Read Sumi Naga YEKIKITHI AKINIU 14 Bible Online

YEKIKITHI AKINIU 14 - Sumi Naga bible

YEKIKITHI AKINIU 14

¹Akukau Abija thive eno David Phughilo kukami kumokilo qhove. Panu Asa no akukau shi pa thisuluveno Asa yehpe qholo aghakhuye ampe chighi kutolo iquighai aluke.

²Asa ye kiuno achipi eno akivi keno tipau shi keu lono AMPEU pa Lhou mlokiqipu shiluke.

³Pano inaghami wu akiptia ngo inapugha chine yeh kumlla-a xale vetsu eno Ashera lhouliu michiqo ghekuchove tsuke.

⁴Pano Juda lo akemiqo vilo AMPEU pano puasu Lhou pulou shi penike eno pano kutsukeqo ngo ahzaqo papelu penike ahza tsu.

⁵Pano kutau chine kumlla-a ngo tsungqui ta kiptiaqo Juda phughi kumtsulo lakhave ke ghenguno pa kukaqha ye pano ayeh pe akelo iquighai acheke.

⁶Hipa ghuloki lono pano Juda lo aphughiqo putukhasu luve eno ampe kini kuthu kutolo aghukishi kiumu kuhae kughengu AMPEU no iquighai keu pa tsu ke.

⁷Pano Juda lo akemiqo vilo pi, “Ninguno aphughiqo lo akupuwu ngo aghukheki eno khaghoqolo khalukepushi akhadu sulu puzu putukhape qhikeu shinie. Ninguno AMPEU niLhou pulou shike ghenguno ninguno ayeghi qhasulu anike. Pano ningu sushope ani eno aqha kumtsulo sushokulu ningu tsu anike.” Ike panongu no tipaqo shiqhilu eno kinikulu shilu.

⁸Akukau Asa ye Juda lono ghushimi 300.000 kutolo ake, panoqoye azuto ngo angupa pekemi eno Benjamin lono timi 280,000, timi tipaqoye azuto ngo asuzu pekemi. Panoqo kumtsu amlo kumtomi, akivishi qophevekemi ke.

⁹Sudanmi lakhi pa je Zera ipikemi no pawu ghushimi 10,00,000 khurkulu 300 sasu Juda leighi ke eno Maresha kutolo cheighive.

¹⁰Asa ye pa sasu kumjoni ke wuve eno amqo kinikujo Maresha kupunulo Zefatha Khila lo a-a kutoluve.

¹¹Asa no pa Lhou AMPEU lau hitoi akighini shike,” AMPEU niLhou, kughengu ninguye oje lono aghumi kuloghi hipau sasu kumjoni ke ipeghi anie. AMPEU, noye ni Lhou ke; khuunomu otoluve kulupu kuhake.”

¹²Kughou Asa ngo Juda lo aghushimi no Sudan ghushimi lethuve keno AMPEU no tipaqo shou toluve. Sudanmi ye pokhave

¹³eno Asa ngo pawu ghushimiqono Gerar kutolo panoqo hasu wuke. Sudanmi kutomo pithive tsukehu aghushimi ye kithe pesu kumjomlave. AMPEU eno pawu ghushimino panoqo shou akuka kumto shiluve eno ghushimino thime kumzapu leluvetsu.

¹⁴Tithiu panonguno Gerar hokumxa qhalo aphughiqo kutsaleve tsu kughengu timiqoye AMPEU no shikumsave tsuke. Ghushimino aphughi tipaqo kumtsu tulepinyive tsu eno thime kumzapu khasupe leluve.

¹⁵Panonguno bherikhemi khami ghazu ghi leluve eno bheri ngo kemel kutomo leluvetsu. Tithiu panonguye Jerusalem lo ide ighive.