Read Sumi Naga YEKIKITHI AKINIU 12 Bible Online

YEKIKITHI AKINIU 12 - Sumi Naga bible

YEKIKITHI AKINIU 12

¹Rehoboam no akukau shiluve no akumto shiluve kethiuye pa eno pawu timi kumtsu AMPEU Yezah pheve.

²Rehoboam no ayehpekeu mpe apunguu lo panonguno AMPEU qhoqhumove keu ghenguno ghime qhike. Ijip kukau Shisak no

³khurkulu 1,200, khurshi ghushimi 60,000 eno kihikha kumla ghushimi tiye Libyami, Sukimi Sudanmi sasu ighi puzu Jerusalem halethuve.

⁴Pano Juda lo putukhasu puakeu phughiqo leluve eno Jerusalem kutolo ighive.

⁵Shemaya tungkupu no Akukau Rehoboam lau wu eno Shisak launo poveniye Jerusalem lo Judami sakiphemi kumqo akeqo lau ghi wu. Pano panoqo vilo pi, “AMPEU tsape nongu lau hipau tsu anike: ‘Nonguno iqhiveke tighenguno itehiye ino nongu pesu Shisak lau phesuvae.’ ”

⁶Akukau ngo sakiphemino panonguno axine shivea kepi ikhiluno panonguno pi, “AMPEU no shi akeuye achipi ke.”

⁷AMPEU no hipau ithuluve puzu pano itaghi Shemaya putsano pa vilo ishi pi, “Panonguno panoqo xine kumsuluve ake ghenguno niye panoqo kutsalevemae. Ikemu kughou Shisak no leighini keno panonguye akushukulu xulu nani. Jerusalem ye igha kighide kumtsu xapu pemo nani,

⁸ikemu Shisak no panoqo shou toluve nani eno tileno iqekeu ngo ayeghilo ayehkipemi qekeu dolo kutuqu keu panonguno ithilupe nani.”

⁹Akukau Shisak no Jerusalem lo ighi eno Achineki ngo kukaki lono kinikuluqo luvetsu. Pano thwokha kumtsu eno tipa gholo akukau Solomon no shuna zuto mla puakeu ghi luve.

¹⁰Tipaqo thelilo Rehoboam no alazayi zuto mla tsu eno tipaqoye kukaki khagho khechekemi kijemi pelo jukutsu penike pichebeve.

¹¹Akukauno Achineki lo wuke kumtsulo aghukhemino azuto xapuwu che eno tithiuno aghukhebolo tipaqo pechile pewo qhiche ke.

¹²Pano AMPEU qhoqhu keu ghenguno AMPEU gha kighide ye qhoi pa kutsalevemoke eno Juda ghenguno akiviu shiluve ke.

¹³Rehoboam no Jerusalem lo ayehpeke eno akukau ke pa kuka pekhoke. Pano akukau shilu keu lo paye apunu mpe lhobidi lakhi shi ake eno pano Jerusalem lo ampe chighi tsuni ayehpe ke, tipau phughiye Israil ghakhuqha lono AMPEU no tipa-a kishelu puzu tileno pa mlla penikeu-a shitsuke. Rehoboam paza ye Naama ke, Amun yeghi lono ighikemi.

¹⁴Rehoboam ye kiuno alhoksa keno tipau shike kughengu paye AMPEU pulou phujunike pukaputsamoe.

¹⁵Rehoboam no abothu lono ashekha kutolo mlaqhi keqo eno pa kibo ghili yekithi keuye Shemaya Tungkupu Xughili ngo Ido Tungkupu Xughili lono phulu nani. Rehoboam ngo Jeroboam pamaye tamono aghu shiche.

¹⁶Rehoboam ye thive eno David Phughilo kukami kumoki lo qhove eno panu Abija no pa shelo akukau shi thisuluve.