Read Sumi Naga YEKIKITHI ATUGHIU 26 Bible Online

YEKIKITHI ATUGHIU 26 - Sumi Naga bible

YEKIKITHI ATUGHIU 26

¹Levimi timi hipaqono achinekilo aghukhe kumla shipe nike ghenguno panongu kumla kughutsue. Kora laghalo Meshelemia Kore nu, Asaf kibolomi.

²Paye anu tsuni ache, eno panongu punu mpe kiqi lono hitoi: Zekharia, Jediael, Zebadia, Jathniel,

³Elam, Jehahanan eno Eliehoenai.

⁴Obed Edom ipikeu, khuu Alhou no anu tache kumghape pa tsukeno, apunu mpe kiqi lono hitoi: Shemaia, Jehozabad, Joa, Sakhar, Nethanel,

⁵Ammiel, Isakhar eno Peulethai.

⁶Obed Edom nu anoghiu, Shemaia no anu tsugho shie: Othni, Refael, Obed, Elzabad, Elihu eno Semakhia. Panonguye pututa laghalo akhotomiqoe kughengu panonguye ighono shitsa tokulupu akehu; akhotono hi ashekhau pamaye ighono pakutakeu ghokutsu ae.

⁸Obed Edom kibolomi hipau kumlalo shitsa shive kemi timi lhotsugho kini shive.

⁹Meshelemia kibolomi shitsami timi chighi tache shiluve.

¹⁰Merari laghalo Hosa, khuuno anu bidi shikeno: Shimri (paye anu anoghiu kumo kemu, papuno pa pelo sakipheu shipe).

¹¹Hilkia, Tebalia eno Zekharia. Panongu kumtsu kuqhakelo Hosa kibolomi achinekilo aghukhemi timi chighi kuthu ae.

¹²Achinekilo aghukhemi amqo shi kijeve, akibo kiqi lono eno panonguye Levimi kutami toi pututa kumla kughu tsukeulo Achinekilo mlae.

¹³Akibo lakhi khilo kije kitila kihimono, khunoqono ahukikha khikudau khe maye sakeno asaqhiju.

¹⁴Shelemia no kipelau hukikha shou qhibelu eno panu Zekharia, khuu alhokuthu akukumsu kivi tsuchekeno pano ahuu hukikha shou qhibelu.

¹⁵Obed Edom no apeu hukikhalo mlape eno panuliqo pelo anhemgha kiqhi cheboqo khe penikeu shi.

¹⁶Shupim ngo Hosa pamano kulolau hukikha eno Shalleklet hukikha ahuu laghi khe peni keu shie. Aghukhe shikeu kumlaye atuqhudo kikije shino khe penikeu shi, tiye kihikuthado ashe ashelo shi kheke.

¹⁷Kipelauye aghukhemi tsugho atsala kipetsu khe penike ghenguno qhie, ahu-u bidi eno apeu bidi ishi khe. Aghukhemi bidi pelono tsalakipetsu anhemgha kiqhi cheboqo hu timi mikini-nino achebo lakhi khi khepe.

¹⁸Kulolau kudau achineki halau aghukhemi bidino khe, kinino alaghilalo ngo eno kinino achineki kisheqholo ngoe.

¹⁹Akumla kikije hipaqoye Kora lagha ngo Merari lagha pelo hipau ghukhe kumla shipeni keu shie.

²⁰Levimi kusami kutami[17] pelo achinekilo pisabo eno anhemgha qhichekeu cheboqo khikhi Alhou kumllagho shikimthe pe qhipua keno tipaulo ampi shilupe.

²¹Ladan Gershon nuliqo gholo lakhike pano apuasuqo gholo akibolomi amqo shou atou eno Jehiel nuliqo ghi tilehi sukuqhae.

²²Ladan nu Zetham ngo Joel pamano achinekilo pisabo eno anhemgha qhichekeu cheboqo khepe.

²³Amram, Izhar, Hebron eno Uzziel kughukoqo ghi akumla kughu tsue.

²⁴Shebuel, Muse lagha Gershom nu, pa pelo achinekilo pisabo khekeulo akichiu shipe.

²⁵Gershom thikuzuu Eliezer launo paye Shelomit sasu asholokumi shilue. Eliezer nu Rehabia, Rehabia nu Jeshia, Jeshia nu Joram, Joram nu Zikhri, Zikhri nu Shelomit.

²⁶Shelomit ngo pa kibolomino Akukau David ngo akibo qolo atomi ngo alagha lo sakiphemi mqo ngo ghushimi kijemi qono akumlla nhemgha shikimtheveno Alhou tsuvekeu kumtsu shou ampi shilupe ke.

²⁷Panonguno aghukishi lono hakholukeu nhemghaqo pesu shikimtheveno Achinekilo peitha.

²⁸Shelomit ngo pa kibolomino Achinekilo shikimtheve keu nhemgha kumtsu shou ampi shie eno tiye tungkupu Samuel, Akukau Saul, Ner nu Abner, Zeruia nu Joab ishino agho sughi ke kumtsu shou ampi shipeke.

²⁹Izhar kughuko gholo, Khenania ngo pa nuliqo pelo ayehpekeu kumlapu shipe: yekithipe qhinikeu eno Israilmi gholo kutsala keulo xatha tsunikeu shie.

³⁰Hebron kughuko gholo Hashabia ngo pa sholokumi 1,700, panongu kumtsu shitsami, panongu pelo achine yehlo eno ayeghilo yeh kipelo Israilmi Jordan kulolau akeqo kumtsu shou ayehpe penikeu shi ke.

³¹Jeria no Hebron kughuko shou sakipheu shie. David no akukau shilukeu ampe lhobidi kupu akelono Hebron kughuko akibolomi ighikeu phuphelu eno hipaqo laghalo ghushimi Gilead yeghilo Jazer ipikeulo kumqo akeu phuphelue.

³²Akukau David no Jeria laghalo akibolomi timi 2,700 kishephe pesu Israilmi kipelau Jordan Ruben, Gad eno kipelau Manasse yeghi qolo achine yeh kulu eno ayeghilo yeh kipelo ayehpe penikeu shie.