Read Sumi Naga KUKAMI AKINIU 2 Bible Online

KUKAMI AKINIU 2 - Sumi Naga bible

KUKAMI AKINIU 2

¹AMPEU no amlhu lono Elija sasu kungughalo saikuve kepu ghuloki ighive. Elija ngo Elisha pama Gilgal lono alachesu

²wucheke lono Elija no Elisha vilo pi, “Hilehi ngo aghilo; kughengu AMPEU no ivilo Bethel lo wulepi ahza itsu ani.” Ikemu Elisha no khochile, “Ino xukuau AMPEU, khuu ino huthu cheni keno paje lono pi anike niye khilemu ophemoe.” Tileno pama kumtsa Bethel lo wunikeu shive.

³Bethel lo akemi tungkupumi aloji lakhino ipeghino Elisha vilo ishi iniju, “AMPEU no olauno ishino ompeu Elija sasu wuveni chenike noye ithi anima?” Elisha no khochile, “Niye ithi ani, ikemu ningu tipatsaye kughamono aghini”

⁴Tileno Elija no Elisha vilo pi, “Itehi hilehi ngo aghilo, kughengu AMPEU no Jerikho lo wulepi ahza itsu ani.” Ikemu Elisha no khochile, “Ino xukuau AMPEU, khuu ino huthu chenikeno paje lono pi anike, niye khilemu ophemoe.” Ikehu itaghi pama kumtsa Jerikho lo wuve.

⁵Jerikho lo achekemi tungkupumi aloji lakhino Elisha lau ighino iniju, “AMPEU no ishino olauno ompeu Elija sasu wuveniye akeu noye ithi anima?” Elisha no khochile, “Niye ti ithi ani, ikemu ningu tipau ghiliye kughamono aghinie.”

⁶Tileno Elija no Elisha vilo “Itehi hilehi ngo aghilo; AMPEU no ivilo Jordan lo wulopi ahza tsuani.” Ikemu Elisha no khochile, “Ino xukuau AMPEU, khuu ino huthu cheni keno paje lono pi ani, niye khilemu ophemoe.” Tighenguno pama kumtsa cheve,

⁷tungkupumi pano lhopungu ghi Jordan kutolo pama papesu kumtsa wuve. Elija ngo Elisha pama ye Jordan lo ngove ipuzu tungkupumi lhopunguye putouno pishipuwo pama jughi puthugho a.

⁸Tileno Elija no pa phi chijeboboi keu phikuzu xaqhive eno kuqhuchheveno azulo hesu; ikelauye azuno kikije kini shive eno Elisha pamaye aghoki hukukuu qhaikeu yeghilo ipeluve.

⁹Tipa-a lono Elija no Elisha vilo pi,”Isasu kunguu ikumphi lono noye ipelo olau kiu shitsu penishi ani kya?” “Ipelo okuka kusajelu pelo, tishikeu lono niye ozuqhu shilupe kepu shitsulo, “ pi Elisha no qhuiniju.

¹⁰“Tiye tsulunikeu kushokutsue,” ipi Elija no pive. “Tsalatsa olauno isasu wuvekeu nono ithulu aye nono khuakeu ithulu nani, ikemu nono ni ithulumo aye nono khuakeu ithulumo nani.”

¹¹Hipa tsa kuptsa ghi pama chewuche; ikelauye paikhavi lono amino shikeu tuhakulu ami-khurshino xapusu pama mtadolo iloghino Elija ye kungughalo amlhu lono sasu ikuve.

¹²Elisha no ti ithuluno ighamuku Elija ku, “Ipu, Ipu! Israilmi saphukicheu akughushuu! Noye chevea kesha!” Tishino paye khilemu akiniu Elija ithulumove. Ighono amlo ghime lono Elisha no pawu chijeboboi keu phikuzu hu suxula kini shive.

¹³Tishiveno pano Elija wu chijeboboi keu phikuzu khikhi pa shou ikiqi ikughi keno tipau ikhiluveno idewo Jordan khilalo puthughove.

¹⁴Pano ti Elija wu chijeboboi keu phikuzu pesu azulo hesu eno ishipi, “Elija Lhou AMPEU khile ani kya?” Tishino itaghi pano akiniu azulo hesu ikelaye azu kikije kini shive eno paye chesu ikuluve.

¹⁵Jerikho lono ighikemi tungkupumi no pa ithuluno pi, “Elija wu akuka Elisha shou ikughiluvae!” Panonguno pa sasu kushonike wuve eno pa zulo pishiqhotsuno

¹⁶pi, “Hile ningu lhopungu ani, ningu kumtsu akumtomi timiqoe. Ninguno wupuzu ompeu phuwu juni. AMPEU ghunguno pa xapuwo khilela naghuto lo momu akhilalo qhipuaghi kenosa.” Elisha no khochile, “Nonguye wukepu kumoe.”

¹⁷Ikemu pano panongu ahza tsumoke kutolo tamo mithe wuni pi auve. Ike pano lhopunguye atsala kuthu kutolo akutho ato kumtsu phuju kemu pa ithumlave.

¹⁸Tithiu panonguye Elisha lau ideighi, paye ti kutolo Jerikho lono panongu ngokhe akehu, ike pano panongu vilo ishipi, “Niye nongu vilo wukevilo pike kumo kesha?”

¹⁹Timi khami Jerikho lono Elisha lau wuno ishi pi, “Akijeu, nono ithianike, hiye aphughi jukivi lakhi, ikemu azuye alhoksae eno tighenguno timi alho vimoe.”

²⁰Pano ahza tsu, “Abohu kithelo amti esuno ilau sughilo” Panonguno ti pa lau sughi,

²¹tishino pano azupukilo wuno amti pesu azulo vesuno pi, “AMPEU no hishi pi ani; ino azu hipau shikimitheve tsua eno hinguno hilauye kithikuha eno alalo haukeu shimae.”

²²Tipathiuye Elisha no pivetsuke toi azu tipauye akimthe shiwove.

²³Elisha ye Jerikho qhiveno Bethel lo wuche eno tile taun lono itimi khamino ipeghino pa junuqhi, “Boghesho, hileno mtazu chevelo,” ipi panonguno ighamuku pi.

²⁴Elisha no idechile ighino panongu thughui jupuzu AMPEU jelono panoqo ghusove. Tileno avaqu kinino agha lono ilhe ipeghino itimi pano lhobidi kini jithapiniyi tsuvetsu.

²⁵Elisha ye Karmel tolo cheve eno athiuno Samaria lo ide ighilu.