Read Sumi Naga KUKAMI AKINIU 20 Bible Online

KUKAMI AKINIU 20 - Sumi Naga bible

KUKAMI AKINIU 20

¹Tipa ghulokilo akukau Hezekiya ye suuve eno kitila kumoaye thiveni cheghive. Tileno tungkupuu Isaya Amuz nuno pa putsaniye wu eno ishi pa vilo pi, “AMPEU no ovilo pi ani noye thwokha kumtsu kishekulu kithikiyi qhiluvelo kughengu noye vilumo nani. Thivenike kutoluvelo.”

²Hezekiya no pagi akupuwu kudau ju suno inikhuthu:

³“AMPEU, ikumsululo, niye aghokulu eno kikhikighi shi oqe ohuthu che eno niye alhokuthu nono ivilo kiu shilepi keno tipau mlatsuche.” Tishi pighi paye ighono kukuno tshutshushi qauve.

⁴Isaya ye akukau qhiveno wuve, ikemu pano akukakilo kughaki mta holo veche wucheke lono AMPEU no pa vilo

⁵Hezekiya lau idewolo pi, paye AMPEU timiqo shou ayehkipeuke eno pa vilo ishi pilo, “Ni, AMPEU osu David Lhou no okighini chiluvae eno onhezu kipiji ithuluvae. Ino oshipivive tsuni eno noye atsala kuthu dolono Achinekilo wulu nani.

⁶Ino opelo ampe chighi pungu alauxulupeni. Ino osusholuni eno hipau Jerusalem phughi Asiriya kukau launo susholu tsuni. Ilikhi igigihupu ghengu eno ino iqeu David lau ishoqhi shi puakeu ghenguno ino hipau phughi susho tsuni.”

⁷Tishino Isaya no akukau ju akeu aqeu vilo khughunika suwo tsughuno pa mishelo datsulo tishiaye paye viluve nani.

⁸Akukau Hezekiya no iniju, “AMPEU no ishipivitsu nani pi kiu lono kimchilu nani eno atsala kuthu thiuye niye Achinekilo wulu nanipi ani kya?”

⁹Isaya no khochile, “AMPEU no pa shoqhi olau shikeu amchipu lakhi otsu nani. Itehi, noye akala kicheqho kupka chighi azuu wopenishi anikeo athiu idechileghi penishi ani kya?”

¹⁰Hezekiya no khochile, “Yekukhu pelono akupka chighi azuu wovepekeuye mlalei! Tighenguno akupka chighi athiu idewopelo” ipi.

¹¹Isaya no AMPEU vilo inikhu eno AMPEU no kuchouno akicheqho yekukhu pelono akupka chighi athiu idechile wovepe, akala hipauye Akukau Ahaz no mlape qhikeuke.

¹²Tipa mtsa lono Babilon lo kukau Merodak nuno akukau Hezekiya no suakeu sutsa chiluno yekili lakhi eno akuzuagho lakhi ishi pesu palau tsupuwu.

¹³Hezekiya no aghini shi ighi akeqo alokivishi sasulu eno pa kuakini—shuna tsandi, axokutsungu teli eno vekutsungukeu mukhu eno pawu ghushimi nanu kumtsu pesu panoqo piyelu. Pa nhemgha hekutsupe qhichekeu bokuthaqo momu pa kukaphulo a-a lakhi mu panongu piyemokeuye shimoe.

¹⁴Tishi kelono tungkupu Isaya no akukau Hezekiya lau ighino iniju, “Timi hipaqoye khilauno ighi akhani eno noye panongu vilo kiu pi ani kya?” Hezekiya no khochile, “Panonguye ayeghi kushuwalo kuami Babilon lono ighi ani.”

¹⁵“Panonguye akukaki lo kiu ju ani kya?” “Panonguye thwokha kumtsu ithuluvae. Anhemgha hekutsuchekeu bokutha kumtsu panonguno ithulumokeuye kuhavae, kumtsu panongu piye khavae.”

¹⁶Tile Isaya no akukau vilo pi, “AMPEU akughushuuno pi anike

¹⁷athiu ghulo lakhi loye okukaki hipaulo thwokha kiu anikeno kumtsu eno osunoqo nhemgha lono ishikutolo kiu hekutsu susu ighi keno tipaqo kumtsu xapusu Babilon yeghilo suwuve kepu tsala ighi nani. Kiu nhemghamu qhivekeu shimo nani.

¹⁸Opolo kughukomi khamiye sasu wuve nani eno panongu kughapesu shoko kughulhono Babilon kukau kukaki lo aqemi shipe nani.”

¹⁹Akukau Hezekiya no pa kuxu ake thaqhuloye kulakishi eno alokughuno shi nani kena pikeu kiqi vethaluve, tighenguno pano hitoi khochile, “Nono AMPEU launo asutsa chilu sughikeuye aloe.”

²⁰Akukau Hezekiya no mlakeu kumtsu eno pa mlo kuloghi kumla eno pano kishi azukhathano ayeghiqhouno azu sasu aphughilo suiloghi keno hipaqo ghili kumtsu Juda Kukami Xughili yekukutsulo yepuani.

²¹Hezekiya ye thive eno panu Manasse no pa zuqhulo akukau shiluve.