Read Sumi Naga YEKIKITHI ATUGHIU 15 Bible Online

YEKIKITHI ATUGHIU 15 - Sumi Naga bible

YEKIKITHI ATUGHIU 15

¹David no pawu luthu ghenguno David Phughilo aki kutomo shisue. Pano Alhou Puloshoqhi Bohu qhikepua lakhi kutope qhi eno tipau ghenguno aphiki shipeqhi,

²tishieno pano pi, “Levimi likhino Puloshoqhi Bohu pelu nani, kughengu AMPEU no panongu pelo tipau khape penike panongu kisheke eno pulhapuju pa huthu achepeniyeke.”

³Ikehu David no Israilmi kumtsu kukumqo sawo Jerusalem lo qhi eno tiye Puloshoqhi Bohu pewo khile pano a-a kutope pua keno tile qhinikeu shie.

⁴Tipashelo Aron eno Levi laghami puwue.

⁵Levi lono Kohat lagha Uriel ighi, paye pano lagha 120 shou atou;

⁶Merari laghalo Asaya, 220 shou atou;

⁷Gershon laghalo Joyil, 130 shou atou;

⁸Elizafan laghalo Shemaya no timi 200 shou atou;

⁹Hebron laghalo Eliel, lhotache shou atou;

¹⁰eno Uziel laghalo, Aminadab no timi 112 shou atou.

¹¹David no achinetou Zadok ngo Abiathar eno Levimi pano tsugho, Uriel, Asaya, Joyil, Shemaya, Eliel eno Aminadab panongu kusu.

¹²Pano Levimi vilo pi, “Nongu likhi nongu eno nokusami Levimi ghenguno shikimthe keu shilulo tishi keu lono nonguno Puloshoqhi Bohu Israil MPEU Alhou wu pesu wo ino khilehi a-a kutopuani keno nonguno sughino tile qhilu nani.

¹³Kughengu atughulo nonguye tile kuhae eno nonguno tipau pewu moe tighenguno AMPEU ningu Lhou no aghime ningu tsue, kughengu ninguno kishi pa mlla kepu keno mllamoe.”

¹⁴Tileno Achinemi eno Levimino Israil MPEU Alhou wu Puloshoqhi Bohu pekiqhe nike ghenguno panongu likhi panongu shikimthe.

¹⁵Levimino tipau aku bidi lono abighi lono kuhope, tiye Muse vechewo AMPEU no ahza tsukeu kiqi lonoke.

¹⁶David no Levimi sakiphemi ahza tsu puzu Levimi pelo pututa sheamzulo alokivile aheo eno ayikihe lono phepenikeu shie.

¹⁷Alekiphemi laghalo kishekiphemiqo pelo ayikihe ghugha ighape: Heman, Joel nu eno pa thikuzumi Asaf, Berekhia eno Ethan, Kushaia nu Merari laghami. Panongu kuphu penike ghenguno Levimi khami pelo aheo asutsa kunguu lono ighapenike kishephe: Zekharia, Jaaziel, Shemiramoth, Jehiel, Unni, Eliab, Maaseia eno Benaia. Aheo ghugha aqhou lono phepe nike Levimi khami kishephe: Matithia, Elifelehu, Miknia, Azazia eno achineki khagho khemi Obed Edom eno Jeiel.

²²Khenania no alekiphelo shitsa shike ghenguno pa pelo Levimi alekiphemi gholo atou shi kishephe.

²³Berekhia ngo Elkana pamano Obed Edom ngo Jehia pama gholo kuqhano Puloshoqhi Bohu khepenikeu shi. Achinetomi Shebania, Joshafat, Nethanel, Anasai, Zekharia, Benaia eno Eliezer panongu pelo Puloshoqhi Bohu zulono afuko ighapeni keushi kisheke.

²⁵Akukau David ngo Israilmi sakiphemi ngo aghushi Zahtsumi ishi Obed Edom kilo wue khilehi Puloshoqhi Bohu puakeno eno panongu apine kije lakhi shie.

²⁶Panonguno amshitsu tsuni eno bheri tsuni ishi ghiqhino aghakishi shi Alhou lau Levimi Puloshoqhi Bohu pekemiqo kuphu tsupenike mllae.

²⁷David ye phephei phino shikeu chijebobo uae, titoi alekiphemi, panongu sakipheu Khenania, Levimi Abohu pechekeqo kumtsuno chijebobo phi ue. David ye ephod phi ghi ue.

²⁸Tishino Israilmi kumtsuno Puloshoqhi Bohu pechekeu papesu Jerusalem kutolo wue, panonguno alokivishi asheshu, afuko igha, akiboh kuigha ayihe eno aheo lono alephe.

²⁹Abohu aphughilo sughi kelo, Saul nga Mikhael no alashe lono jukelo Akukau David no ighono alokivi shi ilhe cheghikeu ithuluno liye pa ju kunathave.