Read Sumi Naga YEKIKITHI ATUGHIU 10 Bible Online

YEKIKITHI ATUGHIU 10 - Sumi Naga bible

YEKIKITHI ATUGHIU 10

¹Filistiyami no Israilmi sasu Gilboa yeghi lono aghushie. Ike Israilmi timi kutomo ghiqhi pithi khavetsu eno timi tipaqo gholo Akukau Saul eno pa nuliqo likhi pokalue.

²Ikemu Filistiyami no Saul nu Jonathan, Abinadab eno Malkhishua pano kuthu kughaluveno ghiqhi pithivetsu.

³Aghukishi ighono kumsapu shi Saul lau ighive eno aghumi wu aleghuno pa ghuzaveno ithau mlave.

⁴Pano apu lhothemi lakhi pa ghunanuqo pekutsuu vilo pi, “Filistiyami Alhou mthakemino iju anheshu akepuye ozuta xachho pesu ighiqhivelo.” Ikemu apu lhotheu tipauye titoi shi nikeu ighono ichive. Ikemu Saul no pa zuta ikhiluno pa likhi pa pithive.

⁵Ike apuu no ti Saul thivekeu ithuluno pa ghi pa zuta ikhiluno pa likhi pa pithive.

⁶Saul eno panu pano kuthu ishi kumtsa thive kemtsa pa kuka hu ashekha shive.

⁷Kughou Israilmi Jezreel bokhu lo kuamino ghushimino pokhave keu eno Saul ngo panu kuthu thivekeu sutsa chilu keno panonguno pututa kungoa qhiveno pokhave. Ike Filistiyami no ighino a-a tipaqo pukhaluve.

⁸Aghukishi tsala ashekha shive kethiu, Filistiyami no akithi kumoqo pekutsu eno panonguno Saul ngo anu kuthu kumo ishi Gilboa toghilo aghike ithulu.

⁹Panonguno Saul kutsu luvetsu, pa ghunanuqo xaqhivetsuno Filistiya qha kumtsu asutsa tsupuwu eno panongu su atu julho ngo pano timiqo lau kutughue.

¹⁰Panonguno pa ghunanuqo pesu pano chineki lakhilo qhi eno Saul kutsu pesu panongu lhou Dagon chinekilo tshuqhie.

¹¹Gilead lo Jabeshmi akeqono Filistiyami no Saul lau kiu shive keno chilu kelo

¹²amlo kumtomino wupuzu Saul eno anu kuthu sukumo khapesu Jabesh lo ighi. Panonguno thivekemi kumo pewo aphisubo qholo qhove eno atsala tsuni kutolo kumvue.

¹³Saul ye thive kughengu pano AMPEU pulou shimoe. Pano AMPEU zah kutsu hebideke, pano AMPEU sasu kusutsa kepu zuqhu thivekemiqo ghungu sasu kusutsano pa lapiye peniye shie.

¹⁴Tighenguno AMPEU no pa pithive eno pa yehkipeqha pesu Jese nu David tsuve.