Read Sumi Naga YEKIKITHI ATUGHIU 22 Bible Online

YEKIKITHI ATUGHIU 22 - Sumi Naga bible

YEKIKITHI ATUGHIU 22

¹Tileno David no pi, “Hipau alono AMPEU Alhou wu Achineki shi kuzupue. Khilehi Israilmino piti mllakeu shi amayesa keno, hile akumlla kipti khache ani.”

²Akukau David no inami khijehino Israil yeghilo ngocheni keno kumqolo pi ahza tsu tisheno pano panongu kumla kutotsu. Panongu gholo khamino achineki shinike ghenguno chutha pe .

³Pano ayi shu ngo tsadakepu shi eno asulo tsadano ilokighi la shipenike sughitsu eno alazayi khunomu ahushi mlakepu ghi sughi tsu.

⁴Pano Tur ngo Sidonmi pelo Kedarsu pa ghenguno sughi tsu kulupu shi kithipe qhi tsu.

⁵David no ishi kumsu, “Achineki khikhi inu Solomon no shikepu shi anikela tiye ighono akiqheu eno ayeghiqhalo aje kipi shi pemayesa. Ikemu paye alhothe eno puju shiju keu kuha aphi, tighenguno ino hipau ghenguno kutokughoipe qhitsu mayesavae.” Ike David ye pano thinike zuuno akikishi nhemgha kutomo kutokughoi pesu qhipua tsue.

⁶Pano panu Solomon kusawo qhino pa vilo AMPEU, Israilmi Lhou kumlla chineki shilo pi ahza tsu.

⁷David no pa vilo pi, “Inu, niye achineki lakhi shieno AMPEU iLhou gihu nishi ae.

⁸Ikemu AMPEU no ivilo pikeuno niye aghukishi lono timi kutomo ghiqhivea eno aghukishi kutomo shivae. Tighenguno ahji pelekeu shivae hipaqo kumtsu ino huthu phe, tighenguno pano ipelo pa ghenguno achineki shipemonike ilakhavae.

⁹Ikemu pano ashoqhi lakhi ilau piqhie. Pano pi ‘Noye anu lakhi shi nani khuu alokughuno lono ayehpeni kuau keno, kughengu ino pa ghumi kumtsu launo pa ghenguno alakishi shitsu niae. Pa je ye Solomon[15] kutsulo, kughengu pa yehkipe ghuloki lono ino Israilmi alakishi eno sushokulu sughitsu nanie.

¹⁰Pano ighenguno achineki lakhi shitsu nani. Pano inu shini eno ino papu shini. Pa philo ipekighino Israilmi lau pulhapuju ayehpeu shi ani.’ ”

¹¹David no pi ide, “Itehi, inu, AMPEU oLhou pelo ogholo apeniu, eno pano piqhi puakeu olauno achineki shiqhi kulupushi tokulu shilu peniu,

¹²AMPEU oLhou pelo ololo alokutsu sutsuno Israilmi shou pa yehza kiqi lono ayehpelu peniu.

¹³Tsala nono ayehza khikhi AMPEU no Muse vechewo tsu keno kumtsu pekupulu aye noye tokulu shi nani. Omlo kumto lo eno kiunomu oshi kuighuve pekevilo.

¹⁴Achineki ghenguye ino tokulu thaqhu kikepe puani, shuna metrik ton 3,400 shou ani, tsandiyi metrik ton 3,400 ani hipaqono akishikelo peitha peniyeno ke. Hipaqo nguno alauno alazayi ngo atuqo ghi kutope puatsua, ikemu noghi alau phusu kuphalo.

¹⁵Oghenguno akumla kishimi kutomo ani. Tile timi khami atu chitha kemi ani, eno atu yekuthami ngo akikishimi eno kutshakughashi mlakemi anhetsumi khunoqono mutshaminhei

¹⁶shuna, tsandi, alazayi eno ayiqo peithalu cheni keno ani ke. Itehi akumla huthu wovelo eno AMPEU pelo ogholo apeniu.”

¹⁷David no Israilmi sakiphemi kumtsu lau Solomon kuphu tsulopi ahza tsu.

¹⁸Pano pi, “AMPEU oLhou ogholo ani eno ajeli thwokha lono alokughuno otsuvae. Pano ipelo hipau yeghilo kughuna chekemi kumtsu shou tolupe eno itehi panonguye ou bokhulo eno AMPEU ulo ngovae.

¹⁹Itehi omlo kuchopu eno angulho kuchopu pesu AMPEU oLhou huthulo. Achineki shinikeu huthuvelo tishianguno nono AMPEU wu Puloshoqhi Bohu pesu ilo tilehi qhilu nani eno pa mlla keulo akimthe nhemgha kumtsu tilehi qhilu nani.”