Read Sumi Naga YEKIKITHI AKINIU 10 Bible Online

YEKIKITHI AKINIU 10 - Sumi Naga bible

YEKIKITHI AKINIU 10

¹Rehoboam no Shekhem lo wuke, tilehi ahuu akemi Israilmi kumtsuno pa pesu akukau shiniye kuho kumqoke.

²Kughou Nebat nu Jeroboam, Solomon akukau launo Ijip lo povekeu huno hipa sutsa chilu keno pano phuinalo idechile ighive.

³Ahuu akeqo laghamino pa kupuwu eno panongu kumtsu kumtsa Rehoboam lau wuno pa vilo pi,

⁴“Opuno amakho kimshi nishou betsuke. Ikemu nono amakho tipaqo kumthuvetsu aye eno nighenguno akuxu ililai xulupe aye ninguye aghokulu shi oqe nani.”

⁵Rehoboam no khochile pi, “Ino hipau vehu kumsu kutoju pe kepushi atsala kuthu itsulo. Tithiuno ideighilo.” Tighenguno timiqoye wuve.

⁶Akukau Rehoboam no papu Solomon lau akukumsu tsuchekeqo muchomi sasu kuptsaju. Pano ishi panoqo iniju, “Timi hipaqo khochile kepu nonguye akukumsu kiu itsuni kya?”

⁷Panonguno ishi khochile, “Nono timi hipaqo kimiye eno atsa kivi pesu panoqo mlo shipiqitsulu aye panonguye pulhapuju aghokulu shi oqe nani.”

⁸Ikemu pano muchomiqono akukumsu tsukeu kukuthave eno lhothemi pa qheshoqo anileshi akukumsu pa tsu akemiqo lau wuve.

⁹Pano tipaqo vilo ishi iniju, “Nonguye ipelo kiu shilopi akukumsu tsuni kya? Niye timiqono ivilo panoqo makho kumthuve tsulepi akeqo lau kiu pilo pikya?”

¹⁰Tipaqono ishi khochile, “Noye timi tipaqo vilo ishi pivelo: ‘Iuloti ye ipu chita nguno shishoi keuke.’

¹¹Panoqo vilo highi pilo, ‘Ipuno amakho kimshi pesu nongu shou beke; ino tipau nguno mishishei keu shitsuni. Pano aqhe pe nongu ghaqhike; ikemu niye khurshi kihepu ayisahu kusuno nongu ghaqhi nani.’ ”

¹²Atsala kuthu thiu Jeroboam ngo timiqo kumtsu Akukau Rehoboam lau ideighi, tiye pano panoqo vilo pi puakeu toi ighike.

¹³Akukau no muchomiqono akukumsu tsukeu kukuthave eno lhothemino akukumsu tsukeu kiqi lono

¹⁴mughachhoi timiqo putsake. Pano pi, “Ipuno amakho kimshi pesu nongu pipeke; ino tinguno alau akimshiu shitsu nani. Paye aqhe pesu nongu ghaqhi ke ikemu niye khurshi kihepu yisahu kusuno nongu ghaqhi nani!”

¹⁵Hiye AMPEU Alhou pulou ke, pano Shilo lo Ahija tungkupu vechewo Nebat nu Jeroboam vilo pipuakeu shikupuni yeke. Tighenguno akukauye timiqo shou kiumu kumsu kutoju moe.

¹⁶Akukauye panoqo tsa initsuni chemo keu timiqono ithuluve kethiu ye panonguno ighamuku pi, “David eno pa kiboqo hailovelo! Ikiqivelo! Panongu ye ningu ghenguno kiu shipuatsu akya? Israil lo timiqo, ninguye akilo woveni nolo! Rehoboam pelo pa likhi pa jukuto apelo!” Tighenguno Israilmino hebideve

¹⁷eno Rehoboam pelo Juda ghakhulo akemi shou likhi akukau shi auve penikeu shi pa qhive.

¹⁸Tithiu Akukau Rehoboam no angka lono akumla shiche pekemi shou ampi shichekeu Adoniram hapesu Israilmi lau puwu ikemu panonguno atu pesu pa veqhi pithive tsu. Hipau ithiveno Rehoboam ye mtazu pawu khurkulu lo ilo puzu Jerusalem lo poighilu.

¹⁹Tinguno tilauye ahuu Israil yehkipeqha lo akemiqoye David lagha kuka shou hebide acheuve.