Read Sumi Naga YEKIKITHI ATUGHIU 21 Bible Online

YEKIKITHI ATUGHIU 21 - Sumi Naga bible

YEKIKITHI ATUGHIU 21

¹Satan ye Israilmi gholo akupuna sutsu nishi kumsuve, tighenguno pano David pelo timiqo kihiju penikeu pulovepe.

²David no Joab ngo kijemi kutamiqo ahza tsu ghi pi, “Israil kumtsulo wulo eno acheku lakhi lono acheku lakhi kutolo wuno timiqo kihijulo. Niye timi khijehi anike la ithi nishi anie.”

³Joab no khochile, “AMPEU no Israilmi pelo itehi nguno ghuthu aqheqhe no vekighishe iko apeniu! owu ajekipi pu, panongu kumtsu oqemiqoe. Noye kushiniyeno hitoi shiju nishi ani kya? eno shiyeh kumtsuno pimive penishi ani kya?”

⁴Ikemu akukau no Joab pelo ahza kutsu luvepe. Joab no mtazu cheveno Israil yeghiqha kumtsu vehokhave eno Jerusalem lo ide ighi.

⁵Pano Akukau David vilo aghukishi kumlalo sulu kuzupumi khijehi akela pesu pi: Israil lo timi 1,100,000 eno Juda lo 470,000.

⁶Joab no akukau zah kutsu amlokiqi kuhano ake ghenguno paye Levi ngo Benjamin shiyeh qoloye lakhimu kihisumoe.

⁷Alhou ye panonguno kiu mlakeno ju alokiqi kuhave, tighenguno pano Israilmi ghimeve.

⁸David no Alhou vilo pi, “Ino hi shikeu lono kumsapu xine shivae! Kimiyeno ikipimi shitsu kevilo. Ino aghuzu anikha kumla shivae.”

⁹Tileno AMPEU no David wu tungkupuu Gad vilo pi,

¹⁰“Wulo eno David vilo ino pa lau kishelukepu kuthu qhitsu ani pilo. Pano khikhiu kisheluni keno ino ti shitsunie.”

¹¹Gad no David lau wuno, AMPEU no kiu shilopi keno kumtsu pa vilo pi eno iniju, “Hipano kuthu dolo khi khiu luni kya?

¹²Ampe kuthu puqumiye keu keo? momu oghumi ghushimi zulo aqhi kuthu poveni keo? momu atsala kuthu dolo AMPEU no pa zuta oyeghi shou pukuno Israilmi yeghiqha kumtsulo paw kungumino akithi sughino kusakusho shive peni kya? Niye khokichile khikhiu pesu AMPEU lau tsuni kya?”

¹³David no Gad khochile, “Niye avekusa dolo avae! Ikemu niye timi pelo ighime penishimoe. AMPEU no ighimeve peni, kughengu paye kimiyekiniu ghi ke.”

¹⁴Tighenguno AMPEU no akusu Israilmi lau puwu tsue eno timi 70,000 thive.

¹⁵Tishieno pano kungumi hape Jerusalem shipusave penike puwu, ikemu pa mlo kiliveno kungumi vilo pi, “Tavelo, ti lumkhavae!” Kungumiye Jebusimi Arauna wu aniqa philo puthugho ae.

¹⁶Kungumino pa ulo azuta pesu amlhu mtalo puthugho akeu eno Jerusalem kutsaveniye kutope akeu David no ithulu. Tile David ngo sakiphemiqo yeqhiyephi uakeqo kumtsu panongu gino ayeghilo shosupe itsaqive.

¹⁷David no inikhu, “O Alhou, ozulo kuquve keu hu nike. Timi kihiju wulopi ahza tsukeu hu nike. Akumlhou timi hipaqoye kiu shive kya? AMPEU, iLhou, ni ampi eno nibolomi ghimevelo eno owu timiqo pukhalulo.”

¹⁸AMPEU wu kungumino Gad vilo David lau wuno AMPEU ghenguno Arauna niqalo akumlla kiptia mlalopi ahza tsulo.

¹⁹David no AMPEU zah kutsu lupuzu wu eno tiye Gad no pa vilo pikeu toi shi.

²⁰Ike Arauna niqalo pa ngo pa nuli bidi ishi no asho thi munu aghie eno kughono anu noqono kungumi ithulu keno akumsa launo powo itshuwu khave.

²¹Arauna no kughou Akukau David ithulu keno tipa mtsa lono pano aniqa qhiveno pa zulo itsaqi eno pa gino ayeghi dighi shike.

²²David no pa vilo pi, “Oniqa ivilo jesu velo, tishi anguno ino AMPEU ghenguno akumlla kiptia mlani eno akusu shipuhave nike. Ino tipau me kumtsu otsuveni.”

²³Arauna no pi, “Hi lunithono, oje kipipu shipeniu, eno nono kiu shinishi kela shilulo. Hilehi akumlla khachelo pitino mlla kepu amshitsuqo ghi anie eno qolekepu su piti nikeu ghi ani eno asho thi pesu mlla kepu ghi ani. Hipaqo kumtsu otsuve ani.”

²⁴Ikemu akukauno khochile, “Tishimoe, ino tipau me tho otsuveni. Owu kiu anikeno ino qhumokeuye pesu AMPEU kumlla shimo nani.”

²⁵Eno pano Arauna niqa me shunayi 600 tsuve.

²⁶Pano tile AMPEU wu akumlla kipti khache ghe eno piti mllakeu eno kuposhukeu kumllagho shi. Pano inikhu eno AMPEU no pa kighini khochiletsuno kungugha lono ami piqi tsupuzu akumlla kipti khachelo ghiqhipe bekeu pitive tsu.

²⁷AMPEU no kungumi vilo pa zuta pewuvelo pi eno kungumino pa tsa lue.

²⁸David no tipau ithuluno AMPEU no pa kighini khochileve tsu pi ithi tighenguno pano Arauna niqa lono ghiqhino akumlla kipti khache ghepuzu mllae.

²⁹AMPEU no ngochekeu Aphiki khikhi asaye yeghi lono Muse no mulakeno eno akumlla kipti khache khile ghiqhi heqhino mlla chekeno itehi kutolo Gibeon lo akumlla alo achephi;

³⁰ikemu David ye tipa alo wupuzu Alhou mlla mlave kughengu paye AMPEU wu kungumi zuta msave ke.