Read Sumi Naga KUKAMI AKINIU 11 Bible Online

KUKAMI AKINIU 11 - Sumi Naga bible

KUKAMI AKINIU 11

¹Akukau Ahazia paza Athalia no li nu heqhivekeu sutsa chilu kemtsa, lino akukau bolomi alagha kumtsu heqhi pithivelopi ahza tsu.

²Ahazia nu Joas likhino pokalu. Pa ghi kutami gholono heqhi pithiveniye akelono pani Jehosheba, khuu akukau Jehoram ngakeno eno Ahazia chepukeno tipauno pa kusuluve. Lino pa eno pa sakuputhuu pama pesu achinekilo azuabolo Athalia msano kughutshuve, tishi keu lono pa heqhi lupemo niyeke,

³Ampe tsugho kutolo Jehosheba no anu achineki lo kusupe qhino tucho hejuche, tiye Athalia no kukaliu shi ake kutolo.

⁴Ikemu ampe akutsuniu loye achineu Jehoida no akukau khemiqo shou akijeu ngo akukaki ghukhemiqo kuwupe eno panongu vilo achinekilo ighipe puzu pano kiu mlaniye kughupe qhipuakeno tipaulo pulo kuqhalepi ashoqhi tsu. Pano akukau Ahazia nu Joas kusupe puakeu panongu piye

⁵eno ahza hipaqo panongu tsu: “Kughou nonguno Sabat tsalani lo aghukhedo ighinikeno, nongu kikije kuthulo saje lakhiye akukauki khelo;

⁶eno saje lakhino Sur khagho khelo eno saje akuthuuno ti khagho khe akemiqo thiu ngokhelo, achineki khe akeqo kivetsughu kepu shilo.

⁷Amqo kini huno Sabat tsalanilo aghukhedo shi move aye achineki ghukhemino akukau ghukhedo sukusho shini.

⁸Nonguno azuta sujope akuobolo bepe akukau Joas ngokhelo eno pano khila khilau wumu pa papesu ngokhelo. Khu khumu nongu phi ijehkhoi ighikeuye heqhivelo.”

⁹Akijeuno Jehoida no kishekulu mije tsukeu initsuno panongu wu timiqo palau saghitsu— khunoqono aghukhedo shimove niye anikeno eno khunoqono aghukhe dolo wuniye anikeno kumtsu sasu ighitsu.

¹⁰Pano angu eno azutoqo khikhi akukau David no Achinekilo qhipuache keno tipaqo ikhipe kijemi kuphatsu,

¹¹eno akukau sushope nike ghenguno azuta kipemi pelono Achineki zuu homxapesu ngokheluvepe.

¹²Tishi kheluve kethiuno Jehoida no Joas khalacheu saipeghi puzu akutsu kuqho pesu pa kutsulo betsuno akuka yehkipe yezah kaku lakhi pa tsu. Hitoi shino Joas pesu akukau shi kisheluve. Timiqono au kukhu eno ighamuku pi, “Akukau axupushu peniu!”

¹³Kukaliu Athalia no aghukhemiqo eno timiqono mubumughu akeu sutsa chiluno mighimghai posusu Achineki khipa alo timiqo kuho akeno tile ighilu.

¹⁴Tile lino achineki kulaghilo atsukucho phivilo akitheu akukau ye akhuayeh kiqi lono puthugho ngo akeu ithulu. pa suho mxapesu kijemiqo, afuko kuighamiqo eno timiqo kumtsuno alokivishi igha eno afuko igha ae. Ikeuloye Athalia ye amlo ghime launo li phi suxu eno ighamuku pi, “Pishikiqhie, pishikiqhie!”

¹⁵Jehoiada no achineki hokumxa loye Athalia heqhi pithimo nike ghenguno, ghushimi shou akijeu lakhi ahza tsu: “Aghukhumi ajo kini dolono li sasu ipelo eno khuuno li hakhoniye cheghini keno tipau heqhi pithivelo.”

¹⁶Panonguno li sunhe pesu akukaki lau sawu eno Khurshi khagho ipikeu a lono li heqhive.

¹⁷Achineu Jehoiada no akukau Joas eno timiqo pelono AMPEU lau puloshoqhi lakhi shipe, tiye panonguye AMPEU wu timi shinie pikeu shoqhi ke.

¹⁸Tishino timiqono Baal chinekilo ilopuzu tipau hexapiniyive tsu; akumlla khache eno asu-atu julho kumtsu kubolevetsu eno Baal chineu Matan akumlla khache zulono heqhi pithive. Jehoiada no achinekilo aghukhemi pelono ngokheluvepe,

¹⁹tishino pawu, kijemi, akukau ghukhemi eno akukaki ghukhemi ishino achineki lono khe sasu akukaki lo sawu eno timiqo kumtsu no ti papesu wu. Joas no aghukhemi khagho-a lono iloghi puzu akuka lakhulo ngoluve.

²⁰Timi kumtsu alokivino chhitoiluve, eno aphughi iqu-ighaive, tiye Athalia akukaki lono heqhi pithivekeu ghenguno ke.

²¹Joas no pa punu mpe tsuni shi ake lono Juda lo akukau shiluve.