Read Sumi Naga KUKAMI AKINIU 18 Bible Online

KUKAMI AKINIU 18 - Sumi Naga bible

KUKAMI AKINIU 18

¹Elah nu Hosheya no Israil lo kakeu mpe akuthuu shi akelono, Ahaz nu Hezekiya no Juda lo akukau shilu

²apunu mpe muku pungu shi akelono eno paye Jerusalem lo ampe muku toku ayehpelu. Pazaye Abija, Zekharia no ngake.

³Pasu David toi paye kiuno AMPEU puloukeno tipaqo mlatsu.

⁴Asu-atu kumllaqo hexapevetsu, athigho shosu puakeu tuqu tulavetsu eno Ashera lhouliu julho shisu puakeuqo kumtsu kubolevetsu. Muse no shitsukeu alazayi no shikeu pighi julho khikhi Nehustan ipi kuchekeno tipaughi kubo piniyivetsu. Tikutolo Israilmiye tipau gihukeu michipu shi-ghi piti kumnakeu shisu ighi.

⁵Hezekiya no AMPEU Israil Lhou shou pulubelu ae; Juda yeghilo pa toikeu kukami lakhimu pa zuumu pa thiumu kuhae.

⁶Paye AMPEU lau ighono aghokulumi eno khilemu pa hebidekeu shimoe, ikemu AMPEU no Muse tsukeu yehza kumtsu tsaqutsalei peluchekemi.

⁷Tighenguno AMPEU no pa gholo ae eno pano kiu shikeno ti kumtsulo tokulu shilue. Pano Asiriya kukau sasu kumjo eno khilemu pa qholo womoe.

⁸Pano Filistiyami levetsu eno panonguno kughuna akeqo a apheu aghulo lono aphughi kijeje kutolo, Gaza eno tipau sukumxalo akemi kumtsu leluvetsu.

⁹Hezekiya no kakeu mpe abidiu shi ake ghulokilo Hosheya ye Israil lo kakeu mpe akutsuniu shia—tipaghuloki lono Asiriya lo kukau Shalmaneser no Israil le iloghi eno Samaria phughi bothaluve.

¹⁰Botha lekeu mpe akuthuu loye Samaria phughiye ikiqive; tiye Hezekiya no kakeu mpe akutsughou shi akelonoke eno Hosheya no kakeu mpe atokuu shi ae.

¹¹Asiriyami kukau no Israilmi kugha sasu Asiriya yeghilo akughushi sawuve eno panongu khamiye Gozan distrik lo Habor ghoki mukulo Hala phughilo ngovepe eno khamino Mediya phughilo ngovepe.

¹²Samaria ikiqivekeuye Israilmino AMPEU panongu Lhou gholumoke ghenguno eno pano panongu sasu puloshoqhi shikeu kubove eno AMPEU qeu Muse no tsukeu yehzaqo hebideveke. Panonguno initsumoe eno panonguno aghokulu shimoe.

¹³Akukau Hezekiya no kakeu mpe chighi abidiu shi akelono, Sennakerib, Asiriya kukau no Juda yeghilo putukha puakeu phughiqo lethu eno tipaqo leluvetsu.

¹⁴Hezekiya no asutsa lakhi Sennakerib Lakis lo ngo akeu lau tsupuwu: “Ino kuquve ake, kimiyeno le-ighi tsukevilo eno nono kiu khunikeno ino ti otsuni.” Tileno akukauno Hezekiya vilo hitoi khochile puwu—tsandiyi kilogram 10,000 shuna no kilogram 1,000 ishi tsulo ipi.

¹⁵Hezekiya no Achineki eno akukakilo akeu kini pekutsu puakeu lono tsandiyi kumtsu tsupuwu;

¹⁶eno Achineki hukikhaqolo shuna dapuakeu chuxaqhi eno ahukikha tsukuchoqolo pano shunano kuzupuakeu kumtsu lhaluveno hekutsukiyi kichekumqono pesu Sennakerib lau tsupuwuve.

¹⁷Asiriya kukauno Lakis lono paw ghushimi kutomo hapesu Jerusalem lo Hezekiya le penike puwu; tiye pa qholo ighono atomi zahtsuu kuthuno sasu leupeke. Kughou panonguno Jerusalem lo ighikeno aphimini mlachekeu kumlamiqono ngochekeu laghi pukhaluve khile ahuu achekeu zukikhe lono azu luakeu zulalo ngove.

¹⁸Tishino panonguno akukau Hezekiya ku-puwu, ikehu pa qholo kijemi kuthu hipaqono panongu sasu kusho nike wu: Hilikiya nu Eliakim, akukaki lo ayehpe tou; Shebna kughakibolo akijeu; Asaf nu Joa khuuno thwokha kupasu yekutsupe qhichekeno pano kuthuno ighino panongu sasu kusholu.

¹⁹Asiriyami kijemi pano kuthu gholo milakhino hishi pi akukau Hezekiya ye kiu pukhube pesu pa mlo mutotoi anikeno Asiriya lo kukauno ithinishi ani pi anie.

