Read Sumi Naga YEKIKITHI ATUGHIU 28 Bible Online

YEKIKITHI ATUGHIU 28 - Sumi Naga bible

YEKIKITHI ATUGHIU 28

¹Akukau David no Israilmi kijemi kumtsu Jerusalem lo kumqolo pi ahza tsue. Tighenguno alaghalo sakiphemiqo, kuakini shou ampemiqo akukau wu anhemgha shou ampemi eno pa nuliqo kuchouno piniaye akuka lakhulo kijemi qo, ghushimi sakiphemiqo eno timi akhotomiqo - panongu kumtsu Jerusalem lo kumqoe.

²David no panongu zulo puthugho eno panongu vilo pi: “Ighakhulo kughuna kuamiqo, itsa inilo. Niye Puloshoqhi Bohu qhikepuki lakhi alhokuthu ghenguno shinishi ani, khikhi AMPEU Alhou pukhu kinepua keno. Ino achineki shipe pa gihu keu shiniye kutopesu qhivae,

³ikemu pano ipelo ti shipenikeu lakhavae, kughengu niye ghushimi lakhi eno timi kutomo ghiqhivae.

⁴AMPEU, Israilmi Lhou no ikisheluvae eno ikughukoqo no Israilmi shou alhokuthu ayehpeni ae. Pano Juda lagha pelo sakiphemi shipenike kishelue eno Juda lagha lono pano ipu kibolomi kishelue. Tipaqo gholono pano ilau alokiqi apuzu ipelo Israilmi kumtsu shou akukau shipeke.

⁵Pano atianu kutomo ikumghatsu eno panongu kumtsu gholono pano Solomon kisheluno pa pelo Israilmi kumtsu shou ayehpe, tiye AMPEU kukaphulo.

⁶“AMPEU no ivilo pi, ‘Onu Solomon no ighenguno Achineki shilu nani. Ino pa kisheluveno inu shivae eno ino papu shiniae.

⁷Tsala pano itehi igholu aketoi hikithipu lono iyehza eno izah kutsuqo kumtsu pelu aye ino pa kukaphu alhokupujulo achepe nani.’

⁸“Tighenguno itehi iwu timiqo ningu Lhou zulono eno Israilmi, Alhou timi kumtsu kumqo ake lono, Ino nongu hakite ani, nonguye AMPEU ningu Lhou no kiu zah nongu tsukeno tikumtsu pelulo, tishi anguno nonguye ayeghi kivi alhokuthu pukhape alu nani eno tishi keu lono nongu tianulino alhokuthu pekishe ache nanie.”

⁹Pano Solomon vilo hi pi, “Inu, ino ohakite ani opu Lhou pukhalulo eno omlo kijevemono eno okukumsu iqemono pa huthulo. Pano ningu kukumsu eno ninguno lunishi keu kumtsu ithi anie. Tsala nono pa phuwu aye pano no ikhilu nani; ikemu tsala nono pa launo pove aye pano alhokuthu ghenguno okumsumave nia.

¹⁰Noye AMPEU no pa kimthea Achineki nono shilu nani pi okishelu keu kumsululo. Itehi akumla huthuvelo eno okimiji phemono mla thuvelo.”

¹¹David no achineki shinikeu kukughu kumtsu pesu Solomon tsu, anhemgha kiqhi cheboqo eno achebo kutauqo eno Shishe Akimthe-a khilehino axine qhive tsuchekeno.

¹²Pano akikhala akisheqho eno tipaqolo acheboqo kishi shiniye kumsupu akela kumtsu pesu pa vilo pi eno achineki lo anhemgha kiqhi cheboqo khilehi AMPEU kumllagho shikimthe pe qhikeno kumtsu pa vilo pi.

¹³David no achinemi ngo Levimi Achineki lo kiu toi akumla shimaye sakeno eno achineki lo akhu ajukhu pe pimhe mayesa keno pano akukughu shiphe pesu qhitsue.

¹⁴Pano shuna tsandiyi khijehino akhu ajukhu mla mayesa keno kichetsu,

¹⁵akulu lakhi khi eno akulu kibepu,

¹⁶tsandiyi akibepuqo eno shuna akibepu lakhi khi khilehi asho pe Alhou mllanike qhiche keno pano kichetsu.

¹⁷Pano shuna kuchou khijehino ayilisa, abohu eno ali mlamasa keno eno tsandi ngo shuna khijehino akhuqo mlamasa keno pithitsu,

¹⁸eno shuna kuchou khijehino akiptipu gho pitikeu-a khilehi tsungqui keu piti chekeno eno kerubim no achishibo sukhope AMPEU wu Puloshoqhi Bohu khonhape ngo kepu ghi mula masa keno piyeke.

¹⁹Akukau David no pi, “Hipaqo kumtsu AMPEU no mije kutsu lono yepe qhino mla wonikeu shi ilau pithi tsuke.”

²⁰Akukau David no panu Solomon vilo pi, “Amlo kumto shilulo eno pukhubelulo. Akumlaqo huthuvelo eno kiu nomu ovekhape kevilo. AMPEU Alhou khuu ino huthu cheni keno pano ogholo apeni. Paye okumsumavemo nani, ikemu nono pawu Achineki shiqhi moke kutolo pano osasu anani.

²¹Achinemi eno Levimi pututano Achineki lo kiu shimasa keno akumla kughupe qhive tsue. Akumlami shitsami kumtsu alokivishi okuphu nani timi kumtsu eno sakiphemi kumtsu ozah kutsu qholo anani.”