Read Sumi Naga YEKIKITHI ATUGHIU 18 Bible Online

YEKIKITHI ATUGHIU 18 - Sumi Naga bible

YEKIKITHI ATUGHIU 18

¹Ado hami ngo apuzu Akukau David no Filistiyami sasu aghushino panongu shou toluve. Pano panongu kuka lono Gat phughi eno tipau kumxalo aphu akeqo kumtsu shokhaluve.

²Pano Muabmi ghi toluve, panongu pelo asuqha qhape pa tsuchepe.

³Tipashelo, David no Akukau Hadadezer, Siriya yeghilo Zoba eno Hamat yeghi kupunulo pa haphe, kughengu Hadadezer no Eufrati ahuu pukhaluveniye pukaputsake.

⁴David no panongu wu khurkulu 1,000 khurghushimi timi 7,000 eno ghushimi apukhu lono alacheche kemi timi 20,000 ishi khathaluvetsu. Pano khurkulu 100 sunhe kulupu likhi qhiveno kutauye kumtsu apukhu hechhe khavetsu.

⁵Kughou Damaska lono Siriyami ghushimi Akukau Hadadezer kuphuniyeno puwu keno David no panongu lakhaluveno timi 22,000 ghiqhivetsu.

⁶Tishieno pano panongu yeghilo aghazu shipuzu panongu pelo asuqha pa tsu cheuvepe. AMPEU no David pelo khile khilemu tokuluu shilupeke.

⁷David no Hadadezer no akhotoshi pepimhe chekeu shuna zutoqo hakholuve tsuno tipaqo pewo Jerusalem lo qhie.

⁸Pano Tibhat ngo Kun phughi khile Hadadezer no ayehpe chekeno tile no alazayi kutomo sughie. (Athiu alazayi hipaqoye Solomon no azu tughuko eno Achineki lo akhu ajukhu mlano peitha che.)

⁹Hamat lo Akukau Toi no David no Hadadezer wu ghushimi shou toluvekeu sutsa chilu.

¹⁰Tighenguno pano panu Joram Akukau David lau puwu puzu pa shikumto eno alokiqi tsa pe pano Hadadezer toluvekeu piwu pe, Toi no ghuthu kutomo pa sasu aghushi cheke. Joram no agho David tsu eno tiye shuna, tsandi eno alazayi no shikeu.

¹¹Akukau David no tipaqo akumlla alo peitha nike ghenguno shikimtheve, hipaqo nguno alau pano ashiayeh kutau lewu kelono hakho sughi keu shuna, tsandi - Edom, Muab, Ammun, Filistiya eno Amalek lono sughikeqo shikimtheve.

¹²Abishai, paza jeye Zeruia, pano Edommi Amti Khila lono timi 18,000 ghiqhiveno kaluve.

¹³Pano ghushimi tile akeqoye Akukau David qemi shive pe. AMPEU no David pelo khilekhile wumu tokulu shilupeke.

¹⁴David no Israilmi kumtsu shou ayehkipeu shie eno panongu kumtsu lau aphiphi lono peitha eno pa ghi panongu lau jukivi eno achipi xakutha lono ayehpeke.

¹⁵Abishai thikuzuu Joab no ghushimiqo shou zahtsuu shi; Jehoshafat, Ahilud nu no akiyeu shie;

¹⁶Zadok, Ahitub nu eno Ahimelek, Abiathar pamano achineu shi. Seraiah[13] no Kughakilo akiyeu shi

¹⁷Binaya, Jehoiada nu no David kheu shi eno Akukau David nuliqo kumtsu akiqheu lono pa gholo akumla kivi shie.