Read Sumi Naga YEKIKITHI ATUGHIU 12 Bible Online

YEKIKITHI ATUGHIU 12 - Sumi Naga bible

YEKIKITHI ATUGHIU 12

¹Kughou David no Akukau Saul zu itshu su wo Ziklak lo akeno tipa ghuloki lono puju peju akemi ghushimi pukhube kulumi

²Benjamin lagha lono ighi keu Saul laghami kutomono pa gholo kuqhape ache. Panonguye aleghu kapuwu keu, akighilono atu vepuwu keu putoputo aphiphi shi pelukeqo.

³Panonguye Shemaa nu Tibeami Ahiazer ngo Joash pama zah kutsu qholono cheche. Ghushimi hipaqoke: Jeziel eno Pelet, Azmavet nuliqo Beraka eno Jehu Anathotmi Ishmaia Bibeonmi, ajekipi aghu tomi lakhi eno “Shighi” sakiphe mi gholo lakhie Jeremia, Jehaziel, Johanan eno Jozabad, panonguye Gederami Eluzai, Jerimot, Bealia, Shemaria, eno Shefatia, panonguye Harifmi Elkana, Isshia, Azarel, Joezer eno Jashobeam, panonguye Korami Joela eno Zebadia, Jeroham nuliqo Gidormi

⁸Timi hipaqono Gad laghalo puju pejuve kemi ghushimi aghulo ajekipimi panonguno David no asaye yeghilo aghukhe alo akelono panonguno pa gholo kuqhaluve. Panonguye azuto eno angu kipelo shitsa, eno jukelono mu abongushu toi ju ighue eno naghutolo ashe toi ighono muthue.

⁹Panongu lau aye vekeu hitoi shi kusho qho ghi betsu. Ezer, Obadia, Eliab, Johanan, Elzabad, Jeremia eno Makhbani.

¹⁴Gad laghalo hipaqo khamino kijemi gholo akichiu timi 1,000 shou ahza kutsuu eno kutamino ayitiu kijemi timi 100 shou ahza kutsuue.

¹⁵Ampe lakhi aqhi atughiulo kughou Jordan lo azuno akhuki yimiqo ipeghi keno panonguno aghoki katha eno aghoki kipelau kulolau abokhulo timi akeqo kumtsu hapiyepighive.

¹⁶Ghuthu lakhi Benjamin ngo Juda laghalo timi amqo lakhino David ghukhu alo ighi.

¹⁷David no panongu sasu kushoniye wuno pi, “Tsala nonguno ashou kiqi lono kuphu niye cheghi aye, nonguye hile ighilu nani. Ni gholo kutupo tsulo! Ikemu nonguno thechu shino ikughape ighumi ulo suve niye shi aghi aye, ino nongu ghimemo namu, ni puasu Lhou no ithi ani eno aghime nongu tsuve nani.”

¹⁸Alhou ghunguno panongu gholo timi lakhi Amasai, ipikeu khuu Alhou ghunguno peitha akeno athiuye “Shighi” shou Zahtsuu shiluve keno pano ighamuku pi, “Jese nu David, ninguye owue! Tokuluye owu eno okuphu akemi wu ghie! Alhou no ogholo ani.” David no panongu pa gholo sasulu eno panoqo pesu pawu ghushimi gholo kijemi shi luvepe.

¹⁹Kughou Akukau Saul no Filistiyami sasu aghushi akeno Manasse laghalo ghushimi khamiye David gholo ighiluve. Kuchou loye paye Filistiyami kuphumoe, panongu kukami qono kumsu keuno pa mpiu Saul no panongu pishiqhi venikeu msa ae, tighenguno panonguno Ziklag lo pa puwove.

²⁰Ghushimi hipaqoye Manasse mi David no ide wocheke lono pa gholo sukuqhave: Addna, Jozabad, Jediael, Mikhael, Jozebad, Elihu eno Zillethai. Manassemiye kumtsu ahza kutsumi mqo kuqhakelo timi 1,000.

²¹Panonguno David wu kijemi shi panongu saphe kughengu panongu kumtsu ghushimi shitsamike ghenguno panoqo athiuye Israilmi ghushimi kijemi shikhave.

²²Tsalakipe tsulo timi akithe theno David ghushimi gholo iloghi chewuve, tighenguno pawu ghushimi alau alau ikowove.

²³Kughou David no Hebron lo akeno ghushimi qokiphe luvekemi kutomono pa gholo kuqhaluveno pa kuphu puzu Saul zuqhulo pa pelo akukau shilupe, tiye AMPEU no piqhi puakeu kiqi lono ke. Panongu kikihiqo: Juda: 6,800 aghunanu kupukulai pukemiqo, azuto eno angu kipeqo; Simon: 7,100 aghunanu kupukulai pukemi; Levi: timi 4,600; Jehoiada papemi Aron kughukomi lo 3,700; Zadok sholokumi, aghulo atomi alhothe sakiphemi timi muku kini; Benjamin (Saul laghami): timi 3,000 (Benjaminmi akichiu no Saul gihu eno pa gholo ache); Efraim: timi 20,800 pano bolo ajekipimi; Kulolau Manasse: 18,000 no David pelo akukau shipenike pa gholo auve; Isakhar: sakiphemi 200, panongu kukauno ahza kutsu lono kuqhano shie (Israilmi no kiu shimaye sakeno eno kiu dolono shimaye sakeno sakiphemi hipaqono ithiae); Zebulun: 50,000 pukhube kulupu eno aghushi nikeulo kutokughoi, aghunanu jeli kumtsu peithathi nikeu qokiphe lunikemi; Naftali: Sakiphemi 1,000 eno azuta angu kipemi 37,000; Da(...)

³⁸Ghushimi hipaqo kumtsu aghulo wunikeu kutokugho luvekemi, panonguno Hebron lo wuno David pelo Israilmi kumtsu kukau shipeni keu shi kughue. Israilmi kumtsuno akukumsu aphiphi lono kuqhape wuke.

³⁹Panonguno atsala kuthu David gholono puwove, pano ghakhumino chuqu kusho panongu ghenguno kutope qhitsukeu alokivishi chu shoe.

⁴⁰Ahuu shiyeh Isakhar, Zebulun eno Naftali kutolono gadaha, kemel, gadahaqu eno amshitsu qo lono achuqupu jeli - barli, khughuthi, atsayithi kipki, atsayiji eno oliv teli hipaqo xapusu ighi. Tinguno alauno panonguno amshi ngo bheri heqhi chunike ghenguno ha sasu ighi. Hi shikeqo kumtsu pano ghakhu kumtsulo alokivi shikeu michipu pephe piyeke.