Read Sumi Naga KUKAMI AKINIU 3 Bible Online

KUKAMI AKINIU 3 - Sumi Naga bible

KUKAMI AKINIU 3

¹Akukau Jehosafat no Juda lo kakeu mpe chighi akutacheu shi ake lono Ahab nu Joram no Israil lo akukau shilu eno paye Samaria lo akukau shilu eno paye Samaria lo ampe chighikini ayehpelu.

²Pa ghi AMPEU zulo axine shive, ikemu papu momu paza Jezebel toi kutukeuye kumoe; papuno Baal mlapeniye ajulho shisukeqo kumtsu kubovetsu.

³Tishimu Nebat nu akukau Jeroboam pa zuu achekeu toi pano Israilmi sasu axinelo ilove eno tamono tishi auve.

⁴Muab lo akukau Mesha ye bheri pighiche eno mpe atsutsulo bheriti 1,00,000 eno bheritsu 1,00,000 mhi gholukeu pesu Israil kukau zahme tsuche.

⁵Ikemu Israil kukau Ahab thive kelaye Mesha ye Israilmi hebidethuve.

⁶Paikhavi lono akukau Joram ye Samaria qhiveno pawu ghushimi kumtsu hekutsuluve.

⁷Pano Juda lo akukau Jehosafat lau asutsa ishi tsupuwu, “Muab lo akukau no isasu kumjo ani; noye igholo sughi pa sasu aghushi nima?” “Niye pulo ani, niye ogholo ani, tihutoi iwu timiqo eno iwu khurshi kumtsu kutope khe ani.

⁸Khipa laghiuno ninguye wuno leni kya?” pi akukau Jehosafat no khochile. “Edom ghasaqha heche susu alaghi akushuu kudauno ningu wuni” pi Joram no khochile.

⁹Akukau Joram ngo Juda lo eno Edom lo akukau noqo kumtsa chewu. Atsala tsuni alacheve kethiu panonguye azu kuhave eno timi ngo tughashiqo panonguno sasu chekeu kumtsu ghenguno yekepu zu mu kuhave.

¹⁰“Kishiveni kya? AMPEU ye kukami nikuthu ku kuqhano pe Muab ulo phesuve tsuniye shi ani kesha?” pi Israil kukauno igha.

¹¹Akukau Jehosafat no ishi iniju, “Hile tungkupumi lakhimu anikeo mokya? Pa vechewono AMPEU lau kusutsa junikeghi?” Akukau Joram wu ghushimi gholo kijemi lakhino khochile pi, “Shafat nu Elisha hile ani. Paye Elija khopeu shicheke.”

¹²“Paye kuchou tungkupumi lakhi ke,” pi akukau Jehosafat vilo pitsu. Ike kukami pano kuthuye Elisha lau wuve.

¹³“Niye kushi kelauno okuphu tsuni kya? Noye opu ngo oza pamano putsa chekeu tungkupumi lau wuno kimchijulo,” pi Elisha no Israil kukau vilo pive. “Tishimoe, AMPEU no kukami nikuthu ku kuqhano Muab kukau ulo suve tsuniye shi ani, “ pi Joram no pichileve.

¹⁴Elisha no khochile, “Xukuau MPEU, ino huthu achekeu je lono piqhi ani, Juda lo kukau Jehosafat aghimo kenapi aye niye nongu mu junichemo momu ithitsuni chemoe.

¹⁵Ike tishiaye alebo kuighau lakhi hilau saghilo.” Alebo kuighauno ighakithishi AMPEU kuka Elisha shou ikughi

¹⁶eno pano pi, “AMPEU no ishi pi ani: ‘Qhaikeu ghoki hipaulo akhuki chhuqhe wolo.

¹⁷Nonguno tsutsughu pina amlhu pinamu kumu ithulumo nani ikemu aghoki hipaulo azuno chhitoi ipeghino no eno nongu pichepighi kumtsu ghenguno kupukunoshi azu yekulupu shilu nani.’ ”

¹⁸Elisha no highi ishipi, “AMPEU ghenguno hiye ighono mlalei shilu nani, pano nongu pelo Muabmi shou tolupe nike tsu nani.

¹⁹Nonguno aliwono hotha pesu qhipuakeu phughi kumtsu theqhilu nani; nonguno panongu xathibo kumtsu yeqhilu khave nani, panongu zupuki kumtsu mike khaluve nani eno ayeghi ghuma akeu luza kumtsulo atuno chhitoi ghelesupe qhivetsulu nani.”

²⁰Thoghiu inaqhe thosulo aghakishi kumlla ghulokilo Edom kudauno azu ipeghino qowukeuno ayeghi chhive aghi.

²¹Kughou Muabmino kukami kuthu kuqhano panongu leniye chenie pikeu chiluve keno kichimi lono itimi kutolo aghunanu pukulu thaqhuye hekutsu pesu alughilo ngokheluve pe.

²²Thoghiu inaqhe panonguno ithughi kelaye tsukinhe no azu yebidekeu no ahji toi huchuhiyi ithulu.

²³“Hiye ahji,” ipi panonguye akichiqhi khave. “Kukami pano kuthuye panongu dolo aghushiveno heqhi pithi kile khave akenao! Ningu wuno panongu ghazu lhejunie!”

²⁴Ikemu panonguno aghazu tolu kithishi, Israilmino panongu le thu eno hakighide puwolu. Israilmi no kumzapushi panongu haleqhi eno Muabmi kutomo ghiqhi pithivetsu.

²⁵Panonguno taunqo kumtsu shipusavetsu eno timi kumtsu pututa sheamzulo atupesu aghuma luqa sholukeulo vesukeuno chhitoive; tishino panonguno azupuki kumtsu mike khavetsu eno axathi subo kumtsu yeqhivetsu. Ashekhalo aphughi shi akeu Kir-Heres likhi qhive ikemu tighi hevula kighi kipemiqono ti homxapesu ngoluveno le thuve.

²⁶Kughou Muab kukauno paye aghu tolumove ni chenipi ithive keno, pano azutakihi kipemi pano 700 sasu wuno aghumi la lono shoxu susu Siriya lo akukau lau pokaluveniye pochekemu tomlave.

²⁷Tileno paye panu anoghiu, pa shelo kakepu shi akeu pesu aphughi tupikiye lono Muab lhou lau aghashivetsu. Israilmiye ighono kichi mamaive tileno panonguye aphughi lono pano yeghilo idewove.