Read Sumi Naga KUKAMI AKINIU 16 Bible Online

KUKAMI AKINIU 16 - Sumi Naga bible

KUKAMI AKINIU 16

¹Remaliya nu Peka no Israil lo kakeu mpe chighi akutsuniu shi ake lono Ahaz, Jotham nuno Juda lo akukau shilu

²apunu mpe muku shi akelono Jerusalem lo ampe chighitsugho ayehpelu. Paye pasu David kumla kivi laghi papemove eno tishinike zuqhu kiuno AMPEU pa Lhou pulou kumokeno tipaqo shiuve

³ipuzu Israil lo kukamiqo kumla laghi papeuve. Paye panu ghi kugha pesu akipti kumllagho shipesu asu-atu tsuve. Israilmino iloghike ghulokilo AMPEU no haphevekemi timiqono aghuthi kusupu shichekeu toi mllae.

⁴Asu-atu kumlla-a atolo, asubo kicheqholo, hipaqo kumtsulo Ahaz no aghakishi eno piti kumnakeu gho tsue.

⁵Siriya kukau Rezin ngo Israil kukau Peka pama kuqhano Jerusalem le eno homxa bothaluve, ikemu Ahaz lemlave.

⁶(Tipau mtsa lono, Edom lo kukauno Elat phughi qhasuluve eno Judami khunoqo tile achekeno tipaqo halevetsu. Edommino Elat lo le ighino tile acheuvekehu.)

⁷Ahaz no Asiriya lo kukau Tiglat Pilaser lau asutsa hipau puwu: “Niye oqeuke, ighino Siriya kukau eno Israil kukau pama ulono ixaphelu tsulo kughengu pamano ni le-ighi ani.”

⁸Ahaz no Achineki eno akukaki lono tsandiyi ngo Shuna ikhiluno akukau lau akuzu agho shi tsupuwuve.

⁹Tiglat Pilaser no Ahaz no qhuiniju keu kiqi lono pawu ghushimi sasu Damaska le ighino toluve eno akukau Rezin heqhi pithive eno pawu timiqo kugha sasu Kir lo akughu shi cheve.

¹⁰Kughou akukau Ahaz no Damaska lo wupuzu akukau Tiglat Pilaser sasu kusholukeno pano tipa alo akumlla kiptia ithulu puzu titoike lakhi kishekulushi ajulho mlape achineu Uriya lau tsupuwu.

¹¹Tighenguno Uriya no titoike kumlla kiptia lakhi mla eno Ahaz no ide ighimphi lono mlaqhive.

¹²Damaska lono ide ighike lono Ahaz no akumlla kiptia mlaqhipe puaghikeu ithulu,

¹³tighenguno pano lhoxu ngo tuxatini kumlla pesu tipau shouno mlla eno aji kumlla eno ahji vechewo kuposhukulu kumlla shi tipau shou pelepuku.

¹⁴Alazayi no shikeu kumlla kiptia khikhi AMPEU lau tsukeno tipauye akiptia akitheu ngo Achineki kumadolo ae, tighenguno Ahaz no tipau tukiqhe pesu akumlla kiptia akitheu ahuu kudau qhive.

¹⁵Tishino pano Uriya ahza tsu: “Iwu akumlla kiptia hipau lono inaqhe piti mllachekeu eno kijiliu tuxatini kumlla shipesu akukau eno timiqo ghenguno piti mllakeu eno tuxatini kumlla shitsulo eno timiqo ghenguno aji kumlla shilo. Tipau shou tughashi jih khikhi pesu aghakishi shive akeno lesulo. Ikemu alazayi no shikeu kumlla kiptia ye ighenguno qhitsulo, ino tipau lono chinini.”

¹⁶Uriya no akukauno ahza tsuketoi shivetsu.

¹⁷Akukau Ahaz no Achineki lono alazayi no shikeu tukuhau bo kutashive eno chitakhu ikhipheluve; pano alazayino shikeu azughochekeu khikhi amshitsu chighi kini thiu qhipua chekeno tipau ikhiluve eno tipau thelilo atu pesu aboqha ghovetsu.

¹⁸Asiriyami kukau zuvu shitsuniyeno Ahaz no Achinekilo akuka lakhu qhipua chekeu kiptia ghi ikhive eno akukauno luthu laghi shi Achinekilo ilocheke laghi khave.

¹⁹Akukau Ahaz no kiu mlakeno ti kumtsu Judami Kukami Xughili kupasukeulo yepe puani.

²⁰Ahaz ye thive eno David phughilo kukami qhocheke alo qhove eno panu Hezekiya no pa zuqhulo akukau shiluve.