Read Sumi Naga YEKIKITHI AKINIU 1 Bible Online

YEKIKITHI AKINIU 1 - Sumi Naga bible

YEKIKITHI AKINIU 1

¹Akukau David nu Solomon no Israil kuka yehpe mtotoi pea, eno AMPEU pa Lhou no pa kumghatsu eno pa pesu ighono kije shitsu.

²Akukau Solomon no 1,000 shou eno 100 shou kijemi eno yehpekalo kijemiqo, akibolo ampemi eno tinguno alau timi kumtsu lau ahza lakhi tsu.

³Panonguno Solomon gholo Gibeon lo akighini-alo wu kughengu a-a tipauye AMPEU Kungoa Phiki lakhi shi-a, AMPEU qeu Muse no timi kughunamoke alo tipau shisu keuke.

⁴Tishino Puloshoqhi Bohu ye David no Kiriat - Jarim lono sughi eno pano Aphiki mlano puaniye shikeu Jerusalem lo pewo qhi.

⁵Uri nu Bezalel eno Hur tikishiuno mlakeu alazayino shikeu akumlla kipti-a ghi AMPEU kungoa Phiki zulo Gibeon lo pua.

⁶Aphiki zulo wuno akukauno alazayi no shikeu kipti-a lono lhoxu 1,000 heqhipe piti mllake.

⁷Tipaji Alhou no Solomon zulo ipeghino pa vilo iniju, “Ipelo kiu otsu penishi ani kya?”

⁸Solomon no khochile, “Nono alhokuthu ipu David qhuivuche eno ipelo pa thisu pesu kapeke.

⁹O AMPEU Alhou, nono ipu lau ashoqhi shikeu shikupu tsulo. Nono ipelo timi aqo kitikhi kihikha kumla shou kapeke.

¹⁰Tighenguno alokutsu eno akighithi itsulo panongu shou ayeh penike ino avehupu shi anie. Tikumo aye niye kishi owu timi hijejehi shou ayeh peluni kya?”

¹¹Alhou no Solomon khochile, “Nono achipiu kisheluvae, kuakini khunike zuqhulo momu ajekipiu phumo momu oghumi pithivetsu penike ghenguno khumoe momu oxupushu tsu penike ghenguno khumoe ikemu ino timi khunoqo shou ka peniye kishekeno iwu timi shou ayeh pelupe nike alokutsu akighithi nono khue.

¹²Ino alokutsu eno akighithi otsuni. Tinguno alaughi akuakini, ajekipi kukami ozuu eno othiu khunomu pighichemokeu pe otsuni.”

¹³Tithiu Solomon ye Gibeon lo Aphiki kumlla qhiveno Jerusalem lo idewove. Tilehino Israilmi shou ayeh pecheke.

¹⁴Pa khurkulu ghushimi 1,100 kuto khurshi - ghushimi 12,000 qhiluve, tipaqo dolo khamiye Jerusalem lo qhi eno kutamiye aphughi a-a kututa lo qhive.

¹⁵Pa kuka ghulokiloye Jerusalem lo shuna ngo tsandiyi ye atu toi balha shi ache eno kedar subo no khughuthibo toi kupukunoshi Juda yeghiqha kumtsu chhitoi ache.

¹⁶Akukau ghinimiqono Musri ngo Kilikio lono khurshi jepuwu nikeu lakhave eno Ijip lono khurkulu jepuwunikeu lakhave.

¹⁷Panonguno Hatimi ngo Siriyami kukami lau khurshi ngo khurkulu tsupuwu, khurkulu lakhilo ghuka 600 meshi eno khurshi lakhilo ghuka 150 shiche.