikupu tsu nani.

⁶Ikemu tsala nomu, olagha lono ighikemi mu ipapemove, tsala nono ayezahqo eno ino ahza otsukeqo hebideveno alhou kutau mllauve aye,

⁷ino iwu timi Israilmi ino ayeghi panongu tsuvekeu alono hapheve nani. Imllapeniye a-a khikhi ino shikimthe vetsu akeno akumllaki hipau ghi phevetsu nani. Tithiuye a-a kumtsu lono timiqono Israilmi jukunathano pipusauve nani.

⁸Akumllaki hipauye ixapiniyive nani eno hipau veche iqhoiqi chekemi kumtsuno akichiqhi akumzave nani. ‘Kushiye AMPEU ye hipa yeghi shou eno hipau kumllaki shou hi shivetsu kela?’ ipi panonguno iniju nani.

⁹Timiqono khochile nani, ‘Kughengu panonguno AMPEU panongu Lhou khuuno panongu puasuqo Ijip lono sasu ipeghi keu kumsumaveke. Panonguno alhou kutau qhoqhuuveno tipaqo mllauveke. Hi ghenguno AMPEU no panongu shou shikupsa hipau pukutsue.’ ”

¹⁰Solomon ye ampe muku luno akumllaki eno pa kukaki shiqhilu.

¹¹Tur lo akukau Hiram no Kedar ngo asahusu eno shuna kumtsu hipa kumlalo avehupu shi akeu tsuke. Ikehu akukau Solomon no Galil sukumxa lo taun muku pesu Hiram tsuke.

¹²Hiram no tipaqo juwu, ikemu paye tipaqo lunishimove.

¹³Tighenguno pano Solomon vilo ishi pi, “Ithikuzuu, nono taun itsukeqo ye kiutoi keu kya?” Eno pano taun tipaqo je pesu Kabul kutsue eno ishi kutolo aje tipau aphie.

¹⁴Hiram no itaghi shuna kilogram 4000 shou Solomon tsupuwu.

¹⁵Akukau Solomon no akumllaki shiqhinike ghenguno eno aphughi tsukinhe kipelau ayeghi shepichhi nike eno aphughi tuppi yenike ghenguno akumlami anguka lono peitha. Tinguno alaughi Hazor, Megido eno Gezer phughiqo shikithe nike ghenguno akumlami peitha.

¹⁶Ijip kukauno Gezer leno qhasuluve, aphughi tipaulo xukuami Kananmi heqhivetsu eno ami su pitivetsu. Tishino athiuye pa ngano Solomon sasu kulakupu shike lono ameh shighi aphughi tipau Solomon tsuve.

¹⁷Solomon no Gezer gholo asaye phughi Baakat, Tamar eno BetHoron chhiliuqha kumtsu shikitheluve.

¹⁹Tilikhi kumono athi pekutsu kepu phughiqo, khurkulu sakichemi ngokepu phughi, khurkulu qhikepu phughi eno Jerusalem kupunulo ai-sui vekelo kuphukulupu shi hekutsukeu phughi, Libanon to eno pa kuka qholo ayeghi kumtsu aphughi shikithe pesu qhilukhave.

²⁰Pa kumla shipenike Kananmi polo kughuko khunoqo Israilmino pano yeghi kumtsule ake ghulokilo heqhi khamove keno Solomon no tipaqo peithae. Ike tipaqoye Amarimi, Hatimi, Havimi eno Jebusimi khunoqo ishi kutolo aqemi shi ghi aphikeno tipaqo peithae.

²²Solomon no Israilmiye aqemi shi peithamoe; panonguye ghushimi, kijemi, ahzakutsumi khurkulu sakiphetou eno khurshi ghushimi kiqi lono peithae.

²³Solomon no akiqo shiwokelo akumlamiqo shou jukukutsuu shipenike saphetomi pano 550 qhilu.

²⁴Solomon no pa nipu Ijip kukau nga David phughi lono kiqhe sasu pano pa nipu ghenguno mlatsukeu alo iloghiluve kethiuno paphughi tsukinhe kipelau akeu Millo phughi mlalu.

²⁵Ampelo ghuthu kuthu piti kumllagho eno kuposhu kumllagho ishi pesu Solomon no AMPEU ghenguno akiptia mlatsukeu alono tsunikeu shilu. Pano piti kumnakeu xokivi ghi pesu AMPEU tsu. Hitoi shino paye akumllaki shiqhiluve.

²⁶Akukau Solomon no Edom yeghilo akeu Akuhu Zughi mukulo Elat phivilo akeu Eziongeber lo zukilu mlape qhilu.

²⁷Akukau Hiram no pawu azughilo mlachekemi puju shijuvekeqo pa zukilu lono hapesu Solomon wu timiqo kuphu tsulu.

²⁸Panonguno Ofir yeghilo wuno shuna kilogram 14,000 shou peighino Solomon tsu ke.