Read Sumi Naga YEKIKITHI ATUGHIU 13 Bible Online

YEKIKITHI ATUGHIU 13 - Sumi Naga bible

YEKIKITHI ATUGHIU 13

¹Akukau David no ghushimi 1,000 khi eno 100 kijemi sasu kuptsa.

²Eno pano Israilmi kumtsu lau asheshu pi, “Tsala nonguno pulotsu aye eno AMPEU ningu Lhou pulou shi aghi aye, ninguno atsapemi niyeghiqhalo puwu no achinemi eno Levimi pututa taun lono kusasu ighino hilehi kumqoni.

³Tishino ningu wuno Alhou wu Puloshoqhi Bohu sughini, khikhi akukau Saul no kughucho vekeno.”

⁴Timiqono akukumsu tipau sughikeulo alovi ghi pulokuqha tsue.

⁵Tighenguno David no pa yeghiqha kumtsulo Israilmi kukutsue, apeu Ijipmi ghuthu lono ahuu Hamath Kita kutolo eno tiye Puloshoqhi Bohu Kiriiat Jearim lono pe kiqhe sasu Jerusalem lo wuveni kehu.

⁶David ngo pawu timiqono Baala phughilo wue, tiye Kiriat Jearim lo wucheke lalo eno Juda yeghi bocholo, Alhou wu Puloshoqhi Bohu phuju niye wukelo AMPEU je yepuku keu kerubim ake.

⁷Panonguno Abinadab kilo ilono Puloshoqhi Bohu pewo mishikulu akithe lakhilo sue. Uzza ngo Ahio pamano mishikulu tipau khe,

⁸eno David ngo kutami no alokivishi ilhe Alhou akishetsue. Panonguno akighi leboqo lono phe - aheo, bombom, ayibo eno afuko igha.

⁹Panonguno Khidon lo aniqa lo ighikelo amshi kumano apukhu kupuxape ikiqi chekelo, Uzza no pau chhopuwo Puloshoqhi Bohu mutuluve.

¹⁰Tishi kemtsa lono AMPEU no Uzza shou aloghu ideveno pa heqhive, kughengu pano Abohu buve kehu. Paye Alhou nhekithe lono tileno thive,

¹¹eno tipau-a pesu “Perez Uzza”[11] ipi itehi kutolo jeku chephi. David ye ighono msave kughengu AMPEU no pa loghu kighide Uzza shou pukuno ghimeve kehu.

¹²Tile David ye Alhou msaveno pi, “Niye itehiye kishishino Puloshoqhi Bohu pesu wuni kya?”

¹³Ike David ye pa gholo tipau Jerusalem lo suwu move, tishinike zuqhu, timi lakhi pa je Obed Edom, paye Gat phughilo akeu kilo tipau puave.

¹⁴Tipauye aqhi kuthu tile puacheuve eno AMPEU no Obed Edom kibolomi ajeli thwokha lono kumghatsue.