Read Sumi Naga KUKAMI AKINIU 21 Bible Online

KUKAMI AKINIU 21 - Sumi Naga bible

KUKAMI AKINIU 21

¹Manasse ye apunu mpe chighi kini shi akelono Juda lo akukau shiluno Jerusalem lo ampe lhopungu ayehpelu. Pa zaye Hefziba ke.

²Paye AMPEU zulo axine shivekeuye Israilmino ighimphilo achekeqo shiyeh kutami kumla lhoksa papeuve.

³Papu Hezekiya no hexave tsukeqo asu-atu kumlla-a kumtsu itaghi pano shikithevetsu; Baal mllape nike akumlla kiptia mlatsu eno alhouliu Ashera julho shisupe qhitsu, puzuu Israil kukau Ahab no mlaketoi shithuve. Manasse ye ayepuqo mllauve.

⁴Pano AMPEU kumlla-a Achinekilo hu asu-atu kumlla kiptia mlavetsu.

⁵Achineki kulaghi kinikujolo ayepuqo mllape nike akumlla kiptia mlasutsu.

⁶Panu ghi kughapesu akipti kumlla shipesu tsuve. Paye asaqhi, kuduu, muthukeu, asheazu ghili kipimi eno tumumiqo puluuve. paye Alhou zulo ighono axine shiuve eno AMPEU mlo alau shikighidevetsu.

⁷Pano alhouliu Ashera julho shisukeu amchipu pesu Achinekilo qhive, khikhi AMPEU no David ngo panu Solomon pama vilo tipa-a pesu ishipikeno: “Jerusalem lo achineki hipau lono Israil lagha chighikini pelono imlla chepe niye a-a hipau kishephelue.

⁸Tsala Israilmino Izahkutsuqo eno ino iqeu Muse tsukeu yezah kumtsu pelu aye ino panongu puasu tsukeu yeghi lono panongu hapheve pemo nani.”

⁹Ikemu Juda lo timiqono AMPEU gholumoe eno Manasse no panongu sasu puzuu AMPEU no paw timiqono ighimphilo acheghikeqo xine nguno kuthokuzuu xinelo sailove.

¹⁰AMPEU no pa qemi tungkupumi vechewo pi,

¹¹“Akukau Manasse ye Kananmi xine nguno kuthokuzuu xine shivae; eno pawu asu-atu pesu Judami sasu axinelo sailove.

¹²Tighenguno ni AMPEU Israil Lhou no shikupsa ghichheghime pesu Jerusalem eno Juda shou pukuni, khukhumu chilukelo apuchopungoqhiyi thughuive penikeu shitsuni.

¹³Ino Samaria lau aghime tsuketoi Jerusalem shou ghi puwuni, Israil lo kukau Ahab eno pa laghaqo lau shiketoi aghime tsuni. Ino Jerusalem lono timiqo akhu sukimitheve ketoi eno pishiqho pesu qhiveketoi mithemithei hapheve nani.

¹⁴Ino timi ghupe puaghi kemiqo kughapesu panongu ghumi ulo suvetsu nani, tipaqono panongu leluve nani eno panongu yeghi shipsave tsu nani.

¹⁵Ino hitoi shi iwu timiqo lau mla nani kughengu panonguno ilauno putosuveno axine shive panongu puasuqono Ijip lono ipeghike lono wo ishikutolo imlo kighidepu likhi shitsue.”

¹⁶Manasse no amikuchomi kutomo ghiqhi pithivetsu keu jihno Jerusalem laghiqo ahjino nhakha qowu; paye Juda lo kuamiqo sasu asu-atu mllauve pekeu lono AMPEU mlo shikighideve tsu eno axine shikeu likhi kumono hitoi kutomo kuxu puwovetsuke.

¹⁷Manasse no kiu shikeno kumtsu Judami Kukami Xughililo yepe qhipuani.

¹⁸Manasse ye thive eno kukami ghutu, Uzza ghutu ipikeulo shiqhove eno panu Amun no pa zuqhulo akukau shiluve.

¹⁹Amun ye apunu mpe muku kini shi akelono Juda lo akukau shiluve eno Jerusalem lo ampe kini ayehpelu. Pa zaye Meshullemet, Haruz ngake. Jotba taun lono ighikemike.

²⁰Papu Manasse toi AMPEU zulo paye axine shive;

²¹papuno mlaketoi pa ghi tishiuve eno paye asu-atu khikhi papuno mllache keno pa ghi tipaqo mllauve.

²²Paye AMPEU khikhi pasunoqo Lhou keno milive eno AMPEU zahkutsuqo hebideve.

²³Amun qholo kijemino atheshi puzu akukaki lono pa ghiqhive.

²⁴Juda lo timiqono Amun heqhivekeqo timi heqhivetsu eno panu Josia no akukau shiluvepe.

²⁵Amun no shikeu jeli Juda Kukami Xughili kakulo yekutsupe puani.

²⁶Amun ye thive eno Uzza ghutulo pa kumokilo qhove eno panu Josia no pa thelilo akukau shiluve.