Read Sumi Naga KUKAMI AKINIU 22 Bible Online

KUKAMI AKINIU 22 - Sumi Naga bible

KUKAMI AKINIU 22

¹Josia ye apunu mpe tache shi akelono Juda lo akukau shiluno Jerusalem lo ampe shighi lakhi ayehpelu. Paza Jedida ye Adaiya ngake, Bazkat taun lono ighikemike.

²Josia ye AMPEU no kiu pulokeno ti shitsue; paye pasu akukau David kumlla kiviqo papemi shilu eno Alhou yehzaqo tsaqutsalei pekulumike.

³Pano kakeu mpe chighi akutacheu shi akelono akukau Josia no atsakukugha bolo akiyeu Shafan, Ayalia nu eno Meshullam tilimi shi akeu ahza tsu ghi Achinekilo hapuwu:

⁴“Achinetou Hilkiya lau wupuzu achinemino Achineki kulaghi lono timiqo vilo qhakutsulukeu pisa khijehi keno ithisughilo.

⁵Pa vilo pisa tipau pesu khunoqono achineki shikithe keulo ampi shiani keno tipaqo tsulo pilo.

⁶Ike tipaqoye akikishimi, atu kumlami ishi tsukepu shi anie eno ti shikithe akeulo tokta ngo atu ghuno peitha masa.

⁷Timi khunoqo akumlalo ampi shitsu akeno panoqoye ighono amikucho akikhi ihulokeue ikehu panongu launo pisa kiutoi pukave kelapi iniju kepu shimoe.”

⁸Shafan no akukau zahkutsu pesu Hilkiya vilo pitsu eno Hilkiya no Achineki lono ayezah kaku ithulukeu ghili pesu pa vilo pitsu. Hilkiya no kaku pa tsu eno Shafan no tipau phiju.

⁹Tishino pano akukau lau idewono tipau ghili hitoi pivetsu:” Oqeuno ti achineki lono pisa ithulu keu pesu ti achineki shikithe akeqo timi ampi ulo suvetsuae.”

¹⁰Pano ishi pi, “Hilkiya no itsukeu kaku hi anie.” Pano tipau ighono phipe akukau piye.

¹¹Kughou akukauno kaku tipau phisu piyekeu chilukeno paye amlo ghime launo pa phi suxuveno,

¹²ahza hipau pesu achineu Hilkiya, Ahikam nu Shafan, Mikaiya nu Akhbor, Shafan khuu kughakilo akijeu keno eno Asaiya akukau kheu ishi lau tsu:

¹³“Wuno AMPEU launo ighenguno eno Juda lo timi kumtsu ghenguno kaku hipaulo kukutsu ghili iniju sughilo. AMPEU ye ningu lau aloghu ide ani kughengu ningu puasu kaku hipau lono shilo pikeu mlamove.”

¹⁴Tileno Hilkiya, Ahikam, Akhbor, Shafan eno Asaiya ishino wuno totimi lakhi Hulda, tungkupu lakhi Jerusalem asa akitheu lo achekeu sasu kighinikileju. (Li kimi jeye Shallum Tikva nuke eno Harhas tilimi lakhi ke, achinekilo tiphiminibo jukukutsuu shiche.) Panonguno ighipuzu kiu shikeno kishekulushi li vilo lhe,

¹⁵lino panongu vilo “AMPEU Israil Lhou no pi ani. Timi ohape ilau puwu keu vilo pilo.”

¹⁶AMPEU launo ighikeu sutsa hipaqo: “Ino Jerusalem eno tile kuami kumtsu ghimeni cheni pi akukauno phikeu kakulo yepuae.

¹⁷Panonguno imiliveno alhou kutau lau aghakishi gho pesu mllave eno panongu kumla tishikeu lono igha shikighide vetsue. Iloghu kighide Jerusalem shou avae eno tiye puhave mla nani.

¹⁸Akukau ghenguno atsa hipau ani, ni Israilmi Lhou AMPEU no pi anipilo: Nono kakulo yepuaghikeu tsa initsue.

¹⁹Kughou ino aphughi hipau eno tile kuami shou kughukughaleyive penike ghusho keno nono amlo xaide izulo mutshaivulu eno aphi suxu qake ghenguno ino okighini chiluve tsuae,

²⁰tighenguno ino Jerusalem shou aghakighide aghime puwuniye akeuye nono thimoke doloye puwutsumae. Ino opelono alokughuno shi thilupe nani.” Ikehu timiqono akukau Josia lau asutsa hipau pesu idewove.