Read Sumi Naga YEKIKITHI ATUGHIU 17 Bible Online

YEKIKITHI ATUGHIU 17 - Sumi Naga bible

YEKIKITHI ATUGHIU 17

¹Tithiu Akukau David ye akikivi kukamino achekeu kilo achewuve. Ghulo lakhi pano timi lakhi hape tungkupu Nathan lau puwu ghi ishipi, “Itehi niye kedar su no aki shi keu kilo achewuvae, ikemu AMPEU Puloshoqhi Bohu ye aphiki lakhilo puaphie!”

²Nathan no khochile, “Ololo kiu kumsupu anikeno ti kumtsu shilo, kughengu Alhou no ogholo anie.”

³Ikemu tipaji Alhou no Nathan vilo pi,

⁴“Wulo eno iqeu David vilo ino ishi piani pilo, ‘Ipelo ngope nikeu achineki shinikuau ye nono kumoe.

⁵Ino Ijip lono Israilmi xaphekeu tsala lono ishi kutolo niye khilemu achinekilo ngo mphie. Niye alhokuthu aphikilo acheni eno a-a lakhi lono lakhilo iqesu wu acheni.

⁶Ino khilehi wukeno ti kuchopulo niye khilemu Israilmi vilo sakiphemi kisheno Kedar suno achineki shilo pimphie!

⁷“Tighenguno iqeu David vilo Ni Akughushu MPEU no ishi pi anipi pilo, ‘Ino opelo aluqaqhalo bheri phusu wupe eno tileno opelo Israilmi shou ayehkipeu shilupe.

⁸Nono khile wukeno ti kumtsu lo ino ogholo che eno ino ozu-uno wuno oghumi kumtsu havetsuno opelo tolupe. Ino opelo ayeghiqha kumtsu shou ajekipi eno sakiphetomi shou sakipheu shipeni.

⁹Ino iwu timi Israilmi ghenguno a-a kishepuani eno khunomu panongu ghimekeu shipemoni. Panonguno tipa yeghilo ighike kutolo kutamino panongu ghime che, ikemu titoi keu khilemu shimoae. Ino nongu ghumi kumtsu halevetsuni eno tipa yeghi nongu kughukomi tsuveni pi ino piqhi ani.

¹¹Kughou nono thiveno asunoqo kumo gholo qhovenikeno ino onuliqo gholo lakhi pelo akukau shilupe nani eno pa kukaqha akumto shilupe nani.

¹²Pano ighenguno achineki shitsuni kuau ke, pa kuka yehkipe alhokuthu achepe nani.

¹³Ino papu shini eno pano inu shini. Ikukuphu pa launo suchile sawuvemo nani, Saul lau shike toimo nani, Ino akuka lono pa xaqhive tsu eno tishi keu lono opelo kalupe ke.

¹⁴Ino iwu timiqo shou pa pelo ampi shipeni eno iyehkipe alhokupuju achepeni. Pa kuka yehpe khilehimu haumo nani’ ”

¹⁵Nathan no Alhou no pa lau piyesu keu kumtsu pesu David vilo pithi tsue.

¹⁶Ike Akukau David no AMPEU no ngo chekeu Aphikilo ilo iqano inikhu, “Nono ilau kiu mlave akeno niye akuzupu kumoe, AMPEU Alhou, momu ikibolomi nomu kumoe.

¹⁷Tishipimu nono ilau tamono mlae; nono ighini kuau mipe qolo ikughuko lau piqhipuave tsuae eno no, AMPEU Alhou, nono ikughape akiqheu timi lakhi toi peithae.

¹⁸Tinguno alau niye ovilo kiu pikepu ani kya! Nono tsaqui ni ithi ani eno tishimu oqeu lau gihu keu ae.

¹⁹Hiye opulou eno okukughu ilau akeuke eno ighini kuau lo ilau kije akeu kichetsu keue.

²⁰AMPEU, otoikeu kutami kuhae; alhokuthu ninguno olikhino Alhou ipi ithi anie.

²¹Israil shiyeh toi keu kutau hipa yeghilo kuhae, khuu nono aqemi shi akelono xapheluno panongu pesu owu timiqo shiluve keno. Nono ighono akumzapu kutomo panongu ghenguno mlakeu ghenguno ojekipi ayeghiqha kumtsulo pikulhae. Nono owu timiqo Ijipmi ulono kuqhophe eno Shiyeh kutami panongu zuuno nono haphevetsu.

²²Nono Israilmi pesu pulhapuju owu timiqo shie eno nono AMPEU panongu Lhou shie.”

²³Itehi, AMPEU Alhou, nono ilau eno ikughuko lau piqhi puakeqo kumtsu ado kumtsulo shikupulu apelo eno nono pikeu kumtsu tishilo.

²⁴Ojekipi ighono kije eno timino pulhapuju ishi pi achenia, “AMPEU Akughushu Alhou ye Israilmi shou ache keue.” Nono iyehkipe alhokuthulo pekishe tsuniae.

²⁵Niye imlo kumtoshi hipau kighini ovilo ininia, iLhou, nono thwokha kumtsu ilau pephe piyevae oqeu lau, eno ikughuko pesu kukami shitsuni pi nono ivilo pivae.

²⁶No, AMPEU ye, Alhou eno nono akichiqhipu ilau piqhipe qhivetsuae.

²⁷Ino ovilo ikughuko kumghatsulo pi khuani tishiaye panonguno tamono okukumgha ithulu anani, No, AMPEU, panongu kumghatsulo eno okukumgha alhokupuju panongu shou ache pelo.