Read Sumi Naga YEKIKITHI ATUGHIU 29 Bible Online

YEKIKITHI ATUGHIU 29 - Sumi Naga bible

YEKIKITHI ATUGHIU 29

¹Akukau David no kuho akemi kumtsu lau kutughue: “Inu Solomon ye Alhou no pa kisheluvae, ikemu paye lhothemi eno puju-peju keu kuha aphie. Akumla ajuiche mla kepushi ani kughengu hiye timino ngoni keu akuka lakhu kumoe ikemu AMPEU Alhou wu achineki lakhike.

²Achineki shinike ghenguno ino akisuyezu jeli kumtsu kutokughoi shipesu qhipua tsuae - shuna, tsandi, alazayi, ayi, tokta, amekusho tu eno achiku ananu shinikeu tu eno marbel kutomo puani.

³Tinguno alauno iwu luthu nhemgha shuna ngo tsandi ino Alhou wu Achineki ghenguno tsu ani kughengu ino iwu kikimiye pa lau akehue.

⁴Ino shuna thakughutsuve keu metrik ton 100 shou eno tsandi kuchou metrik ton 240 toikeu Achineki lo akupuwuqo lo tunatunu shipenike

⁵eno akumlamiqo pelo akhoto a qolo mlasu penike tsu ani. Itehiye nongu khukhumu puloniqhiyi AMPEU mllanishi kemi anima?”

⁶Tilehi abolomi gholo atomi, alaghalo kijemi, ghushimi zahtsumi anhemghalo ampemi, ayehkipemi kumtsuno pututano tsunishikeu

⁷panonguno Achineki kumla ghenguno tsue: shuna metrik ton 170 shou, tsandi metrik ton 340 shou, alazayi metrik 620 kutolo eno ayi metrik ton 3,400 nguno alau qhalue.

⁸Timi khunoqono akughupu tu akeno pesu Achineki pisa kiqhi alo tsue, khuu Jehiel, Levimi Gershon laghamino tipau shou ayehpe akeno pa ulo tsuke.

⁹Timiqono alokivishi puloniqhiyi AMPEU tsue eno panongu lokivi launo pesu tsuke. Akukau David ghi ighono alokivi shive.

¹⁰Akukau David no aqo kuho akemi kumtsu zulono Alhou she. Pano pi, “Ningu puasu Jakob wu AMPEU Alhou, timi kumtsu pelo alhokupuju oshe achepelo!

¹¹Noye kije eno akumtou, ajukuvupu, saghusaghui keu eno akukau ke. Atsutsulo eno ayeghilo thime kumtsu owue eno noye akukaue, kumtsu shou ayehkipeu ke.

¹²Kinikulu kumtsu olauno ighie; okuka-kumtono thwokha kumtsu shou ayeh peke; eno noye khukhumu kije eno mtotoi shitsu kulupu anie.

¹³Itehi, ningu Lhou, ninguno oshikimthi anie eno ninguno ojukuvupu je she anie.

¹⁴“Ikemu iwu timiqo eno niye pinikeu loye kiumu otsu kepu kuhae, kughengu thime kumtsu olauno agho ithulu keue eno ninguno khikhi owu shivea keno pesusu otsuchile anie.

¹⁵Nono ithi ani, O AMPEU, ninguye ningu puasu noqono shiketoi shikeu kughusawuve keu eno inami shivekeu toi ningu kuxu puwovae. Ningu tsalaqoye akicheqho toi yekhuwovae eno ninguye akithi zu itshumlae.

¹⁶O AMPEU, ningu Lhou, ninguno kinikulu hi kumtsu ogihu keu shi ochineki shipe nike eno oje kimthe shipe nike sughi ani, ikemu hipaqo kumtsu olauno ighie eno hi kumtsu owue.

¹⁷Ino ithi noye timi kumtsu mlo ithi piliju ani eno puloniqhiyikemi wu ikhilu chenie. Amikucho lono eno puloniqhiyi keu lono hi kumtsu ino otsu anie eno owu timiqono kishi alokivi shi akumllagho pesu ighino otsu anikeno ino ithulu anie.

¹⁸Ningu puasu Abraham, Isak eno Jakob MPEU Alhou, hipau kumlla mlo owu timiqo mlolo apelo eno panongu pelo pulhapuju opululu apelo.

¹⁹Inu Solomon pelo ozah kutsu amlo kuchopu pesu peluno ino kutope qhipuatsu keu nhemgha pesu Achineki shilupe kepushi pa kumgha tsulo.”

²⁰Tishino David no timiqo ahza tsue, “AMPEU shelo nongu Lhou!” Kuho kumqo akemi kumtsuno panongu puasu Lhou, AMPEU she eno panonguno itsaqino AMPEU agigihu tsu eno akukau ghi tsue.

²¹Tipa tsala shelo panonguno tughashi ghiqhino akumlla shighi, AMPEU lau panongu shikimthe keushie eno tishino timiqo pelo tipau chupe. Tinguno alau panonguno amshitsu 1,000, bheritsu 1,000 pesu akumlla shie, tipaqo kumtsu pesu akumlla kipti gho kipti-a lono piti. Panonguno atsayiji ghi pesu mllae.

²²Ike tipa tsala kupuju panonguye ighono alokivishi AMPEU zulono chu shoe. Tipashelo ghuthu akiniu panonguno Solomon no akukau kepi vekupha. AMPEU jelono panonguno teli pe pa nuhkishe no panongu shou ayehkipeu shi eno Zadok pelo achineu shipe.

²³Ike Solomon no papu David kuka alo ikughiluve khikhi AMPEU no huthu tsu keno. Paye tokuluu kukau shie, eno Israilmi shiyeh kumtsuno pa tsa lue.

²⁴Kijemi eno ghushimi kumtsu eno David nuli kutami kumtsuno Solomon pelo agigihu kukau shipenipi puloluve.

²⁵AMPEU no ashiayeh kumtsu pelo Solomon zulo ighuqhiyi ngope eno pano pa pelo Israilmi ayehkipemi kukami kutami nguno alau ajekipipu shiluvepe.

²⁶David ye Jese nu Israil lo ampe lhobidi ayehpe.

²⁷Pano Hebron lo ampe tsuni eno Jerusalem lo ampe shighi kuthu ayehpe.

²⁸Paye aloqhi kitemi shino thive, kinikulu eno gihu kuzupu timi, eno panu Solomon no pa zuqhulo akukau lakhu ikhilu.

²⁹Akukau David kuxu ghili abothu lono ashekha kutolo tungkupmi Samuel, Nathan eno Gad pano kuthuno yepe qhie.

³⁰Yepe qhikeu lono paye kishi ayehpe chekeno paye kiu toi akumto keno eno pa lau kiu shikeno kumtsu Israilmi lau eno tipau kumxa kuka phughiqo kumtsulo kishi achekeno yepe qhikeulo anie.