Read Sumi Naga YEKIKITHI ATUGHIU 16 Bible Online

YEKIKITHI ATUGHIU 16 - Sumi Naga bible

YEKIKITHI ATUGHIU 16

¹Panonguno Puloshoqhi Bohu pesuwo khilehi David no a-a kutope pua keno tilehi qhie. Tishieno panonguno aghakishi kumlla shie.

²David no aghakishi kumlla shivekethiu pano AMPEU jelono timiqo kumghatsue

³eno achuqupu pesu panongu kijetsu. Pano Israilmi kiptimi totimi kumtsu asho lakhikhi, ashi leqhi ghuvekeu lakhi eno atsayi kipki ishi kumtsu kijetsue.

⁴Puloshoqhi Bohu gizulono Israilmi Lhou AMPEU shipili mlla keulo saphe penike ghenguno David no Levimi khami sukusu shie.

⁵Asaf pelo panongu sakipheu shipenike susu eno Zakharia pelo pa kukuphuu shi pe. Jeiel, Shemeiramot, Jehiel, Matithia, Eliab, Benaia, Obed Edom eno Jeiel panongu pelo aheo igha penikeu shie. Asaf no ayihe ighanikeu shi,

⁶achineu Benaia ngo Jahaziel pamano vejoi Puloshoqhi Bohu gizulono afuko ighanikeu shi.

⁷Tishieno David no atughushi Asaf ngo pa kusami Levimi pelo AMPEU shipili ale phe penikeu shie.

⁸AMPEU akishe tsulo, pa kumto pesu asheshulo; pano kiu mla keno ashiayeh qo pelo ithipelo.

⁹Alephe AMPEU akishe tsulo; pano akumzapu mlakeqo ghili pilo.

¹⁰Amloqi alo kughengu ninguye pawue; pa mllakemi kumtsuno alokivishilo!

¹¹AMPEU lau wuno pa kumto phulo eno alhokuthu pa mllalo.

¹²Nongu Jakob kughuko Alhou qemiqo, Israil kughuko, Alhou no kishelukeqo, Alhou no akumzapu kumla shikeqo kumsu chilelulo eno pawu kughakutha pano tsu keqo kumsululo.

¹⁴AMPEU ye ningu Lhou; Pa zah kutsu ye ayeghiqha kumtsu ghengunoe.

¹⁵Alhou wu Puloshoqhi khilemu kumsuma kevilo, pano tiqheli tiqheli ghenguno mlavae,

¹⁶Pano Puloshoqhi Abraham sasushie eno Isak sasu tushoqhie.

¹⁷AMPEU no Puloshoqhi Jakob sasu shie, ghuthu lakhi khikhi alhokupuju ghenguno keno.

¹⁸“Ino Kanan yeghi pe otsuve nani,” ipi pano pi, “Hiye omheghi shive nani.”

¹⁹Alhou wu timiqoye akikihi aghulo likhi, panonguye Kanan yeghilo inamiqoe.

²⁰Panonguye aghakhu lakhi lono lakhilo itsu eno ayehkipe lakhi lono lakhilo itsu wue.

²¹Ikemu Alhou no khuno pelomu panongu ghime pemoe; panongu susho, pano kukamiqo kichikumsae:

²²“Ino kisheluvekemi iqemiqo ghime kevilo; iwu tungkupumi shou a-u bekevilo.”

²³Ayeghiqha kumtsuno AMPEU lau ale phelo! Tsalakipetsu pano ningu xalukeu lokiviu sutsa vekupha lo.

²⁴Pa jekipi ashiayehqo lau kutu ghulo, pa kughushu kumla timiqo lau ae.

²⁵AMPEU ye kije eno ighono pa sheqhe she akepue; alhouqo kumtsu nguno alau pa sumsa akepue.

²⁶Ashiayeh kutami lhouqoye kumtsu ajulho likhie, ikemu AMPEU no atsutsuqo eno thime jeli kumtsu lhoe.

²⁷Ajekipi eno akuka kiqheno pa suhope ani, akumto eno alokivino pa chineki chhitoi ani.

²⁸Ayeghilomi kumtsu, AMPEU akishe tsulo, ajekipi eno akumto lono pa shelo.

²⁹Akughushu MPEU je shelo; akumllagho pesu pa chinekilo ighilo. AMPEU zulo itsaiqilo kughou pano pa kimthe lono ipeghi keno;[12]

³⁰ayeghi kumtsu pa zulo khokhoshi ngolo! Ayeghi hu achipilo mulape qhivae eno tipau ithamo nani.

³¹Alovi alo, ayeghi eno atsutsu! AMPEU no akukaue ipi shiyehqo vilo pilo.

³²Azughi eno lhoxu kumtsu igha apelo; alovilo, aluzaqha eno tile akeqo!

³³Ghasughavelo asuboqo AMPEU zulo alokivishi asheshulo, kughou pano ayeghilo ayehpenike ighini keno.

³⁴Shikimthi keu AMPEU tsulo, kughengu paye aloe; pa kikimiye lhokta kutolo acheni.

³⁵Pa vilo ishi pilo, “Ningu xalulo, O Alhou ningu xakuluu; Ningu pekumqo tsulo, shiyeh kutami ulono ningu xaphe lulo, tishianguno ninguno akishe otsu nani eno oje akimthe sheni kehu.”

³⁶AMPEU shelo, Israilmi Lhou! Itehi eno pulhapuju pa shelo! Tishieno timi kumtsuno “Amen,” ipi kepushi AMPEU shelo.

³⁷Akukau David no Asaf ngo pa kusami Levimi pelo Puloshoqhi Bohu khilehi pua keno tile alhokuthu akumllaqo jukutsutsu penikeu shi. Panonguye tsalakipetsu panongu kumla achipilo shiche.

³⁸Obed Edom, Jeduthan nu eno timi lhotsugho tache pa laghami qono panongu kukuphuu shie. Hosah ngo Obed Edom pamano khagho kheni keu shie.

³⁹Achineu Zadok eno pa kusami achinemi kutamiye, Gibeon lo AMPEU kumlla alo akumlla jeli kumtsulo jukutsu tsue.

⁴⁰Ina-kijili panonguno akumlla kipti khachekighe lono piti mlla eno tiye AMPEU no Israilmi lau Ayezah tsupua keu kiqi lonoke.

⁴¹Panongu gholo Heman ngo Jeduthan eno kutami khamino pama gholo kuqhano AMPEU wu alhokupuju kikimiye je she alephe penikeu shi kisheluve.

⁴²Heman ngo Jeduthan pamaye afuko igha eno ayihe eno kutau akighileboqo lono shipili alephe pe. Jeduthan laghami no ahukikha khepe nikeu shie.

⁴³Tishive kethiu timi kumtsu akilo wokhave eno David ghi pa kilo woveno ado kitila pa kibolomi gholo ngo ae.