Read Sumi Naga YEKIKITHI ATUGHIU 19 Bible Online

YEKIKITHI ATUGHIU 19 - Sumi Naga bible

YEKIKITHI ATUGHIU 19

¹Ado kusho kumolo Akukau Nahash Amunmi hu thive eno pa nu Hanun no akukau shiluve.

²Akukau David no pi, “Nahash no ilau mlaitha ketoi, niye agigihu eno shoupau kivi Hanun piye mayesae.” Tighenguno David no pa tsapemi khami hape pa lau puwu ghi pa kupukimiye keu tsa pi. Kughou panonguno Amun lo ighi puzu Akukau Hanun putsa ighi keno,

³Amunmi sakiphemiqo no akukau vilo pi, “David no pa tsapemi puwu no olopiqi kutsu tsa pi akeuye opu gihu keu ghenguno tishi anipi noye kumsu ani kesha? Moe, tishi moe! Pano timi hipaqo puwu akeuye niyeghi kiu toi ani kela phukide kuda juno pano hipau leluveniayeno puju puwu ani!”

⁴Ike Hanun no David tsapemi sunheluveno panongu gilo amkhumhi miyelevetsu, panongu phimini apukhu kutolo suxula piniyive tsuno panongu kighide puwove.

⁵Ike Panonguye akilo ide wonike kujove. Kughou panongu lau kiu shiveke no David no chilu kelo pano panongu lau asutsa tsupuwu ghi panongu vilo panongu gilo amkhumhi ipeghi miphiloye ide ighi kevino Jerikho lo ngo aghilo pi pipuwue.

⁶Akukau Hanun ngo Amunmi ghi panonguno David pe aghumi shivekeu kumsuchilelu tishive kehu panonguno tsandi kilogram 34,000 pesu Ahuu Mesapotamia Siriya lo Maaka eno Zoba qolo khurkulu ngo tile ikukemi piqe saghiniye wu.

⁷Panonguno khurkulu 32,000 eno Maaka lo akukau ghushimi piqe sasu ighi puzu Medeba kupunulo aghazu shino ngoa. Amunmi ghi panongu phughiqo lono ipe aghushinike ghenguno kutokupui pe kehae.

⁸Hipaqono kiu shi akeno David no chilukelo pano Joab ngo ghushimi kumtsu hapesu puwue.

⁹Ike Amunmi qono aghili kutope alache su Rabba lono ipeghi, panongu phughi eno kukami khunoqo panongu kuphuniye ighikeno panongu no aghili kutope aluzaqhalo ngoe.

¹⁰Joab no aghumiqono pa leniye agizuu eno pa sukumxa akupunulo akeu ithulu tighenguno pano Israilmi aghutomi kishe pesu Siriyami kudau ngovepe.

¹¹Eno kutami ye kumtsu pa thikuzuu Abishai ulo sutsuno pa zahkutsu qholono Amunmi kudau ngope.

¹²Joab no pa vilo pi, “Tsala Siriyamino ihale cheghike ithulu aye ighieno ikuphulo eno tsala Amunmino ohale cheghi aye ino ighino okuphu tsunie.

¹³Akumto shi amlo kumtolo! Ningu niwu timiqo eno ningu Lhou phughi ghenguno pukaputsa aghushinie. AMPEU pelo ningu lau tishi shilu penie.”

¹⁴Joab ngo pa ghushimiqono akumtoshi kohasu hale eno Siriyami ye apanagha kohave.

¹⁵Kughou Amunmi no Siriyami no musano pochekeu ithulu keno panonguno Abishai launo kohaveno aphughilo idechile ilo khave. Tisheno Joab ghi Jerusalem lo idewove.

¹⁶Siriyami ye Israilmino panongu shou toluve keu kumsu chilelu tighenguno panonguno Siriya yeghilo ghushimi kukutsu eno Eufrati ghoki kipelau Zoba lo Akukau Hadadezer ghushimi zahtsuu Shobak ku sasu wo qhie.

¹⁷Kughou David no tipau chilu keno pano Israil ghushimi kumtsu kukumqono, Jordan katha iku eno tipaqo pelo Siriyami kudau kuto pe ngope. Aghukishi huthuve,

¹⁸eno Israilmino Siriyami ghushimi hachile suve. David no pawu timiqo sasu Siriyami khurkulu kusami 7,000 eno apukhulachelo ghushimi 40,000 ghiqhivetsu. Panonguno Siriyami zahtsuu Shobak ghi ghiqhivetsu.

¹⁹Kukami khunoqo Hadadezer qholo achekeno panonguye Israilmino panongu haleve keqo shivea pi kumsuchilelu keno panonguno David sasu vishoshive eno panongu kumtsu pa qholo acheuve. Siriyamiye khilehimu Amunmi kuphu nikeu pulo move.