²⁰Nonguno pie pikeuno nonguye ghushimi kuka eno akumto ani ipi animu adou tsa likhi picheni.” Nonguye khuu pukhube pesu Asiriyami sasu kumjo anikya?

²¹Nonguye Ijip shou lakuju shi animu amutubo lakhi pesu akusu shi aketoi keuke, tiye paikhavi lono icheveno amihino nongu ulo qhuzuvetsu nani. Tihutoi Ijip lo kukauye khu khumu pa laju ighikelo tishive nani.”

²²Asiriyami kijemi no highi ishipi, “Ikeo nonguye AMPEU nongu Lhou shou pukhube aghiaye ivilo pilo? Kughengu AMPEU chineki ngo akiptiaqoye Hezekiya no shipsa hexakhavea, ipuzu pano Juda lo timiqo eno Jerusalem lo kuamiqo vilo Jerusalem lo akeu kumlla kiptialo likhino mlla lunanipi pithivae.

²³Ino akukau jelono nongu sasu alhi kughanishi ani. Ino khurshi 2,000 nongu tsunike tile ikuno sawunikemi timi phulu nanima!

²⁴Nonguye Asiriyami ayevekupu aghulou sasu mu mujo mlae, tishi pulaghi nonguye Ijipmino khurkulu ngo khurshi kusami nongu tsupuwu nanipi laju ani kya?

²⁵Nonguye ino nongu ghakhu AMPEU kukuphu sumono le eno shipsave tsu anikughashi kumsu anike sha? AMPEU no pa ampino ivilo pikeuno leno shipsave tsulopi vae.”

²⁶Tileno Eliakim, Shebna eno Joa pano kuthuno akijeu atou vilo pi, “Aramik tsauno niputsalo kughengu ninguye ti ithi anike. Ibrimi tsauye niputsa kevilo; kughengu aliwo kuptu alou kuami kumtsuno iniju anike.”

²⁷Ikemu tileno Asiriyami akijeu atou huno khochilepi, “Asiriya lo akukauye ipelono nongu eno akukau Hezekiya vilo likhi pipenike ihapuwumoe. Ikemu timi khunoqo ti aliwo lo iqa ngo anikeno panongu viloghi hipaqo thime pipenike puwue. Kughengu nongu kumtsu aphiphishi pututa ba-pujo chu-sho penikeu shivae.”

²⁸Tileno Asiriyami akijeu atouno Ibri tsauno ighamuku asheshu pi, “Asiriya lo akukauno nongu vilo piakeu tsa inijulo!

²⁹Hezekiya pelono nongu pishiqhi pekevilopi pithi puwu ani. Kughengu Hezekiya ye nongu xalumo nani.

³⁰Pa pelo nonguye AMPEU shou pukhubelo pikeu tsa pesu nongu zu apekevilo. Khilemu AMPEU no nongu xalu nanipi kumsu kevilo eno pano ni Asiriyami ghushimino nongu phughi le ighikeu lono lakha luvetsu nanipi lajukevilo.”

³¹“Hezekiya tsa khilemu inikevilo. Asiriya lo akukauno nongu vilo aphughi lono ipeghiveno pa zulo ighivelo ipi ahza nongu tsu ani. Tishi aye nongu pelo pututa tsailulo atsaithi eno pututa subolo khughuthi xochulu pe nani eno nongu zukikhelo azu sholupe nani.

³²Asiriya kukauno nongu kughapesu nongu yeghi toike alo sawo qhimoke kutolo—a-a khileno atsailu vechewono asho shilu cheni ishikeno; hiye oliv yeghi, oliv teli eno akhi ngozu achekeu yeghike. Tsala pano ahza tsukeu nonguno shi aye nonguye thimo nani, ikemu xulu nani. Khilemu AMPEU no nongu susholu nanipi Hezekiya no pikeu tsano nongu pishiqhi pekevilo.

³³Ashiayeh kutau lhouqoye Asiriya kukauno pano yeghi le ighikelo pano yeghi susholu keu shipu anima?

³⁴Xamat eno Arpad lhouqo itehiye khile ani kya? Sefarvaim, Hena eno Ivva lhouqo khilehi akhani kya? Panongu khauno Samaria xaluo?

³⁵Ashiayeh hipaqo lhou khuuno ni kukau ulono pano ghakhu xalupe puani kya? Tishiaye, nonguye kishi puzu AMPEU no Jerusalem xalu nanipi kumsu ani kya?”

³⁶Akukau Hezekiya no panongu vilo atsa lakhimu pikevilo pikeu kiqi lono timiqoye inaqhoi ngokhave.

³⁷Tileno Eliakim, Shebna eno Joa pano kuthuno amlo ghime launo pano kuthu phi suxuve eno Asiriyami akijeu no kiu pikeno tipaqo sutsa pewo akukau Hezekiya vilo pithi.